ਬਠਿੰਡਾ, 18 ਜਨਵਰੀ (ਪੋਸਟ ਬਿਊਰੋ)- ਇਲਾਜ ਲਈ ਹਸਪਤਾਲ ਲਿਆਂਦੇ ਗਏ ਜ਼ਿੰਦਾ ਵਿਅਕਤੀ ਨੂੰ ਮ੍ਰਿਤਕ ਕਹਿ ਕੇ ਸਸਕਾਰ ਕਰਨ ਦੀ ਸਲਾਹ ਦੇਣ ਵਾਲੇ ਇਸ ਸ਼ਹਿਰ ਦੇ ਦਿੱਲੀ ਹਾਰਟ ਹਸਪਤਾਲ ਦੇ ਡਾਕਟਰ ਤੇ ਮੈਨੇਜਰ ਸਮੇਤ ਤਿੰਨ ਜਣਿਆਂ ਨੂੰ ਸੰਮਨ ਜਾਰੀ ਕੀਤੇ ਗਏ ਹਨ।
ਇਸ ਬਾਰੇ ਗੌਰਵ ਗੋਇਲ ਵਾਸੀ ਬਠਿੰਡਾ ਨੇ ਅਦਾਲਤ ਵਿੱਚ ਦਾਇਰ ਕੀਤੇ ਕੇਸ 'ਚ ਦੱਸਿਆ ਕਿ ਉਸ ਦੇ ਪਿਤਾ ਸੱਤਪਾਲ ਸਿੰਘ ਦੀ 10 ਫਰਵਰੀ 2017 ਨੂੰ ਅਚਾਨਕ ਸਿਹਤ ਖਰਾਬ ਹੋ ਗਈ ਤਾਂ ਉਨ੍ਹਾਂ ਨੂੰ ਇਲਾਜ ਲਈ ਗੋਨਿਆਣਾ ਰੋਡ ਦੇ ਦਿੱਲੀ ਹਾਰਟ ਹਸਪਤਾਲ 'ਚ ਲਿਜਾਇਆ ਗਿਆ। ਉਸ ਨੇ ਦੱਸਿਆ ਕਿ ਹਾਲੇ ਉਨ੍ਹਾਂ ਦੇ ਪਿਤਾ ਗੱਡੀ ਵਿੱਚ ਹੀ ਸਨ ਕਿ ਹਸਪਤਾਲ ਦੇ ਡਾਕਟਰ ਕੇ ਐਸ ਬਾਂਸਲ ਨੇ ਚੈਕਅੱਪ ਕਰਕੇ ਦੱਸਿਆ ਕਿ ਉਨ੍ਹਾਂ ਦੀ ਮੌਤ ਹੋ ਚੁੱਕੀ ਹੈ ਅਤੇ ਸਸਕਾਰ ਕਰਨ ਦੀ ਸਲਾਹ ਦੇ ਦਿੱਤੀ। ਪੀੜਤ ਨੇ ਦੱਸਿਆ ਕਿ ਅਜਿਹਾ ਗੱਲ ਸੁਣ ਕੇ ਉਹ ਆਪਣੇ ਪਿਤਾ ਨੂੰ ਦਿੱਲੀ ਹਸਪਤਾਲ ਦੇ ਸਾਹਮਣੇ ਡਾ. ਗੁਰਸ਼ਰਨ ਸਿੰਘ ਦੇ ਹਸਪਤਾਲ ਲੈ ਗਏ, ਜਿੱਥੇ ਹਸਪਤਾਲ ਦੇ ਕੰਪਾਊਡਰ ਨੇ ਚੈਕ ਕਰ ਕੇ ਕਿਹਾ ਕਿ ਉਸ ਦੇ ਪਿਤਾ ਦੀ ਪਲਸ ਅਤੇ ਬੀ ਪੀ ਬਿਲਕੁਲ ਠੀਕ ਹੈ, ਇਸ ਲਈ ਉਹ ਮਰੀਜ਼ ਨੂੰ ਇਲਾਜ ਲਈ ਗਲੋਬਲ ਹਸਪਤਾਲ ਲੈ ਜਾਣ। ਪੀੜਤ ਨੇ ਦੱਸਿਆ ਕਿ ਉਥੋਂ ਉਹ ਆਪਣੇ ਪਿਤਾ ਨੂੰ ਗਲੋਬਲ ਹਸਪਤਾਲ ਲੈ ਗਏ, ਜਿੱਥੇੇ ਡਾਕਟਰਾਂ ਨੇ ਇਲਾਜ ਸ਼ੁਰੂ ਕੀਤਾ। ਕਰੀਬ ਦੋ ਘੰਟਿਆਂ ਬਾਅਦ ਉਸ ਦੇ ਪਿਤਾ ਨੂੰ ਹੋਸ਼ ਆ ਗਈ। ਇਸਦਾ ਪਤਾ ਜਦੋਂ ਦਿੱਲੀ ਹਸਪਤਾਲ ਦੇ ਪ੍ਰਬੰਧਕਾਂ ਨੂੰ ਲੱਗਾ ਤਾਂ ਉਹ ਘਬਰਾਹਟ ਵਿੱਚ ਆ ਗਏ ਤੇ ਆਪਣੇ ਹਸਪਤਾਲ ਦੀ ਬਦਨਾਮੀ ਤੋਂ ਹੁੰਦੀ ਦੇਖ ਕੇ ਡਾ. ਕੇ ਐਲ ਬਾਂਸਲ, ਡਾ. ਸਤਵਿੰਦਰ ਸਿੰਘ ਭੁੱਲਰ ਅਤੇ ਦਿੱਲੀ ਹਸਪਤਾਲ ਦਾ ਮੈਨੇਜਰ ਸੰਦੀਪ ਪਰਚੰਦਾ ਗਲੋਬਲ ਹਸਪਤਾਲ ਪੁੱਜ ਗਏ ਅਤੇ ਡਾਕਟਰਾਂ ਉੱਤੇ ਮਰੀਜ਼ ਦਾ ਇਲਾਜ ਨਾ ਕਰਨ ਦਾ ਦਬਾਅ ਪਾਇਆ। ਪੀੜਤ ਨੇ ਦੱਸਿਆ ਕਿ ਇਸ ਮਾਮਲੇ ਵਿੱਚ ਡਾਕਟਰ ਸਮੇਤ ਦੂਜੇ ਵਿਅਕਤੀਆਂ ਦੀ ਨੀਤ ਸਹੀ ਨਹੀਂ ਸੀ। ਉਸ ਨੇ ਅਦਾਲਤ ਨੂੰ ਦੱਸਿਆ ਕਿ ਉਨ੍ਹਾਂ ਸੀ ਸੀ ਟੀ ਵੀ ਕੈਮਰਿਆਂ ਦੀ ਫੁਟੇਜ ਤੇ ਸਾਰੇ ਸਬੂਤਾਂ ਸਮੇਤ ਜਿ਼ਲਾ ਪੁਲਸ ਮੁਖੀ ਤੋਂ ਡੀ ਜੀ ਪੀ ਤੱਕ ਸ਼ਿਕਾਇਤ ਕੀਤੀ ਸੀ ਪਰ ਪੁਲਸ ਨੇ ਸਿਆਸੀ ਦਬਾਅ ਦੇ ਕਾਰਨ ਇਸ ਬਾਰੇ ਕਾਰਵਾਈ ਨਹੀਂ ਕੀਤੀ। ਪੀੜਤ ਗੌਰਵ ਗੋੋਇਲ ਦੀ ਸ਼ਿਕਾਇਤ ਉਤੇ ਕਾਰਵਾਈ ਕਰਦਿਆਂ ਚੀਫ਼ ਜ਼ੁਡੀਸ਼ਲ ਮੈਜਿਸਟ੍ਰੇਟ ਫਸਟ ਕਲਾਸ ਵਿਜੇ ਸਿੰਘ ਡਡਵਾਲ ਨੇ ਡਾ. ਸਤਵਿੰਦਰ ਭੁੱਲਰ ਤੇ ਮੈਨੇਜਰ ਸੰਦੀਪ ਪਰਚੰਦਾ ਨੂੰ ਸੰਮਨ ਜਾਰੀ ਕਰ ਕੇ ਇਸ ਕੇਸ ਦੀ ਸੁਣਵਾਈ 12 ਫਰਵਰੀ ਨੂੰ ਨਿਰਧਾਰਤ ਕੀਤੀ ਹੈ। ਇਸ ਬਾਰੇ ਦਿੱਲੀ ਹਸਪਤਾਲ ਦੇ ਮੈਨੇਜਰ ਸੰਦੀਪ ਪਰਚੰਦਾ ਦਾ ਕਹਿਣਾ ਹੈ ਕਿ ਉਨ੍ਹਾਂ 'ਤੇ ਲਾਏ ਗਏ ਦੋਸ਼ ਝੁੂਠੇ ਹਨ।