ਨਵੀਂ ਦਿੱਲੀ, 19 ਫਰਵਰੀ (ਪੋਸਟ ਬਿਊਰੋ)- ਗੁਜਰਾਤ ਦੇ ਅਹਿਮਦਾਬਾਦ ਵਿੱਚ ਇਕ 80 ਸਾਲ ਦਾ ਬਜ਼ੁਰਗ ਕਿਸੇ ਸਾਈਬਰ ਅਪਰਾਧੀ ਦੇ ਜਾਲ ਵਿੱਚ ਫਸ ਗਿਆ ਅਤੇ 9 ਕਰੋੜ ਰੁਪਏ ਲੁਟਾ ਬੈਠਾ ਹੈ।
ਪਤਾ ਲੱਗਾ ਹੈ ਕਿ ਅਹਿਮਦਾਬਾਦ ਦੇ ਪੰਚਵਟੀ ਇਲਾਕੇ ਦੇ ਰਹਿਣ ਵਾਲੇ ਬਜ਼ੁਰਗ ਨੇ ਸੋਮਵਾਰ ਸਾਈਬਰ ਕ੍ਰਾਈਮ ਪੁਲਿਸ ਨੂੰ ਸਿ਼ਕਾਇਤ ਦਰਜ ਕਰਾਈ ਅਤੇ 33 ਲੋਕਾਂ ਦੇ ਖ਼ਿਲਾਫ਼ ਠੱਗੀ ਦਾ ਦੋਸ਼ ਲਾਇਆ ਹੈ। ਸ਼ਿਕਾਇਤ ਵਿੱਚ ਕਿਹਾ ਹੈ ਕਿ 10 ਹਜ਼ਾਰ ਰੁਪਏ ਦਾ ਟੂਰ ਪੈਕੇਜ ਦੇਣ ਦੇ ਨਾਂ ਉੱਤੇ ਉਸ ਨਾਲ ਇਹ ਧੋਖਾਧੜੀ ਕੀਤੀ ਗਈ। ਪੀੜਤ ਦਿਨੇਸ਼ ਪਟੇਲ ਪੰਚਵਟੀ ਦੀ ਪਟੇਲ ਸੁਸਾਇਟੀ ਦਾ ਵਾਸੀ ਹੈ। ਉਸ ਨੇ ਦੱਸਿਆ ਕਿ ਆਨਲਾਈਨ ਬੈਂਕਿੰਗ ਰਾਹੀਂ 18 ਅਕਤੂਬਰ 2017 ਤੋਂ 27 ਨਵੰਬਰ 2019 ਦੌਰਾਨ ਉਨ੍ਹਾਂ ਨੇ ਰੁਪਏ ਟ੍ਰਾਂਸਫਰ ਕੀਤੇ ਸਨ। ਇੰਨੀ ਵੱਡੀ ਰਕਮ ਵੱਖ-ਵੱਖ ਸਮੇਂ ਵਿੱਚ ਟ੍ਰਾਂਸਫਰ ਹੋਣ ਉੱਤੇ ਸਵਾਲ ਵੀ ਖੜ੍ਹੇ ਹੁੰਦੇ ਹਨ। ਕਈ ਟੈਕਸਟਾਈਲ ਕੰਪਨੀਆਂ ਵਿੱਚ ਕੰਮ ਕਰਨ ਪਿੱਛੋਂ ਸੇਵਾ ਮੁਕਤ ਹੋਏ ਪਟੇਲ ਨੇ ਸ਼ਿਕਾਇਤ ਵਿੱਚ ਕਿਹਾ ਕਿ 18 ਅਕਤੂਬਰ 2017 ਨੂੰ ਉਨ੍ਹਾਂ ਨੂੰ ਇਕ ਨਾਮੀ ਟੈਲੀਕਾਮ ਕੰਪਨੀ ਤੋਂ ਛੁੱਟੀਆਂ ਦੇ ਟੂਰ ਦੀ ਮੇਲ ਰਾਹੀਂ ਇੱਕ ਪੈਕੇਜ ਆਫ਼ਰ ਕੀਤਾ ਗਿਆ ਸੀ। ਉਨ੍ਹਾਂ ਨੂੰ ਆਫ਼ਰ ਸਹੀ ਲੱਗਾ ਅਤੇ ਉਨ੍ਹਾਂ ਨੇ ਇਸ ਦੀ ਹੋਰ ਜਾਣਕਾਰੀ ਮੰਗੀ। ਇਸ ਦੇ ਬਾਅਦ ਪਟੇਲ ਤੋਂ ਸਭ ਤੋਂ ਪਹਿਲਾ ਟੂਰ ਪੈਕੇਜ ਨੂੰ ਪ੍ਰਵਾਨ ਕਰਨ ਲਈ 10 ਹਜ਼ਾਰ ਰੁਪਏ ਦੇਣ ਦੀ ਮੰਗ ਕੀਤੀ ਗਈ ਅਤੇ ਉਨ੍ਹਾਂ ਨੂੰ ਇਕ ਗਿਫ਼ਟ ਦੇਣ ਦਾ ਵਾਅਦਾ ਕੀਤਾ ਗਿਆ। ਇਸ ਪਿੱਛੋਂ ਵੱਖ-ਵੱਖ ਲੋਕਾਂ ਨੇ ਧੋਖਾਧੜੀ ਦੀ ਇਕ ਸੀਰੀਜ਼ ਚਲਾਈ ਅਤੇ ਉਨ੍ਹਾਂ ਤੋਂ ਟੂਰ ਪੈਕੇਜ ਦੇ ਨਾਂ ਉੱਤੇ ਪੈਸੇ ਦੀ ਮੰਗ ਕੀਤੀ। ਪਟੇਲ ਦੇ ਮੁਤਾਬਕ ਬੀਤੇ ਦੋ ਸਾਲਾਂ ਵਿੱਚ ਉਨ੍ਹਾਂ ਨੇ 80 ਵਾਰ ਹੋਏ ਵੱਖ-ਵੱਖ ਟ੍ਰਾਂਜੈਕਸ਼ਨ ਵਿੱਚ 9 ਕਰੋੜ ਤੋਂ ਵੱਧ ਰਕਮ ਖਾਤੇ ਵਿੱਚ ਟ੍ਰਾਂਸਫਰ ਕੀਤੀ, ਜੋ 10 ਹਜ਼ਾਰ ਤੋਂ ਲੈ ਕੇ 50 ਲੱਖ ਤਕ ਹੈ, ਪਰ ਨਾ ਕਦੀ ਕੋਈ ਟੂਰ ਆਫ਼ਰ ਮਿਲਿਆ ਤੇ ਨਾ ਉਨ੍ਹਾਂ ਦੇ ਪੈਸੇ ਵਾਪਸ ਆਏ।