ਦੁਬਈ, 19 ਜਨਵਰੀ, (ਪੋਸਟ ਬਿਊਰੋ)- ਯਮਨ ਦੇ ਮਾਰਿਬ ਸੂਬੇ ਵਿੱਚ ਹਾਊਦੀ ਬਾਗੀਆਂ ਵੱਲੋਂ ਇਕ ਮਸਜਿਦ ਉੱਤੇ ਕੀਤੇ ਮਿਜ਼ਾਈਲ ਤੇ ਡਰੋਨ ਹਮਲੇ ਵਿੱਚ 83 ਫ਼ੌਜੀਆਂ ਦੀ ਮੌਤ ਹੋ ਗਈ ਤੇ 148 ਜ਼ਖ਼ਮੀ ਹੋ ਗਏ। ਹਮਲਾ ਸ਼ਨਿਚਰਵਾਰ ਓਦੋਂ ਕੀਤਾ ਗਿਆ, ਜਦੋਂ ਫ਼ੌਜੀ ਸ਼ਾਮ ਦੀ ਨਮਾਜ਼ ਅਦਾ ਕਰ ਰਹੇ ਸਨ।
ਇਕ ਮਹੀਨੇ ਦੀ ਸ਼ਾਂਤੀ ਪਿੱਛੋਂ ਹਾਊਦੀ ਬਾਗੀਆਂ ਨੇ ਇਹ ਹਮਲਾ ਕੀਤਾ ਹੈ। ਇਹ ਹਮਲਾ ਯਮਨ ਅਤੇ ਸਾਊਦੀ ਅਰਬ ਦੀਆਂ ਸਾਂਝੀਆਂ ਫ਼ੌਜਾਂ ਵੱਲੋਂ ਸਨਾ ਦੇ ਉੱਤਰੀ ਇਲਾਕੇ ਨਿਹਮ ਵਿਚ ਹਾਊਦੀ ਬਾਗੀਆਂ ਦੇ ਖ਼ਿਲਾਫ਼ ਕਾਰਵਾਈ ਦੇ ਇਕ ਦਿਨ ਬਾਅਦ ਕੀਤਾ ਗਿਆ ਹੈ। ਖ਼ਬਰ ਏਜੰਸੀ ਅਨੁਸਾਰ ਨਿਹਮ ਵਿਚ ਐਤਵਾਰ ਵੀ ਗੋਲ਼ੀਬਾਰੀ ਜਾਰੀ ਰਹੀ, ਜਿਸ ਵਿਚ ਦਰਜਨਾਂ ਹਾਊਦੀ ਬਾਗੀ ਮਾਰੇ ਗਏ ਦੱਸੇ ਜਾਂਦੇ ਹਨ।
ਯਮਨ ਦੇ ਰਾਸ਼ਟਰਪਤੀ ਆਬਿਦ ਰੱਬੂ ਮਨਸੂਰ ਨੇ ਇਸ ਹਮਲੇ ਦੀ ਨਿੰਦਾ ਕੀਤੀ ਅਤੇ ਕਿਹਾ ਕਿ ਬਾਗੀਆਂ ਦੇ ਹਮਲੇ ਨੇ ਸਾਬਤ ਕੀਤਾ ਹੈ ਕਿ ਉਹ ਦੇਸ਼ ਵਿਚ ਸ਼ਾਂਤੀ ਕਾਇਮ ਕਰਨ ਵਿਚ ਸਹਿਯੋਗ ਨਹੀਂ ਦੇਣਾ ਚਾਹੁੰਦੇ। ਉਹ ਮੌਤ ਤੇ ਤਬਾਹੀ ਬਿਨਾ ਕੁਝ ਨਹੀਂ ਜਾਣਦੇ। ਹਾਊਦੀ ਬਾਗੀਆਂ ਨੇ ਹਾਲੇ ਇਸ ਹਮਲੇ ਦੀ ਜ਼ਿੰਮੇਵਾਰੀ ਨਹੀਂ ਲਈ। 2014 ਦੇ ਅੰਤ ਵਿਚ ਬਾਗੀਆਂ ਨੇ ਯਮਨ ਦੀ ਰਾਜਧਾਨੀ ਸਨਾ ਸਮੇਤ ਦੇਸ਼ ਦੇ ਵੱਡੇ ਉੱਤਰੀ ਹਿੱਸੇ ਨੂੰ ਕਬਜ਼ੇ ਵਿਚ ਲੈ ਲਿਆ ਸੀ। ਇਸ ਦੇ ਬਾਅਦ ਖਾਨਾਜੰਗੀ ਸ਼ੁਰੂ ਹੋ ਗਈ ਤੇ ਓਦੋਂ ਤੋਂ ਅੰਤਰਰਾਸ਼ਟਰੀ ਬਰਾਦਰੀ ਵੱਲੋਂ ਮਾਨਤਾ ਪ੍ਰਾਪਤ ਯਮਨ ਸਰਕਾਰ ਦੇ ਫ਼ੌਜੀ ਸਾਊਦੀ ਅਰਬ ਦੀ ਅਗਵਾਈ ਵਾਲੇ ਫ਼ੌਜੀ ਗੱਠਜੋੜ ਨਾਲ ਮਿਲ ਕੇ ਬਾਗੀਆਂ ਨਾਲ ਲੜ ਰਹੇ ਹਨ।