ਲਾਹੌਰ, 11 ਜਨਵਰੀ (ਪੋਸਟ ਬਿਊਰੋ)- ਪਾਕਿਸਤਾਨ ਦੇ ਸੂਬਾ ਖ਼ੈਬਰ ਪਖਤੂਨਖਵਾ ਦੇ ਪਿਸ਼ਾਵਰ ਸ਼ਹਿਰ ਵਿੱਚ ਸਿੱਖ ਪੱਤਰਕਾਰ ਹਰਮੀਤ ਸਿੰਘ ਦੇ ਛੋਟੇ ਭਰਾ ਪਰਵਿੰਦਰ ਸਿੰਘ (24) ਪੁੱਤਰ ਗੌਤਮ ਰਾਮ ਦੀ ਪੇਸ਼ੇਵਾਰ ਕਾਤਲਾਂ ਤੋਂ ਹੱਤਿਆ ਕਰਾਉਣ ਵਾਲੀ ਉਸ ਦੀ ਮੰਗੇਤਰ ਨੂੰ ਪੁਲਸ ਨੇ ਗ੍ਰਿਫ਼ਤਾਰ ਕਰ ਲਿਆ ਹੈ।
ਇਸੇ ਹਫ਼ਤੇ ਪੰਜ ਜਨਵਰੀ ਨੂੰ ਕੁਝ ਅਣਪਛਾਤੇ ਬੰਦਿਆਂ ਨੇ ਗੋਲੀ ਮਾਰ ਕੇ ਸ਼ਾਂਗਲਾ ਵਾਸੀ ਪਰਵਿੰਦਰ ਸਿੰਘ ਦੀ ਹੱਤਿਆ ਕਰ ਦਿੱਤੀ ਸੀ। ਹਰਮੀਤ ਸਿੰਘ ਨੇ ਦੱਸਿਆ ਕਿ ਉਸ ਦੇ ਛੋਟਾ ਭਰਾ ਪਰਵਿੰਦਰ ਸਿੰਘ, ਜਿਹੜਾ ਮਲੇਸ਼ੀਆ 'ਚ ਕਾਰੋਬਾਰ ਕਰਦਾ ਸੀ, ਦਾ ਇਸੇ ਹਫ਼ਤੇ ਵਿਆਹ ਤੈਅ ਕੀਤਾ ਗਿਆ ਸੀ। ਹਰਮੀਤ ਸਿੰਘ ਇਸ ਸਮੇਂ ਪਾਕਿ ਪਬਲਿਕ ਨਿਊਜ਼ ਚੈਨਲ ਲਈ ਪੱਤਰਕਾਰ ਅਤੇੇ ਐਂਕਰ ਵਜੋਂ ਸੇਵਾਵਾਂ ਦੇ ਰਿਹਾ ਹੈ।
ਪਿਸ਼ਾਵਰ ਪੁਲਸ ਨੇ ਪਰਵਿੰਦਰ ਸਿੰਘ ਦੇ ਕਾਤਲਾਂ ਨੂੰ ਗ੍ਰਿਫ਼ਤਾਰ ਕਰਨ ਪਿੱਛੋਂ ਦੱਸਿਆ ਕਿ ਜ਼ਿਲ੍ਹਾ ਮਰਦਾਨ ਦੀ ਵਸਨੀਕ ਜਿਸ ਪ੍ਰੇਮ ਕੁਮਾਰੀ ਨਾਂਅ ਦੀ ਲੜਕੀ ਨਾਲ ਮ੍ਰਿਤਕ ਦੀ ਮੰਗਣੀ ਹੋਈ ਸੀ, ਉਹ ਇਸ ਰਿਸ਼ਤੇ ਤੋਂ ਖੁਸ਼ ਨਹੀਂ ਸੀ। ਇਸ ਕਾਰਨ ਸਾਜ਼ਿਸ਼ ਮੁਤਾਬਕ ਪ੍ਰੇਮ ਕੁਮਾਰੀ ਨੇ ਪਰਵਿੰਦਰ ਨੂੰ ਆਪਣੀ ਸਹੇਲੀ ਨੂੰ ਮਿਲਾਉਣ ਦੇ ਬਹਾਨੇ ਮਰਦਾਨ ਸ਼ਹਿਰ ਬੁਲਾਇਆ ਅਤੇ ਉਥੇ ਪਹੁੰਚਣ ਉੱਤੇ ਉਸ ਨੂੰ ਤਿੰਨ ਪੇਸ਼ੇਵਾਰ ਕਾਤਲਾਂ ਨੇ ਅਗਵਾ ਕਰਕੇ ਉਸਦੀ ਸਹੇਲੀ ਦੇ ਘਰ ਰੱਖਿਆ ਸੀ, ਜਿੱਥੇ ਉਸ ਦੀ ਗੋਲੀਆਂ ਮਾਰ ਕੇ ਹੱਤਿਆ ਕਰ ਦਿੱਤੀ ਗਈ। ਪੁਲਸ ਮੁੁਤਾਬਕ ਪ੍ਰੇਮ ਕੁਮਾਰੀ ਨੇ ਇਸ ਵਾਰਦਾਤ ਲਈ ਕਾਤਲਾਂ ਨੂੰ ਸੱਤ ਲੱਖ ਰੁਪਏ ਦਿੱਤੇ ਸਨ। ਇਹ ਪੈਸੇ ਪਰਵਿੰਦਰ ਸਿੰਘ ਨੇ ਹੀ ਵੱਖ-ਵੱਖ ਸਮੇਂ ਆਪਣੀ ਮੰਗੇਤਰ ਦੇ ਮੰਗਣ 'ਤੇ ਭੇਜੇ ਸਨ। ਦੱਸਿਆ ਜਾਂਦਾ ਹੈ ਕਿ ਇਸ ਕਤਲ ਬਾਰੇ ਪੁਲਸ ਅਤੇ ਮ੍ਰਿਤਕ ਦੇ ਪਰਵਾਰ 'ਚ ਭੁਲੇਖਾ ਖੜ੍ਹਾ ਕਰਨ ਲਈ ਲਾਸ਼ ਨੂੰ ਇੱਕ ਕਾਰ 'ਚ ਰੱਖ ਕੇ ਪਿਸ਼ਵਾਰ ਦੇ ਚਮਕਣੀ ਥਾਣੇ ਦੇ ਇਲਾਕੇ 'ਚ ਲਿਆਂਦਾ ਗਿਆ ਤੇ ਪਰਵਿੰਦਰ ਦੇ ਮੋਬਾਈਲ ਤੋਂ ਹਰਮੀਤ ਸਿੰਘ ਨੂੰ ਉਸ ਦੇ ਭਰਾ ਦਾ ਕਤਲ ਕਰਨ ਬਾਰੇ ਦੱਸਿਆ ਗਿਆ। ਪ੍ਰੇਮ ਕੁਮਾਰੀ ਨੇ ਪੁਲਸ ਨੂੰ ਆਪਣੀ ਉਸ ਸਹੇਲੀ ਬਾਰੇ ਵੀ ਦੱਸ ਦਿੱਤਾ ਹੈ, ਜਿਸ ਨੂੰ ਮਿਲਾਉਣ ਦੇ ਬਹਾਨੇ ਉਸ ਨੇ ਪਰਵਿੰਦਰ ਸਿੰਘ ਨੂੰ ਬੁਲਾਇਆ ਸੀ।