ਫਿਲੌਰ, 22 ਫਰਵਰੀ (ਪੋਸਟ ਬਿਊਰੋ)- ਨੇੜਲੇ ਪਿੰਡ ਅੱਟੀ ਕੋਲ ਫਿਲੌਰ ਵੱਲੋਂ ਸਰਕਾਰੀ ਰਾਸ਼ਨ ਲੈ ਕੇ ਜਾ ਰਹੇ ਟਰੱਕ ਦੇ ਸਕੂੁਟਰ ਨਾਲ ਟਕਰਾਉਣ ਕਾਰਨ ਸਕੂਟਰ ਚਾਲਕ ਸਰਬਜੀਤ ਰਾਮ (38) ਪੁੱਤਰ ਵਲੈਤੀ ਰਾਮ ਪਿੰਡ ਰਾਜਗੋਮਾਲ ਗੋਰਸੀਆਂ (ਨੂਰਮਹਿਲ) ਦੀ ਮੌਕੇ 'ਤੇ ਮੌਤ ਹੋ ਗਈ, ਜਦੋਂਕਿ ਉਨ੍ਹਾਂ ਦੀ ਧੀ ਮਨਜੋਤ ਕੌਰ (12) ਦੀ ਲੱਤ ਟੁੱਟ ਗਈ ਤੇ ਪਤਨੀ ਮਨਪ੍ਰੀਤ ਕੌਰ (32) ਵੀ ਜ਼ਖ਼ਮੀ ਹੋ ਗਈ। ਟਰੱਕ ਦਾ ਡਰਾਈਵਰ ਮੌਕੇ ਤੋਂ ਫ਼ਰਾਰ ਹੋ ਗਿਆ। ਉਸ ਵੇਲੇ ਡੀ ਐਸ ਪੀ ਜਲੰਧਰ ਸੁਖਵਿੰਦਰ ਸਿੰਘ ਦੀ ਗੱਡੀ ਉਥੋਂ ਲੰਘ ਰਹੀ ਸੀ, ਉਨ੍ਹਾਂ ਨੇ ਆਪਣੀ ਗੱਡੀ ਵਿੱਚ ਜ਼ਖ਼ਮੀਆਂ ਨੂੰ ਸਥਾਨਕ ਸਿਵਲ ਹਸਪਤਾਲ ਫਿਲੌਰ ਪਹੁੰਚਾਇਆ। ਲੜਕੀ ਦੀ ਹਾਲਤ ਗੰਭੀਰ ਹੋਣ ਕਾਰਨ ਡਾਕਟਰਾਂ ਨੇ ਉਸ ਨੂੰ ਪੀ ਜੀ ਆਈ ਚੰਡੀਗੜ੍ਹ ਭੇਜ ਦਿੱਤਾ ਅਤੇ ਮ੍ਰਿਤਕ ਦੀ ਪਤਨੀ ਮਨਪ੍ਰੀਤ ਕੌਰ ਨੂੰ ਵੀ ਨਾਲ ਹੀ ਭੇਜ ਦਿੱਤਾ ਗਿਆ।
ਮਿਲੀ ਜਾਣਕਾਰੀ ਅਨੁਸਾਰ ਸਰਬਜੀਤ ਰਾਮ ਆਪਣੇ ਪਰਵਾਰ ਸਮੇਤ ਸਕੂਟਰ 'ਤੇ ਆਪਣੇ ਸਹੁਰੇ ਪਿੰਡ ਦੁਸਾਂਝ ਜਾ ਰਹੇ ਸਨ। ਅੱਟੀ ਵਾਲੇ ਮੋੜ ਕੋਲ ਫਿਲੌਰ ਵੱਲੋਂ ਆਇਆ ਤੇਜ਼ ਰਫ਼ਤਾਰ, ਟਰੱਕ ਜਿਸ ਵਿੱਚ ਸਰਕਾਰੀ ਰਾਸ਼ਨ ਲੱਦਿਆ ਸੀ, ਉਨ੍ਹਾਂ ਦੇ ਸਕੂਟਰ ਨਾਲ ਜਾ ਟਕਰਾਇਆ। ਇਸ ਹਾਦਸੇ 'ਚ ਸਰਬਜੀਤ ਦੀ ਮੌਕੇ 'ਤੇ ਮੌਤ ਹੋ ਗਈ, ਜਦੋਂ ਕਿ ਉਨ੍ਹਾਂ ਦੀ ਪਤਨੀ ਤੇ ਧੀ ਜ਼ਖ਼ਮੀ ਹੋ ਗਈਆਂ। ਏ ਐਸ ਆਈ ਫਿਲੌਰ ਭਰਤ ਮਸੀਹ ਓਥੇ ਜਾ ਕੇ ਲੋੜੀਂਦੀ ਕਾਰਵਾਈ ਕੀਤੀ।