ਨਵੀਂ ਦਿੱਲੀ, 27 ਫਰਵਰੀ (ਪੋਸਟ ਬਿਊਰੋ)- ਦੁੱਧ ਪੀਣਾ ਖਾਣ-ਪੀਣ ਦਾ ਇੱਕ ਅਨਿੱਖੜਵਾਂ ਅੰਗ ਹੈ, ਪਰ ਜੇ ਪਤਾ ਲੱਗੇ ਕਿ ਦੁੱਧ ਪੀਣ ਨਾਲ ਕੈਂਸਰ ਹੋ ਸਕਦਾ ਹੈ ਤਾਂ ਹੈਰਾਨੀ ਹੋਣਾ ਲਾਜ਼ਮੀ ਹੈ।
ਅਮਰੀਕਾ ਦੇ ਵਿਗਿਆਨੀਆਂ ਨੇ ਆਪਣੀਆਂ ਖੋਜ 'ਚ ਦੇਖਿਆ ਕਿ ਡੇਅਰੀ ਦਾ ਦੁੱਧ ਪੀਣ ਨਾਲ ਵੀ ਕੈਂਸਰ ਹੋਣ ਦਾ ਖਤਰਾ ਹੈ। ਆਪਣੀ ਰਿਸਰਚ ਵਿੱਚ ਵਿਗਿਆਨੀਆਂ ਦਾ ਦਾਅਵਾ ਹੈ ਕਿ ਦੁੱਧ ਨਾਲ ਕੈਂਸਰ ਦੇ ਮਮਲੇ ਵਿੱਚ ਔਰਤਾਂ ਸਭ ਤੋਂ ਛੇਤੀ ਇਨਫੈਕਸ਼ਨ ਦੀ ਲਪੇਟ ਵਿੱਚ ਆਉਂਦੀਆਂ ਹਨ। ਡੇਅਰੀ ਦੇ ਦੁੱਧ ਵਿੱਚ ਗਾਂ, ਮੱਝ ਤੇ ਬੱਕਰੀ ਦਾ ਦੁੱਧ ਸ਼ਾਮਲ ਕੀਤਾ ਜਾਂਦਾ ਹੈ। ਅਮਰੀਕਾ ਦੀ ਲੋਮਾ ਲਿੰਡਾ ਯੂਨੀਵਰਸਿਟੀ ਦੇ ਹੈਲਥ ਸਟੱਡੀਜ਼ ਨਾਲ ਜੁੜੇ ਡਾਕਟਰ ਗੈਰੀ ਈ ਫਰੇਜਰ ਨੇ ਕਿਹਾ ਕਿ ਇਸ ਗੱਲ ਦੇ ਪੱਕੇ ਸਬੂਤ ਮਿਲੇ ਹਨ ਕਿ ਡੇਅਰੀ ਦਾ ਦੁੱਧ ਪੀਣ ਕਾਰਨ ਔਰਤਾਂ 'ਚ ਬ੍ਰੈਸਟ ਕੈਂਸਰ ਹੁੰਦਾ ਹੈ।
ਖੋਜਕਾਰਾਂ ਦਾ ਕਹਿਣਾ ਹੈ ਕਿ ਰੋਜ਼ ਇੱਕ ਕੱਪ ਡੇਅਰੀ ਦੁੱਧ ਪੀਣ ਵਾਲੀਆਂ ਔਰਤਾਂ ਵਿੱਚ ਬ੍ਰੈਸਟ ਕੈਂਸਰ ਦਾ ਖਤਰਾ ਪੰਜਾਹ ਫੀਸਦੀ ਹੁੰਦਾ ਹੈ ਜਦੋਂ ਕਿ ਰੋਜ਼ ਦੋ ਤੋਂ ਤਿੰਨ ਕੱਪ ਪੀਣ ਵਾਲੀਆਂ ਔਰਤਾਂ ਲਈ ਖਤਰਾ ਵਧ ਕੇ ਸੱਤਰ ਤੋਂ ਅੱਸੀ ਫੀਸਦੀ ਹੋ ਜਾਂਦਾ ਹੈ। ਇੰਟਰਨੈਸ਼ਨਲ ਜਨਰਲ ਆਫ ਐਪੀਡੇਮੀਓਲਾਜੀ ਵਿੱਚ ਛਪੀ ਇਸ ਰਿਪੋਰਟ ਦੇ ਅਧਿਐਨ ਲਈ 53000 ਨਾਰਥ ਅਮਰੀਕਾ ਦੀਆਂ ਔਰਤਾਂ ਦੇ ਆਹਾਰ ਦਾ ਮੁਲਾਂਕਣ ਕੀਤਾ ਗਿਆ। ਇਨ੍ਹਾਂ ਸਭ ਔਰਤਾਂ ਦੇ ਖਾਣੇ ਬਾਰੇ ਵੀ ਮੁਲਾਂਕਣ ਕੀਤਾ ਗਿਆ। ਇਹ ਸਾਰੀਆਂ ਔਰਤਾਂ ਸ਼ੁਰੂ ਵਿੱਚ ਕੈਂਸਰ ਮੁਕਤ ਸਨ। ਅੱਠ ਸਾਲ ਤੱਕ ਔਰਤਾਂ 'ਤੇ ਖੋਜ ਕੀਤੀ ਗਈ। ਇਸ ਖੋਜ ਵਿੱਚ ਔਰਤਾਂ ਦੇ ਵਾਤਾਵਰਣ, ਪਰਵਾਰ ਦੇ ਇਤਿਹਾਸ ਅਤੇ ਜੱਦੀ ਪ੍ਰੀਖਣ ਸਮੇਤ ਬ੍ਰੈਸਟ ਕੈਂਸਰ ਦੇ ਹੋਰ ਫੈਕਟਰਸ ਨੂੰ ਧਿਆਨ ਵਿੱਚ ਨਹੀਂ ਰੱਖਿਆ ਗਿਆ। ਇਹ ਅਧਿਐਨ ਡਾਟਾਬੇਸ ਦੇ ਮਾਧਿਅਮ ਨਾਲ ਪ੍ਰਸ਼ਨਾਵਲੀ ਅਤੇ ਵਿਸ਼ਲੇਸ਼ਣ ਦੇ ਮਾਧਿਅਮ ਨਾਲ ਕੀਤਾ ਗਿਆ ਸੀ। ਅਧਿਐਨ ਦੇ ਅੰਤ ਵਿੱਚ ਦੇਖਿਆ ਗਿਆ ਕਿ 1057 ਔਰਤਾਂ 'ਚ ਬ੍ਰੈਸਟ ਕੈਂਸਰ ਦੇ ਕੇਸ ਹਨ। ਡਾਕਟਰ ਫ੍ਰੇਜਰ ਮੁਤਾਬਕ ਡੇਅਰੀ ਫੂਡ ਤੇ ਇਸ ਵਿੱਚ ਵੀ ਖਾਸ ਤੌਰ 'ਤੇ ਦੁੱਧ ਵੱਧ ਖਤਰਨਾਕ ਹੈ। ਉਨ੍ਹਾਂ ਕਿਹਾ ਕਿ ਡੇਅਰੀ ਮਿਲਕ ਦੀ ਥਾਂ ਸੋਇਆ ਮਿਲਕ ਦੀ ਵਰਤੋਂ ਨਾਲ ਬ੍ਰੈਸਟ ਕੈਂਸਰ ਦੇ ਖਤਰਾ ਘੱਟ ਹੋ ਸਕਦਾ ਹੈ।