ਜਲੰਧਰ, 13 ਜਨਵਰੀ (ਪੋਸਟ ਬਿਊਰੋ)- ਭਾਰੀ ਬਰਸਾਤ, ਕੜਕਦੀ ਬਿਜਲੀ ਤੇ ਲੋ ਵਿਜ਼ਿਬਿਲਟੀ ਕਾਰਨ ਲੋਹੜੀ ਵਾਲੇ ਦਿਨ ਦਿੱਲੀ ਤੋਂ ਆਈ ਫਲਾਈਟ ਏਅਰਪੋਰਟ ਤੱਕ ਪਹੁੰਚਣ ਦੇ ਬਾਵਜੂਦ ਲੈਂਡ ਨਹੀਂ ਕਰ ਸਕੀ ਤੇ ਦਿੱਲੀ ਪਰਤ ਗਈ। ਇਸ ਨਾਲ ਸਵਾਰੀਆਂ ਨੂੰ ਭਾਰੀ ਪਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪਿਆ।
ਵਰਨਣ ਯੋਗ ਹੈ ਕਿ ਅੱਜ ਆਦਮਪੁਰ ਵਿਚ ਬਾਰਸ਼ ਅਤੇ ਖ਼ਰਾਬ ਮੌਸਮ ਦੀ ਹਾਲਤ ਸਵੇਰੇ ਤੋਂ ਸੀ। ਪਤਾ ਲੱਗਾ ਹੈ ਕਿ ਫਲਾਈਟ ਦੀ ਲੈਂਡਿੰਗ ਤੋਂ ਪਹਿਲਾਂ ਇਕਦਮ ਮੀਂਹ ਤੇਜ਼ ਹੋ ਗਿਆ, ਜਿਸ ਕਾਰਨ ਰੰਨਵੇ ਦੀ ਵਿਜ਼ਿਬਿਲਟੀ ਵੀ ਘੱਟ ਹੋ ਗਈ। ਇਸ ਦੌਰਾਨ ਬਿਜਲੀ ਵੀ ਕੜਕਦੀ ਰਹਿਣ ਕਾਰਨ ਜਹਾਜ਼ ਲੈਂਡ ਨਾ ਕਰ ਸਕਿਆ ਅਤੇ ਉਸ ਨੂੰ ਦਿੱਲੀ ਨੂੰ ਮੁੜਨਾ ਪਿਆ। ਇਸ ਨਾਲ ਨਾ ਸਿਰਫ ਜਲੰਧਰ ਆਉਣ ਵਾਲੇ, ਸਗੋਂ ਏਥੋਂ ਦਿੱਲੀ ਜਾ ਰਹੇ ਯਾਤਰੀਆਂ ਨੂੰ ਵੀ ਨਿਰਾਸ਼ ਹੋ ਕੇ ਮੁੜਨਾ ਪਿਆ। ਜਾਣ ਵਾਲੇ ਮੁਸਾਫਰ ਫਲਾਈਟ ਦੇ ਲਗਪਗ ਸਮੇਂ ਉੱਤੇ ਆਉਣ ਕਾਰਨ ਆਦਮਪੁਰ ਏਅਰਪੋਰਟ ਪਹੁੰਚ ਚੁੱਕੇ ਸਨ। ਫਲਾਈਟ ਲੈਂਡ ਨਾ ਹੋਣ ਕਾਰਨ ਆਦਮਪੁਰ ਦਿੱਲੀ ਫਲਾਈਟ ਵੀ ਕੈਂਸਲ ਹੋ ਗਈ।