ਲੰਡਨ, 19 ਫਰਵਰੀ (ਪੋਸਟ ਬਿਊਰੋ)- ਅੱਜ ਬੁੱਧਵਾਰ ਨੂੰ ਬ੍ਰਿਟੇਨ ਨੇ ਨਵੀਂ ਵੀਜ਼ਾ ਵਿਵਸਥਾ ਸ਼ੁਰੂ ਕਰ ਦਿੱਤੀ ਹੈ। ਇਸ ਬਾਰੇ ਦੇਸ਼ ਦੀ ਹੋਮ ਸੈਕਟਰੀ ਪ੍ਰੀਤੀ ਪਟੇਲ ਨੇ ਬ੍ਰਿਟੇਨ ਦੀ ਨਵੀਂ ਪੁਆਇੰਟ ਆਧਾਰਿਤ ਵੀਜ਼ਾ ਪ੍ਰਣਾਲੀ ਸ਼ੁਰੂ ਕਰਨ ਦਾ ਐਲਾਨ ਕੀਤਾ, ਜਿਸ ਦਾ ਉਦੇਸ਼ ਭਾਰਤ ਸਮੇਤ ਦੁਨੀਆ ਦੇ ਸਭ ਤੋਂ ਪ੍ਰਤਿਭਾਸ਼ਾਲੀ ਅਤੇ ਸਭ ਤੋਂ ਚੰਗੇ ਲੋਕਾਂ ਨੂੰ ਬ੍ਰਿਟੇਨ ਆਉਣ ਲਈ ਖਿੱਚਣਾ ਹੈ। ਇਸ ਨਵੇਂ ਵੀਜ਼ਾ ਸਿਸਟਮ ਦਾ ਉਦੇਸ਼ ਅਸਲ ਵਿੱਚ ਇਸ ਦੇਸ਼ ਵਿਚ ਆਉਣ ਵਾਲੇ ਸਸਤੇ ਅਤੇ ਘੱਟ-ਹੁਨਰਮੰਦਾਂ ਦੀ ਗਿਣਤੀ ਵਿੱਚ ਕਟੌਤੀ ਕਰਨਾ ਦੱਸਿਆ ਜਾ ਰਿਹਾ ਹੈ।
ਯੂਰਪੀ ਯੂਨੀਅਨ (ਈ ਯੂ) ਤੋਂ ਪਿਛਲੇ ਮਹੀਨੇ ਬ੍ਰਿਟੇਨ ਦੇ ਬਾਹਰ ਨਿਕਲਣ ਪਿੱਛੋਂ ਮਿਥੀ ਸਮਾਂ ਹੱਦ ਦੀ ਸਮਾਪਤੀ ਉੱਤੇ ਨਵੀਂ ਪ੍ਰਣਾਲੀ ਇੱਕ ਜਨਵਰੀ 2021 ਤੋਂ ਲਾਗੂ ਕਰ ਦਿੱਤੀ ਜਾਵੇਗੀ। ਇਹ ਨਵੀਂ ਪੋਸਟ ਬ੍ਰੈਗਜ਼ਿਟ ਪ੍ਰਣਾਲੀ ਭਾਰਤ ਵਰਗੇ ਯੂਰਪੀ ਯੂਨੀਅਨ ਵਾਲੇ ਤੇ ਗ਼ੈਰ-ਯੂਰਪੀ ਦੇਸ਼ਾਂ ਉੱਤੇ ਬਰਾਬਰ ਲਾਗੂ ਹੋਵੇਗੀ। ਇਹ ਪ੍ਰਣਾਲੀ ਖ਼ਾਸ ਹੁਨਰ, ਯੋਗਤਾ, ਤਨਖ਼ਾਹ ਅਤੇ ਵਪਾਰੀਆਂ ਨੂੰ ਨੰਬਰ ਦੇਣ ਉੱਤੇ ਆਧਾਰਿਤ ਹੈ, ਜਿਹੜੇ ਸਿਰਫ਼ ਲੋੜੀਂਦੇ ਨੰਬਰ ਪ੍ਰਾਪਤ ਕਰਨ ਵਾਲਿਆਂ ਨੂੰ ਵੀਜ਼ਾ ਦਿਵਾਉਂਦੇ ਹਨ। ਬ੍ਰਿਟੇਨ ਵਿੱਚ ਭਾਰਤੀ ਮੂਲ ਦੀ ਕੈਬਨਿਟ ਮੰਤਰੀ ਪ੍ਰੀਤੀ ਪਟੇਲ ਨੇ ਕਿਹਾ, ‘ਅੱਜ ਪੂਰੇ ਦੇਸ਼ ਲਈ ਇਤਿਹਾਸਕ ਪਲ ਹੈ। ਅਸੀਂ ਫਰੀ ਮੂਵਮੈਂਟ ਖਤਮ ਕਰ ਰਹੇ ਹਾਂ, ਆਪਣੀਆਂ ਨੀਤੀਆਂ ਵਾਪਸ ਲੈ ਰਹੇ ਹਾਂ ਅਤੇ ਯੂ ਕੇ ਦੀ ਨਵੀਂ ਪੁਆਇੰਟ-ਆਧਾਰਿਤ ਇਮੀਗ੍ਰੇਸ਼ਨ ਪ੍ਰਣਾਲੀ ਸ਼ੁਰੂ ਕਰ ਕੇ ਲੋਕਾਂ ਦੀਆਂ ਸੋਚਾਂ ਤਕ ਪਹੁੰਚ ਰਹੇ ਹਾਂ।`
ਬ੍ਰਿਟੇਨ ਦੀ ਵੀਜ਼ਾ ਅਤੇ ਇਮੀਗ੍ਰੇਸ਼ਨ ਪ੍ਰਣਾਲੀ ਦੀ ਇੰਚਾਰਜ ਪ੍ਰੀਤੀ ਪਟੇਲ ਨੇ ਕਿਹਾ, ‘ਅਸੀਂ ਦੁਨੀਆ ਭਰ ਦੇ ਸਭ ਤੋਂ ਹੁਨਰਮੰਦ ਤੇ ਸਭ ਤੋਂ ਚੰਗੇ ਲੋਕਾਂ ਨੂੰ ਖਿੱਚ ਪਾਵਾਂਗੇ, ਜੋ ਅਰਥ ਵਿਵਸਥਾ ਤੇ ਸਾਡੇ ਭਾਈਚਾਰੇ ਨੂੰ ਹੱਲਾਸ਼ੇਰੀ ਦੇਣਗੇ ਤੇ ਇਸ ਦੇਸ਼ ਦੀ ਪੂਰੀ ਹਮਾਇਤ ਪ੍ਰਾਪਤ ਕਰਨਗੇ।` ਬ੍ਰਿਟੇਨ ਦੇ ਗ੍ਰਹਿ ਮੰਤਰਾਲੇ ਨੇ ਕਿਹਾ ਕਿ ਨਵੀਂ ਵੀਜ਼ਾ ਪ੍ਰਣਾਲੀ ਬ੍ਰੈਗਜ਼ਿਟ ਦੇ ਹੱਕ ਵਿੱਚ 2016 ਦੀ ਰਾਇ ਸ਼ੁਮਾਰੀ ਦੀ ਸਿੱਧੀ ਪ੍ਰਤੀਕਿਰਿਆ ਹੈ, ਜਿਸ ਨੂੰ ਸਸਤੀ ਪਰਵਾਸੀ ਕਿਰਤ ਉੱਤੇ ਦੇਸ਼ ਦੀ ਨਿਰਭਰਤਾ ਖ਼ਤਮ ਕਰਨ ਅਤੇ ਸਖ਼ਤ ਸੁਰੱਖਿਆ ਹੇਠ ਪਰਵਾਸ ਦੇ ਸਮੁੱਚੇ ਪੱਧਰ ਨੂੰ ਘਟਾਉਣ ਲਈ ਇਕ ਵੋਟ ਦੇ ਰੂਪ ਵਿੱਚ ਦੇਖਿਆ ਗਿਆ ਸੀ। ਗਲੋਬਲ ਟੈਲੇਂਟ ਸਕੀਮ ਹੇਠ ਸ਼ੁੱਕਰਵਾਰ ਤੋਂ ਅਮਲ ਵਿੱਚ ਆਉਣ ਵਾਲਾ ਫਾਸਟ-ਟ੍ਰੈਕ ਵੀਜ਼ਾ ਅਗਲੇ ਸਾਲ ਤੋਂ ਯੂਰਪੀ ਯੂਨੀਅਨ ਦੇ ਨਾਗਰਿਕਾਂ ਲਈ ਵੀ ਲਾਗੂ ਹੋਵੇਗਾ, ਜਿਹੜਾ ਅਤਿ ਆਧੁਨਿਕ ਵਿਗਿਆਨੀਆਂ ਅਤੇ ਖੋਜੀਆਂ ਨੂੰ ਨੌਕਰੀ ਦੀ ਪੇਸ਼ਕਸ਼ ਦੇ ਬਿਨਾਂ ਬ੍ਰਿਟੇਨ ਆਉਣ ਦੀ ਇਜਾਜ਼ਤ ਦੇਵੇਗਾ।