ਨਵੀਂ ਦਿੱਲੀ, 15 ਦਸੰਬਰ, (ਪੋਸਟ ਬਿਊਰੋ)- ਭਾਰਤ ਸਰਕਾਰ ਵੱਲੋਂ ਨਾਗਰਿਕਤਾ ਸੋਧ ਕਾਨੂੰਨ (ਸੀ ਏ ਏ) ਦੇ ਵਿਰੋਧ ਵਿੱਚ ਪ੍ਰਦਰਸ਼ਨ ਦੇ ਹਿੰਸਕ ਰੂਪ ਧਾਰਨ ਕਰਨ ਵਾਲੀ ਅੱਗਅਸਾਮ ਤੋਂ ਸ਼ੁਰੂ ਹੋਈ ਤੇ ਪੱਛਮੀ ਬੰਗਾਲ ਤੋਂ ਬਾਅਦ ਉੱਤਰ ਪ੍ਰਦੇਸ਼ ਦੇ ਕੁਝ ਹਿੱਸਿਆਂ ਵਿੱਚ ਫੈਲਣ ਦੇ ਬਾਅਦ ਰਾਜਧਾਨੀ ਦਿੱਲੀ ਤੱਕ ਆ ਪਹੁੰਚੀ ਹੈ। ਅੱਜ ਐਤਵਾਰ ਨੂੰ ਦੱਖਣੀ ਦਿੱਲੀ ਵਿਚ ਭੜਕੇ ਹੋਏ ਲੋਕਾਂ ਨੇ ਕਈ ਬੱਸਾਂ ਫੂਕ ਦਿੱਤੀਆਂ ਤੇ ਪੁਲਿਸ ਟੀਮਾਂ ਉੱਤੇ ਹਮਲਾ ਕੀਤਾ। ਇਸ ਹੰਗਾਮੇ ਪਿੱਛੋਂ ਇਲਾਕੇ ਵਿਚ ਮੈਟਰੋ ਦੇ ਚਾਰ ਸਟੇਸ਼ਨਾਂ ਨੂੰ ਵੀ ਬੰਦ ਕਰਨਾ ਪਿਆ ਹੈ।
ਨਾਗਰਿਕਤਾ ਸੋਧ ਬਿੱਲ, ਜਿਹੜਾ ਰਾਸ਼ਟਰਪਤੀ ਦੀ ਮਨਜ਼ੂਰੀ ਪਿੱਛੋਂ ਨਾਗਰਿਕਤਾ ਸੋਧ ਕਾਨੂੰਨ (ਸੀ ਏ ਏ) ਵਾਲਾ ਦਰਜਾ ਲੈ ਚੁੱਕਾ ਹੈ, ਦੇ ਵਿਰੁੱਧ ਅੱਜ ਦਿੱਲੀ ਦੀ ਜਾਮੀਆ ਮਿਲੀਆ ਇਸਲਾਮੀਆ ਦੇ ਵਿਦਿਆਰਥੀਆਂ ਦੇ ਪ੍ਰਦਰਸ਼ਨ ਵਿਚ ਸਥਾਨਕ ਲੋਕਾਂ ਦੇ ਸ਼ਾਮਲ ਹੋਣ ਨਾਲ ਦੱਖਣੀ ਦਿੱਲੀ ਦੇ ਹਾਲਾਤ ਵਿਗੜ ਗਏ। ਹੁੱਲੜਬਾਜ਼ਾਂ ਨੇ ਦਿੱਲੀ-ਨੋਇਡਾ ਰੋਡ ਅਤੇ ਮਥੁਰਾ ਰੋਡ ਨੂੰ ਸਾਰਾ ਦਿਨ ਠੱਪ ਰੱਖਿਆ ਅਤੇ ਸ਼ਾਮ ਕਰੀਬ ਪੰਜ ਵਜੇ ਮਥੁਰਾ ਰੋਡ ਉੱਤੇ ਸੂਰਿਆ ਹੋਟਲ ਅੱਗੇ ਚਾਰ ਬੱਸਾਂ ਤੋਂ ਇਲਾਵਾ ਬਟਲਾ ਹਾਊਸ ਮੁੱਖ ਚੌਕ ਉੱਤੇ ਬਣੀ ਪੁਲਿਸ ਚੌਕੀ ਨੂੰਅੱਗ ਲਾ ਦਿੱਤੀ ਤੇ ਕਈ ਮੋਟਰਸਾਈਕਲਾਂ ਨੂੰ ਫੂਕ ਦਿੱਤਾ ਗਿਆ। ਇਸਦੌਰਾਨ ਕਈ ਰਾਹਗੀਰ ਤੇ ਪੁਲਿਸ ਵਾਲੇ ਜ਼ਖ਼ਮੀ ਹੋ ਗਏ। ਦੋ ਫਾਇਰ ਬ੍ਰਿਗੇਡ ਮੁਲਾਜ਼ਮ ਵੀ ਭੀੜ ਦੇ ਹਮਲੇ ਵਿੱਚਜ਼ਖ਼ਮੀ ਹੋਏ ਹਨ। ਭੀੜ ਨੂੰ ਪੁਲਿਸ ਨੇ ਲਾਠੀਚਾਰਜ ਕਰ ਕੇ ਖਦੇੜ ਦਿੱਤਾ। ਜਾਮੀਆ ਮਿਲੀਆ ਇਸਲਾਮੀਆ ਦੇ ਪ੍ਰਸ਼ਾਸਨ ਨੇ ਏਦਾਂ ਦੇ ਹਿੰਸਕ ਪ੍ਰਦਰਸ਼ਨ ਵਿਚ ਆਪਣੇ ਵਿਦਿਆਰਥੀਆਂ ਦੇ ਸ਼ਾਮਲ ਹੋਣ ਤੋਂ ਇਨਕਾਰ ਕੀਤਾ ਹੈ।