ਬਠਿੰਡਾ, 15 ਜਨਵਰੀ, (ਪੋਸਟ ਬਿਊਰੋ)- ਪਿਛਲੀਆਂ ਵਿਧਾਨ ਸਭਾ ਚੋਣਾਂ ਦੌਰਾਨ ਮੌੜ ਮੰਡੀ ਵਿੱਚ ਹੋਏ ਬੰਬ ਧਮਾਕੇ ਦੇ ਕੇਸ ਵਿੱਚ ਨਵੇਂ ਭੇਦ ਖੁੱਲ੍ਹੇ ਹਨ ਤੇ ਹਰਿਆਣਾ ਦੇ ਕੁਰੂਕਸ਼ੇਤਰ ਜ਼ਿਲ੍ਹੇ ਦੇ ਪਿੰਡ ਭੈਂਸੀ ਮਾਜਰਾ ਦਾ ਅਵਤਾਰ ਸਿੰਘ, ਜਿਹੜਾ ਲੰਬੇ ਸਮੇਂ ਤੋਂ ਡੇਰਾ ਪ੍ਰੇਮੀ ਹੈ, ਕਾਫੀ ਚਿਰ ਤੋਂ ਡੇਰੇ ਵਿਚ ਰਹਿੰਦਾ ਹੈ ਤੇ ਡੇਰਾ ਸੱਚਾ ਸੌਦਾ ਸਿਰਸਾ ਦੇ ਮੁਖੀ ਗੁਰਮੀਤ ਰਾਮ ਰਹੀਮ ਦੇ ਕਰੀਬੀਆਂ ਵਿੱਚ ਸ਼ਾਮਲ ਹੈ, ਉਹ ਪੁਆੜੇ ਦੀ ਜੜ੍ਹ ਨਿਕਲਿਆ ਹੈ। ਉਸ ਉੱਤੇ ਦੋਸ਼ ਹੈ ਕਿ ਮੌੜ ਮੰਡੀ ਬੰਬ ਧਮਾਕੇ ਵਿੱਚ ਵਰਤੀ ਗਈ ਕਾਰ ਵਿਚ ਬੰਬ ਉਸ ਨੇ ਲਾਇਆ ਸੀ।
ਇਸ ਸੰਬੰਧ ਵਿੱਚ ਮੌੜ ਬੰਬ ਧਮਾਕੇ ਦੇ ਪੀੜਤ ਲੋਕਾਂ ਨੇ ਦੋਸ਼ ਲਾਇਆ ਹੈ ਕਿ ਅਵਤਾਰ ਸਿੰਘ ਡੇਰਾ ਸਿਰਸਾ ਦੇ ਮੁਖੀ ਗੁਰਮੀਤ ਰਾਮ ਰਹੀਮ ਦੇ ਨੇੜੂਆਂ ਵਿੱਚੋਂ ਹੈ ਅਤੇ ਇਸ ਧਮਾਕੇ ਵਿੱਚ ਡੇਰਾ ਸਿਰਸਾ ਦੇ ਬੰਦੇ ਸ਼ਾਮਲ ਸਨ, ਕਿਉਂਕਿ ਡੇਰੇ ਵਾਲੀ ਵੀ ਆਈ ਪੀ ਵਰਕਸ਼ਾਪ ਵਿੱਚ ਬੰਬ ਵਾਲੀ ਕਾਰ ਨੂੰ ਨਵੀਂ ਸ਼ਕਲ ਦਿੱਤੀ ਗਈ ਅਤੇ ਅਵਤਾਰ ਸਿੰਘ ਨੇ ਕਾਰ ਵਿੱਚ ਬੰਬ ਫਿੱਟ ਕੀਤਾ ਸੀ। ਪੀੜਤਾਂ ਨੇ ਡੇਰਾ ਮੁਖੀ ਨਾਲ ਕੰਮ ਕਰ ਰਹੇ ਅਵਤਾਰ ਸਿੰਘ ਦੇ ਕੁਝ ਫੋਟੋ ਵਿਖਾਏ ਹਨ। ਮੌੜ ਮੰਡੀ ਧਮਾਕੇ ਦੀ ਜਾਂਚ ਲਈ ਪੰਜਾਬ ਸਰਕਾਰ ਨੇ ਦੋ ਸਾਲ ਪਹਿਲਾਂ ਡੀ ਆਈ ਜੀ ਰਣਬੀਰ ਸਿੰਘ ਖੱਟੜਾ ਦੀ ਅਗਵਾਈ ਹੇਠ ਵਿਸ਼ੇਸ਼ ਜਾਂਚ ਟੀਮ ਬਣਾਈ ਸੀ, ਜਿਸ ਨੇ ਧਮਾਕੇ ਵਿੱਚ ਵਰਤੀ ਗਈ ਮਾਰੂਤੀ ਕਾਰ ਬਣਾਉਣ ਦੀ ਮਦਦ ਕਰ ਚੁੱਕੇ ਗਵਾਹ ਪੂਰੀ ਜਾਂਚ ਤੋਂ ਬਾਅਦ ਫਰਵਰੀ 2018 ਵਿੱਚ ਤਲਵੰਡੀ ਸਾਬੋ ਅਦਾਲਤ ਵਿੱਚ ਪੇਸ਼ ਕੀਤੇ ਸਨ ਤੇ ਇਨ੍ਹਾਂ ਨੇ ਕੋਰਟ ਵਿੱਚ ਪੇਸ਼ ਹੋ ਕੇ ਧਾਰਾ 164 ਸੀ ਆਰ ਪੀ ਸੀ ਹੇਠ ਬਿਆਨ ਲਿਖਵਾਏ ਸਨ। ਗਵਾਹਾਂ ਨੇ ਕਿਹਾ ਸੀ ਕਿ ਡੇਰਾ ਸੱਚਾ ਸੌਦਾ ਸਿਰਸਾ ਦੀ ਵੀ ਆਈ ਪੀ ਵਰਕਸ਼ਾਪ ਦੇ ਮੁਖੀ ਗੁਰਤੇਜ ਕਾਲਾ ਦੇ ਕਹਿਣ ਉੱਤੇ ਉਨ੍ਹਾਂ ਇਹ ਕਾਰ ਤਿਆਰ ਕੀਤੀ ਤੇ ਕਾਰ ਵਿੱਚ ਬੰਬ ਕੁਰੂਕਸ਼ੇਤਰ ਦੇ ਪਿੰਡ ਭੈਂਸੀ ਮਾਜਰਾ ਦੇ ਅਵਤਾਰ ਸਿੰਘ ਨੇ ਲਾਇਆ ਸੀ। ਕੋਰਟ ਦੇ ਕਹੇ ਉੱਤੇ ਪੰਜਾਬ ਪੁਲਸ ਦੇ ਮੁਖੀ (ਡੀ ਜੀ ਪੀ) ਨੇ ਬੀਤੀ 25 ਅਕਤੂਬਰ ਨੂੰ ਇਸ ਦੀ ਜਾਂਚ ਲਈ ਡੀ ਜੀ ਪੀ (ਲਾਅ ਐਂਡ ਆਰਡਰ) ਈਸ਼ਵਰ ਸਿੰਘ ਦੀ ਅਗਵਾਈ ਹੇਠ ਨਵੀਂ ਐੱਸ ਆਈ ਟੀ ਬਣਾ ਦਿੱਤੀ ਸੀ, ਜਿਹੜੀ ਨਵੇਂ ਸਿਰਿਓਂ ਜਾਂਚ ਕਰ ਰਹੀ ਹੈ।
ਪਿਛਲੀਆਂ ਵਿਧਾਨ ਸਭਾ ਚੋਣਾਂ ਵੇਲੇ 31 ਜਨਵਰੀ 2017 ਨੂੰ ਮੌੜ ਮੰਡੀ ਵਿੱਚ ਕਾਂਗਰਸ ਦੇ ਉਮੀਦਵਾਰ ਤੇ ਡੇਰਾ ਸਿਰਸਾ ਦੇ ਮੁਖੀ ਗੁਰਮੀਤ ਰਾਮ ਰਹੀਮ ਦੇ ਕੁੜਮ ਹਰਮੰਦਰ ਸਿੰਘ ਜੱਸੀ ਦੀ ਚੋਣ ਰੈਲੀ ਵਿੱਚ ਹੋਏ ਧਮਾਕੇ ਵਿੱਚ ਪੰਜ ਬੱਚਿਆਂ ਸਮੇਤ ਸੱਤ ਲੋਕਾਂ ਦੀ ਮੌਤ ਹੋ ਗਈ ਸੀ।