ਲੁਧਿਆਣਾ, 19 ਜਨਵਰੀ, (ਪੋਸਟ ਬਿਊਰੋ)- ਇਸ ਜਿ਼ਲੇ ਵਿੱਚ ਡੇਹਲੋਂ ਕੋਲ ਪਿੰਡ ਜੜਤੌਲੀ ਦੇ ਖੇਤਾਂ ਵਿਚ ਬਣਾਏ ਘਰ ਵਿੱਚ 30 ਹਜ਼ਾਰ ਰੁਪਏ ਲੈ ਕੇ ਭਰੂਣ ਲਿੰਗ ਟੈਸਟ ਕੀਤਾ ਜਾਂਦਾ ਸੀ ਤੇ ਇਸ ਲਈ ਏਜੰਟ ਚਾਰ ਹਜ਼ਾਰ ਰੁਪਏ ਕਮਿਸ਼ਨ ਲੈਂਦਾ ਸੀ। ਅੰਬਾਲਾ ਦੀ ਪੀ ਐੱਨ ਡੀ ਟੀ ਟੀਮ ਨੇ ਸਿਹਤ ਵਿਭਾਗ ਨਾਲ ਛਾਪਾ ਮਾਰਿਆ ਹੈ। ਛਾਪੇ ਦੌਰਾਨ ਭਰੂਣ ਲਿੰਗ ਟੈਸਟ ਕਰਨ ਵਾਲਾ ਜੋੜਾ ਫਰਾਰ ਹੋ ਗਿਆ, ਪਰ ਏਜੰਟ ਕੁਲਵਿੰਦਰ ਸਿੰਘ ਫੜਿਆ ਗਿਆ। ਸੈਲ ਨੇ ਇਸ ਦੀ ਸ਼ਿਕਾਇਤ ਥਾਣਾ ਸਦਰ ਪੁਲਿਸ ਨੂੰ ਦਿੱਤੀ ਹੈ ਅਤੇ ਪੁਲਿਸ ਦੋਸ਼ੀ ਤੋਂ ਪੁੱਛਗਿੱਛ ਕਰ ਰਹੀ ਹੈ।
ਹਰਿਆਣਾ ਦੇ ਅੰਬਾਲਾ ਤੋਂ ਆਈ ਟੀਮ ਦੇ ਮੈਂਬਰ ਮੁਨੀਸ਼ ਕੁਮਾਰ ਨੇ ਦੱਸਿਆ ਕਿ ਅੰਬਾਲਾ ਕੋਲ ਸ਼ੰਭੂ ਬੈਰੀਅਰ ਦੇ ਪਿੰਡ ਦਾ ਕੁਲਵਿੰਦਰ ਸਿੰੰਘ ਏਦਾਂ ਦੇ ਟੈੱਸਟ ਕਰਨ ਵਾਲਿਆਂ ਦਾ ਏਜੰਟ ਸੀ। ਉਹ ਇਥੋਂ ਭਰੂਣ ਲਿੰਗ ਜਾਂਚ ਕਰਵਾਉਣ ਲਈ ਗਾਹਕ ਲੈ ਕੇ ਜਾਂਦਾ ਸੀ। ਉਨ੍ਹਾਂ ਨੇ ਇਹ ਮਾਮਲਾ ਇੱਕ ਗਰਭਵਤੀ ਔਰਤ ਰਾਹੀਂ ਟਰੈਪ ਕੀਤਾ। ਔਰਤ ਕੁਲਵਿੰਦਰ ਸਿੰਘ ਨੂੰ ਮਿਲੀ ਤੇ ਤੈਅ ਪੈਸੇ ਦੇ ਕੇ ਕੁਲਵਿੰਦਰ ਸਿੰਘ ਨਾਲ ਪ੍ਰਾਈਵੇਟ ਗੱਡੀ ਉੱਤੇ ਭੇਜਿਆ ਗਿਆ ਤਾਂ ਪਿੰਡ ਜੜਤੌਲੀ ਦੇ ਖੇਤਾਂ ਵਿਚ ਬਣੇ ਘਰ ਵਿਚ ਗੁਰਪ੍ਰੀਤ ਸਿੰਘ ਤੇ ਉਸ ਦੀ ਪਤਨੀ ਅਮਨਦੀਪ ਕੌਰ ਨਾਜਾਇਜ਼ ਸੈਂਟਰ ਚਲਾਉਂਦੇ ਸਨ, ਜਿੱਥੇ ਜਤਿੰਦਰ ਨਾਂ ਦਾ ਡਾਕਟਰ ਟੈਸਟ ਕਰਦਾ ਸੀ। ਥਾਣਾ ਸਦਰ ਪੁਲਿਸ ਨੇ ਗੁਰਪ੍ਰੀਤ ਸਿੰਘ ਅਤੇ ਉਸ ਦੀ ਪਤਨੀ ਅਮਨਦੀਪ ਕੌਰ, ਏਜੰਟ ਕੁਲਵਿੰਦਰ ਸਿੰਘ ਤੇ ਡਾ. ਜਤਿੰਦਰ ਦੇ ਖ਼ਿਲਾਫ਼ ਕੇਸ ਦਰਜ ਕੀਤਾ ਅਤੇ ਕੁਲਵਿੰਦਰ ਸਿੰਘ ਤੋਂ ਪੁੱਛਗਿੱਛ ਕਰ ਰਹੀ ਹੈ। ਹੈਰਾਨੀ ਦੀ ਗੱਲ ਹੈ ਕਿ ਸਿਹਤ ਵਿਭਾਗ ਪੰਜਾਬ ਦੀ ਟੀਮ ਜ਼ਿਲ੍ਹਾ ਹੈਡਕੁਆਟਰ ਤੋਂ 30 ਕਿਲੋਮੀਟਰ ਦੂਰ ਪਿੰਡ ਜੜਤੌਲੀ ਵਿਚ ਚੱਲਦੇ ਧੰਦੇ ਦਾ ਪਤਾ ਨਹੀਂ ਲਾ ਸਕੀ ਤੇ 110 ਕਿਲੋਮੀਟਰ ਦੂਰੋਂ ਅੰਬਾਲਾ ਟੀਮ ਨੇ ਟਰੈਪ ਕਰ ਲਿਆ।