ਬਰਲਿਨ, 20 ਫਰਵਰੀ (ਪੋਸਟ ਬਿਊਰੋ)- ਜਰਮਨੀ ਵਿੱਚ ਮੁਸਲਮਾਨਾਂ ਦੇ ਬਾਰੇ ਦੋ ਵੱਖ-ਵੱਖ ਵਿਖਾਵੇ ਹੋਏ ਹਨ, ਇੱਕ ਹੱਕ ਵਿੱਚ ਅਤੇ ਦੂਜਾ ਵਿਰੁੱਧ। ਹੱਕ ਵਿੱਚ ਵਿਖਾਵਾ ਕਰਨ ਵਾਲੇ ਲੋਕ ਜਰਮਨੀ ਵਿੱਚ ਰਹਿਣ ਵਾਲੇ ਪਰਵਾਸੀ ਸਨ, ਜਦ ਕਿ ਵਿਰੋਧ ਵਿਖਾਵਾ ਕਰਨ ਵਾਲੇ ਜਰਮਨ ਦੇ ਕੱਟੜਪੰਥੀ ਸਨ।
ਮੁਸਲਮਾਨਾਂ ਦੀ ਹਮਾਇਤ ਅਤੇ ਵਿਰੋਧ ਦੇ ਵਿਖਾਵਿਆਂ ਕਾਰਨ ਜਰਮਨੀ ਵਿੱਚ ਇੱਕ ਨਵਾਂ ਸਿਆਸੀ ਵਿਵਾਦ ਖੜ੍ਹਾ ਹੋ ਗਿਆ ਅਤੇ ਓਥੇ ਰਹਿਣ ਵਾਲੇ ਮੁਸਲਮਾਨਾਂ ਨੇ ਸੁਰੱਖਿਆ ਮੰਗੀ ਹੈ। ਮਾਹੌਲ ਓਦੋਂ ਤਨਾਅ ਵਾਲਾ ਬਣ ਗਿਆ ਜਦੋਂ ਦੋਵਾਂ ਧਿਰਾਂ ਦੇ ਲੋਕ ਡਰੈਸਡੈਨ ਸ਼ਹਿਰ ਦੇ ਫਰਾਊਨ ਕਿਰਚੇ ਇਲਾਕੇ ਵਿੱਚ ਆਹਮੋ-ਸਾਹਮਣੇ ਹੋ ਗਏ। ਇਥੇ ਦੋਵਾਂ ਧਿਰਾਂ ਵਿੱਚ ਝੜਪ ਹੋਣ ਵਾਲੀ ਸੀ ਕਿ ਜਰਮਨ ਪੁਲਸ ਨੇ ਉਨ੍ਹਾਂ ਨੂੰ ਵੱਖ-ਵੱਖ ਕੀਤਾ। ਜਰਮਨ ਚਾਂਸਲਰ ਐਂਜੇਲਾ ਮਰਕੇਲ ਨੇ ਕਿਹਾ ਕਿ ਇਸਲਾਮ ਵਿਰੋਧੀ ਪੈਟਰੀਆਟਿਕ ਯੂਰਪੀਅਨਜ਼ ਅਗੇਂਸਟ ਦਿ ਇਸਲਾਮਾਈਜ਼ੇਸ਼ਨ ਆਫ ਦਿ ਬੈਸਟ (ਪੇਗਿਡਾ) ਦੇ ਆਗੂ ਗਲਤ ਫਹਿਮੀ ਦਾ ਸ਼ਿਕਾਰ ਹਨ। ਉਨ੍ਹਾਂ ਨੂੰ ਇਹ ਹਰਕਤਾਂ ਬੰਦ ਕਰਨੀਆਂ ਚਾਹੀਦੀਆਂ ਹਨ। ਜਰਮਨੀ ਵਿੱਚ ਇਸਲਾਮ ਫੋਬੀਆ ਤੇਜ਼ੀ ਨਾਲ ਵਧ ਰਿਹਾ ਹੈ। ਸਰਕਾਰ ਇਸ ਬਾਰੇ ਸਖਤ ਕਦਮ ਚੁੱਕੇਗੀ।
ਇਸ ਦੌਰਾਨ ਜਰਮਨੀ ਦੀ ਸਰਕਾਰ ਨੇ ਇੱਕ ਸਾਜ਼ਿਸ ਬੇਨਕਾਬ ਕਰਦੇ ਹੋਏ ਸੱਜੇ ਪੱਖੀ ਗਰੁੱਪ ਦੇ 12 ਮੈਂਬਰਾਂ ਨੂੰ ਗ੍ਰਿਫਤਾਰ ਕੀਤਾ ਹੈ। ਇਹ ਵਿਅਕਤੀ ਜਰਮਨ ਮਸਜਿਦਾਂ ਨੂੰ ਉਡਾਉਣ ਦੀ ਸਾਜ਼ਿਸ਼ ਰਚ ਰਹੇ ਸਨ। ਗ੍ਰਿਫਤਾਰ ਹੋਏ ਲੋਕਾਂ ਦਾ ਸਰਗਣਾ ਇੱਕ 53 ਸਾਲਾ ਵਿਅਕਤੀ ਵਰਨਰ ਐੱਸ ਹੈ, ਜਿਸ ਨੇ ਮਸਜਿਦਾਂ ਨੂੰ ਬੰਬ ਨਾਲ ਉਡਾਉਣ ਵਾਲਿਆਂ ਨੂੰ 38.60 ਲੱਖ ਰੁਪਏ ਦਿੱਤੇ ਸਨ। ਵਰਨਰ ਦੀ ਯੋਜਨਾ ਵਿੱਚ ਜਰਮਨ ਦੇ ਪੁਲਸ ਵਿਭਾਗ ਦਾ ਇੱਕ ਕਲਰਕ ਵੀ ਸ਼ਾਮਲ ਹੈ।