ਕਪੂਰਥਲਾ, 5 ਦਸੰਬਰ (ਪੋਸਟ ਬਿਊਰੋ)- ਆਪਣੀ ਇਮਾਨਦਾਰੀ ਅਤੇ ਬਹਾਦਰੀ ਨਾਲ ਅਮਰੀਕਾ ਵਿੱਚ ਦੇਸ਼ ਦਾ ਨਾਂਅ ਰੋਸ਼ਨ ਕਰਨ ਵਾਲੇ ਕਪੂਰਥਲਾ ਦੇ ਪਿੰਡ ਧਾਲੀਵਾਲ ਬੇਟ ਦੇ ਸੰਦੀਪ ਸਿੰਘ ਧਾਲੀਵਾਲ ਨੂੰ ਇਥੇ ਆਪਣਿਆਂ ਤੋਂ ਧੋਖਾ ਮਿਲ ਰਿਹਾ ਹੈ। ਅਮਰੀਕਾ ਦੇ ਸੀਨੀਅਰ ਪੁਲਸ ਅਧਿਕਾਰੀ ਰਹੇ ਸੰਦੀਪ ਸਿੰਘ ਦੀ ਹੱਤਿਆ ਪਿੱਛੋਂ ਜਿੱਥੇ ਅਮਰੀਕੀ ਸਰਕਾਰ ਨੇ ਉਨ੍ਹਾਂ ਦੀ ਯਾਦ ਵਿੱਚ ਸਟੈਚੂ ਬਣਾਉਣ ਦਾ ਐਲਾਨ ਕੀਤਾ ਹੈ, ਉਥੇ ਉਨ੍ਹਾਂ ਦੇ ਰਿਸ਼ਤੇਦਾਰਾਂ ਨੇ ਜਾਅਲੀ ਕਾਗਜ਼ ਬਣਾ ਕੇ ਪੰਜਾਬ ਵਿੱਚ ਉਨ੍ਹਾਂ ਦੀ ਜ਼ਮੀਨ 'ਤੇ ਕਬਜ਼ਾ ਕਰ ਲਿਆ ਹੈ।
ਬੀਤੇ ਸਾਲ ਜਾਣਕਾਰੀ ਮਿਲਣ ਉੱਤੇ ਸੰਦੀਪ ਸਿੰਘ ਨੇ ਇਥੇ ਆ ਕੇ ਪੁਲਸ ਵਿੱਚ ਸ਼ਿਕਾਇਤ ਕੀਤੀ ਸੀ। ਜਾਂਚ ਦੇ ਬਾਅਦ ਐਸ ਐਸ ਪੀ ਦੇ ਹੁਕਮਾਂ ਉੱਤੇ ਪੁਲਸ ਨੇ ਨਛੱਤਰ ਸਿੰਘ, ਸਕੀਰਤ ਕੌਰ, ਰਮਨਜੀਤ ਕੌਰ, ਅਜੀਤ ਸਿੰਘ ਅਤੇ ਰੁਪਿੰਦਰ ਸਿੰਘ 'ਤੇ ਕੇਸ ਦਰਜ ਕਰ ਲਿਆ। ਸੰਦੀਪ ਦੇ ਮਾਸੜ ਸੁਖਦੇਵ ਸੰਧੂ ਨੇ ਦੱਸਿਆ ਕਿ ਸੰਦੀਪ ਸਿੰਘ ਦੀ ਮਾਂ ਅਤੇ ਮਾਸੀ ਦੇ ਨਾਂਅ ਪਿੰਡ ਸ਼ੇਖੂਪੁਰ ਵਿੱਚ ਚਾਰ ਏਕੜ 16 ਮਰਲੇ ਜ਼ਮੀਨ ਹੈ। ਇਸ ਉੱਤੇ ਕੁਝ ਰਿਸ਼ਤੇਦਾਰਾਂ ਦੀ ਨਜ਼ਰ ਸੀ। ਪਿਛਲੇ ਸਾਲ ਇਨ੍ਹਾਂ ਲੋਕਾਂ ਨੇ ਜਾਅਲੀ ਪਾਵਰ ਆਫ ਅਟਾਰਨੀ ਬਣਾ ਕੇ ਜ਼ਮੀਨ ਆਪਣੇ ਨਾਂਅ ਕਰਵਾ ਲਈ। ਪਤਾ ਲੱਗਾ ਤਾਂ ਸੰਦੀਪ ਸਿੰਘ ਇਥੇ ਆ ਕੇ ਕਪੂਰਥਲਾ ਪੁਲਸ ਵਿੱਚ ਸ਼ਿਕਾਇਤ ਦਰਜ ਕਰਵਾ ਕੇ ਗਏ ਸਨ। ਉਹ 13 ਅਕਤੂਬਰ 2019 ਨੂੰ ਅਸਲੀ ਕਾਗਜ਼ਾਤ ਲਿਆਉਣ ਵਾਲੇ ਸਨ। ਸੰਦੀਪ ਸਿੰਘ 10 ਸਾਲ ਪਹਿਲਾਂ ਸੀਨੀਅਰ ਪੁਲਸ ਅਧਿਕਾਰੀ ਭਰਤੀ ਹੋਏ ਸਨ। ਉਨ੍ਹਾਂ ਦੀ ਇਮਾਨਦਾਰੀ ਤੇ ਬਹਾਦਰੀ ਨੂੰ ਦੇਖਦੇ ਹੋਏ ਚਾਰ ਸਾਲ ਪਹਿਲਾਂ ਟੈਕਸਾਸ ਪੁਲਸ ਨੇ ਕਾਨੂੰਨ ਬਣਾ ਕੇ ਉਨ੍ਹਾਂ ਨੂੰ ਪੱਗ ਬੰਨ੍ਹਣ ਤੇ ਦਾੜ੍ਹੀ ਰੱਖਣ ਦੀ ਖੁੱਲ੍ਹ ਦਿੱਤੀ ਸੀ। ਉਨ੍ਹਾਂ ਨੇ ਅਗਸਤ 2017 ਵਿੱਚ ਟੈਕਸਾਸ ਵਿੱਚ ਹਾਰਵੀ ਤੂਫਾਨ ਦੀ ਤ੍ਰਾਸਦੀ ਦੇ ਦੌਰਾਨ ਪ੍ਰਭਾਵਤਾਂ ਦੀ ਖੂਬ ਮਦਦ ਕੀਤੀ ਸੀ। ਇਸ ਦੇ ਬਾਅਦ ਉਨ੍ਹਾਂ ਦੀ ਅਲਾਗ ਪਛਾਣ ਬਣ ਗਈ ਸੀ।