ਨਿਊ ਯੌਰਕ, 6 ਜਨਵਰੀ (ਪੋਸਟ ਬਿਊਰੋ) : ਮਰਸਡੀਜ਼ ਬੈਂਜ਼ ਵੱਲੋਂ ਅੰਦਾਜ਼ਨ 750,000 ਕਾਰਾਂ ਵਾਪਿਸ ਮੰਗਵਾਈਆਂ ਜਾ ਰਹੀਆਂ ਹਨ ਕਿਉਂਕਿ ਇਨ੍ਹਾਂ ਗੱਡੀਆਂ ਦੀ ਸਨਰੂਫ ਵੱਖ ਹੋ ਕੇ ਹਵਾ ਵਿੱਚ ਉੱਡ ਸਕਦੀ ਹੈ ਤੇ ਜਿਸ ਕਾਰਨ ਕੋਈ ਵੀ ਹਾਦਸਾ ਹੋ ਸਕਦਾ ਹੈ।
ਇਨ੍ਹਾਂ ਕਾਰਾਂ ਵਿਚ ਮਰਸਡੀਜ਼ ਬੈਂਜ਼ ਦੀਆਂ ਸੀ-ਕਲਾਸ, ਈ-ਕਲਾਸ, ਸੀਐਲਕੇ-ਕਲਾਸ ਤੇ ਸੀਐਲਐਸ-ਕਲਾਸ ਸ਼ਾਮਲ ਹਨ, ਜਿਨ੍ਹਾਂ ਦਾ ਨਿਰਮਾਣ 2001 ਤੋਂ 2011 ਦਰਮਿਆਨ ਹੋਇਆ। ਇਹ ਚਾਰੇ ਗੱਡੀਆਂ ਆਪਸ਼ਨਲ ਸਨਰੂਫ ਨਾਲ ਆਉਂਦੀਆਂ ਹਨ। ਨੈਸ਼ਨਲ ਹਾਈਵੇਅ ਟਰੈਫਿਕ ਸੇਫਟੀ ਐਡਮਨਿਸਟ੍ਰੇਸ਼ਨ ਅਨੁਸਾਰ ਇਨ੍ਹਾਂ ਸਨਰੂਫਜ਼ ਨੂੰ ਗੱਡੀਆਂ ਨਾਲ ਜੋੜੀ ਰੱਖਣ ਵਾਲੇ ਮਟੀਰੀਅਲ ਵਿੱਚ ਕੋਈ ਗੜਬੜੀ ਹੋਣ ਕਾਰਨ ਇਹ ਕਾਰ ਨਾਲੋਂ ਵੱਖ ਹੋ ਸਕਦੀਆਂ ਹਨ ਤੇ ਹਾਦਸਿਆਂ ਨੂੰ ਸੱਦਾ ਦੇ ਸਕਦੀਆਂ ਹਨ।
ਇਨ੍ਹਾਂ ਗੱਡੀਆਂ ਦੇ ਜਿਹੜੇ ਮਾਲਕਾਂ ਨੂੰ ਇਸ ਤਰ੍ਹਾਂ ਦੀ ਦਿੱਕਤ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ ਉਨ੍ਹਾਂ ਨਾਲ 14 ਫਰਵਰੀ ਨੂੰ ਜਾਂ ਇਸ ਤੋਂ ਬਾਅਦ ਮਰਸਡੀਜ਼ ਵਲੋਂ ਸੰਪਰਕ ਕੀਤਾ ਜਾਵੇਗਾ ਤੇ ਸਨਰੂਫਜ਼ ਦੀ ਜਾਂਚ ਕੀਤੀ ਜਾਵੇਗੀ। ਲੋੜ ਪੈਣ ਉੱਤੇ ਉਨ੍ਹਾਂ ਨੂੰ ਬਿਨਾਂ ਕਿਸੇ ਚਾਰਜ ਦੇ ਬਦਲ ਦਿੱਤਾ ਜਾਵੇਗਾ।