ਪੈਰਿਸ, 19 ਫਰਵਰੀ (ਪੋਸਟ ਬਿਊਰੋ)- ਜਰਮਨੀ ਵਿਚ ਮੁਸਲਮਾਨਾਂ ਬਾਰੇ ਵਿਰੋਧ ਪ੍ਰਦਰਸ਼ਨ ਜਾਰੀ ਹੁੰਦਿਆਂ ਤੋਂ ਫਰਾਂਸ ਨੇ ਵੀ ਆਪਣੇ ਦੇਸ਼ ਵਿਚ ਵਿਦੇਸ਼ੀ ਇਮਾਮਾਂ ਦੇ ਦਾਖਲ ਹੋਣ ਉੱਤੇ ਪਾਬੰਦੀ ਲਾ ਦਿੱਤੀ ਹੈ।
ਫਰਾਂਸ ਦੀ ਸਰਕਾਰ ਨੇ ਇਹ ਫੈਸਲਾ ਇਸ ਲਈ ਲਿਆ ਹੈ ਕਿ ਦੇਸ਼ ਵਿਚ ਅੱਤਵਾਦੀ ਗਤੀਵਿਧੀਆਂ ਨੂੰ ਰੋਕਿਆ ਜਾ ਸਕੇ। ਇਸ ਫੈਸਲੇ ਉੱਤੇ ਰਾਸ਼ਟਰਪਤੀ ਇਮੈਨੁਅਲ ਮੈਕਰੋਂ ਨੇ ਮੋਹਰ ਲਾ ਦਿੱਤੀ ਹੈ। ਉਨ੍ਹਾ ਨੇ ਪ੍ਰੈੱਸ ਕਾਨਫਰੰਸ ਵਿਚ ਦੱਸਿਆ, ‘ਅਸੀਂ 2020 ਦੇ ਬਾਅਦ ਆਪਣੇ ਦੇਸ਼ ਵਿਚ ਕਿਸੇ ਵੀ ਹੋਰ ਦੇਸ਼ ਤੋਂ ਮੁਸਲਿਮ ਇਮਾਮਾਂ ਦੇ ਆਉਣ ਉੱਤੇ ਰੋਕ ਲਾ ਦਿੱਤੀ ਹੈ।` ਫਰਾਂਸ ਵਿਚ ਹਰ ਸਾਲ ਕਰੀਬ 300 ਇਮਾਮ ਦੁਨੀਆ ਭਰ ਦੇ ਦੇਸ਼ਾਂ ਵਿੱਚੋਂ ਆਉਂਦੇ ਹਨ। ਇਸ ਸੰਬੰਧ ਵਿੱਚ ਰਾਸ਼ਟਰਪਤੀ ਮੈਕਰੋਂ ਨੇ ਕਿਹਾ, ‘ਇਸ ਕਦਮ ਨਾਲ ਫਰਾਂਸ ਵਿਚ ਅੱਤਵਾਦੀ ਗਤੀਵਿਧੀਆਂ ਉੱਤੇ ਲਗਾਮ ਲੱਗੇਗੀ। ਫਰਾਂਸ ਵਿਚ ਬਹੁਤੇ ਇਮਾਮ ਅਲਜੀਰੀਆ, ਮੋਰੱਕੋ ਅਤੇ ਤੁਰਕੀ ਤੋਂ ਆਉਂਦੇ ਹਨ ਅਤੇ ਇੱਥੇ ਆਣ ਕੇ ਮਦਰਸਿਆਂ ਵਿਚ ਪੜ੍ਹਾਉਂਦੇ ਹਨ। ਅਸੀਂ ਫ੍ਰੈਂਚ ਮੁਸਲਿਮ ਕੌਂਸਲ ਨੂੰ ਕਿਹਾ ਹੈ ਕਿ ਉਹ ਇਸ ਗੱਲ ਉੱਤੇ ਨਜ਼ਰ ਰੱਖਣ ਕਿ 2020 ਦੇ ਬਾਅਦ ਕੋਈ ਵਿਦੇਸ਼ੀ ਮੁਸਲਿਮ ਇਮਾਮ ਫਰਾਂਸ ਵਿਚ ਨਾ ਆਵੇ।` ਮੈਕਰੋਂ ਨੇ ਉਨ੍ਹਾਂ ਨੂੰ ਇਹ ਵੀ ਕਿਹਾ ਕਿ ਉਹ ਫਰਾਂਸ ਵਿਚਲੇ ਸਭ ਵਿਦੇਸ਼ੀ ਇਮਾਮਾਂ ਨੂੰ ਫ੍ਰੈਂਚ ਸਿੱਖਣ ਲਈ ਕਹਿਣ ਤੇ ਨਾਲ ਉਹ ਕੱਟੜਪੰਥੀ ਭਾਵਨਾਵਾਂ ਨਾ ਭੜਕਾਉਣ ਅਤੇ ਕਿਸੇ ਤਰ੍ਹਾਂ ਦੀਆਂ ਅੱਤਵਾਦੀ ਗਤੀਵਿਧੀਆਂ ਵਿਚ ਸ਼ਾਮਲ ਨਾ ਹੋਣ। ਫਰਾਂਸ ਦੇ ਕਾਨੂੰਨ ਦੀ ਰੱਖਿਆ ਕਰਨ।’
ਰਾਸ਼ਟਰਪਤੀ ਮੈਕਰੋਂ ਨੇ ਕਿਹਾ, ‘ਇਹ ਜ਼ਰੂਰੀ ਨਹੀਂ ਕਿ ਸਾਰੇ ਅੱਤਵਾਦੀ ਮੁਸਲਿਮ ਹੋਣ, ਪਰ ਬਹੁਤੇ ਕੇਸਾਂ ਵਿਚ ਇਸਲਾਮਿਕ ਅੱਤਵਾਦ ਸਾਹਮਣੇ ਆਉਂਦਾ ਹੈ, ਇਸ ਲਈ ਅਸੀਂ ਇਹ ਕਦਮ ਚੁੱਕਿਆ ਹੈ। ਮੇਰੀ ਸਾਰੇ ਧਰਮਾਂ ਦੇ ਲੋਕਾਂ ਨੂੰ ਅਪੀਲ ਹੈ ਕਿ ਫਰਾਂਸ ਦੀ ਰੱਖਿਆ ਕਰੋ ਤੇ ਇਸ ਦੇਸ਼ ਦੇ ਕਾਨੂੰਨ ਦੀ ਪਾਲਣਾ ਕਰੋ।` ਰਾਸ਼ਟਰਪਤੀ ਨੇ ਦੱਸਿਆ, ‘ਇਸ ਸਾਲ ਸਤੰਬਰ ਪਿੱਛੋਂ ਫਰਾਂਸ ਵਿਚ ਵਿਦੇਸ਼ੀ ਮੁਸਲਿਮ ਇਮਾਮਾਂ ਉੱਤੇ ਦੇਸ਼ ਵਿਚ ਆਉਣ ਦੀ ਰੋਕ ਹੋਵੇਗੀ।` ਉਨ੍ਹਾਂ ਇਹ ਵੀ ਦੱਸਿਆ ਕਿ ਕਿਵੇਂ ਧਰਮ ਦੇ ਨਾਮ ਉੱਤੇ ਲੋਕ ਮਸਜਿਦਾਂ ਨੂੰ ਪੈਸੇ ਭੇਜਦੇ ਅਤੇ ਇਨ੍ਹਾਂ ਪੈਸਿਆਂ ਦੀ ਵਰਤੋਂ ਗਲਤ ਕੰਮਾਂ ਲਈ ਹੁੰਦੀ ਹੈ। ਉਨ੍ਹਾ ਕਿਹਾ ਕਿ ਫਰਾਂਸ ਮੁਸਲਮਾਨਾਂ ਦੇ ਵਿਰੁੱਧ ਨਹੀਂ, ਪਰ ਅੱਤਵਾਦ ਸਮਰਥਕਾਂ ਦੇ ਪੱਖ ਵਿਚ ਵੀ ਨਹੀਂ। ਇਸ ਲਈ ਅਸੀਂ ਏਦਾਂ ਕਰਨ ਵਾਲਿਆਂ ਨੂੰ ਨਹੀਂ ਛਡਾਂਗੇ। ਏਥੇ 9 ਮੁਸਲਿਮ ਦੇਸ਼ਾਂ ਤੋਂ ਇਮਾਮ ਆਣ ਕੇ ਪੜ੍ਹਾਉਂਦੇ ਹਨ, ਪਰ ਮੇਰੀ ਸਰਕਾਰ ਇਸ ਗੱਲ ਨੂੰ ਪੱਕਾ ਕਰੇਗੀ ਕਿ ਭੱਵਿਖ ਵਿਚ ਇਨ੍ਹਾਂ 9 ਦੇਸ਼ਾਂ ਤੋਂ ਕੋਈ ਇਮਾਮ ਨਾ ਆ ਸਕੇ।’
ਇਸ ਆਦੇਸ਼ ਦੇ ਬਾਅਦ ਮੈਕਰੋਂ ਦਾ ਕੁਝ ਲੋਕ ਵਿਰੋਧ ਕਰ ਰਹੇ ਹਨ। ਖੱਬੇ ਪੱਖੀ ਪਾਰਟੀ ਦੇ ਲੀਡਰ ਮੈਰੀਨ ਲੇ-ਪੇਨ ਨੇ ਮੈਕਰੋਂ ਉੱਤੇ ਦੋਸ਼ ਲਾਇਆ ਹੈ ਕਿ ਫਰਾਂਸ ਵਿਚ ਮੁਸਲਮਾਨਾਂ ਲਈ ਉਹ ਸਹੀ ਫੈਸਲੇ ਨਹੀਂ ਲੈ ਰਹੇ, ਫਰਾਂਸ ਵਿਚ ਮੁਸਲਮਾਨਾਂ ਦੀ ਏਕਤਾ ਬਣਾਈ ਰੱਖਣਾ ਜ਼ਰੂਰੀ ਹੈ।