ਨਵੀਂ ਦਿੱਲੀ, 3 ਦਸੰਬਰ, (ਪੋਸਟ ਬਿਊਰੋ)- ਚੰਦ ਦੀ ਸਤ੍ਹਾ ਉੱਤੇ ਉੱਤਰਨ ਵੇਲੇ ਹਾਦਸੇ ਦਾ ਸਿ਼ਕਾਰ ਹੋਏ ਚੰਦਰਯਾਨ-2 ਦੇ ਵਿਕਰਮ ਲੈਂਡਰ ਨੂੰ ਅਮਰੀਕੀ ਪੁਲਾੜ ਏਜੰਸੀ ਨਾਸਾ ਦੇ ਇਕ ਸੈਟਾਲਾਈਟ ਨੇ ਸੋਮਵਾਰ ਨੂੰ ਲੱਭ ਲਿਆ ਹੈ। ਨਾਸਾ ਨੇ ਆਪਣੇ ਲੂਨਰ ਰਿਕਨਾਇਸੈਂਸ ਆਰਬੀਟਰ ਵੱਲੋਂ ਭੇਜੀ ਫੋਟੋ ਜਾਰੀ ਕੀਤੀ ਹੈ, ਜਿਸ ਵਿਚ ਪੁਲਾੜ ਯਾਨ ਦੇ ਉੱਤਰਨ ਨਾਲ ਪ੍ਰਭਾਵਤ ਹੋਈ ਜਗ੍ਹਾ ਦਿਖਾਈ ਦੇਂਦੀ ਹੈ, ਪਰ ਉਸਨੂੰ ਲੱਭਣ ਵਿਚ ਤਾਮਿਲ ਨਾਡੂ ਦੇ ਸ਼ਹਿਰ ਚੇਨਈ ਵਿਚਲੇ ਇਕ ਇੰਜੀਨੀਅਰ ਅਤੇ ਬਲੌਗਰ ਸ਼ਨਮੁਗਾ ਸੁਬਰਾਮਨੀਅਮ ਨੇ ਮਦਦ ਕੀਤੀ ਹੈ। ਨਾਸਾ ਨੇ ਇਸ ਦੇ ਬਾਅਦ ਵਿਕਰਮ ਲੈਂਡਰ ਨੂੰ ਲੱਭਣ ਦਾ ਸਿਹਰਾ ਸੁਬਰਾਮਨੀਅਮ ਦੇ ਸਿਰ ਬੰਨ੍ਹਿਆ ਤੇ ਬਾਕਾਇਦਾ ਇਸ ਦਾ ਐਲਾਨ ਕੀਤਾ ਹੈ।
ਸ਼ਨਮੁਗਾ ਸੁਬਰਾਮਨੀਅਮ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੇ ਇਸ ਨੂੰ ਚੁਣੌਤੀ ਵਜੋਂ ਲੈ ਕੇ ਭਾਲ ਸ਼ੁਰੂ ਕੀਤੀ ਸੀ। ਉਨ੍ਹਾਂ ਦੱਸਿਆ ਕਿ ਮੈ ਸੋਚਿਆ ਕਿ ਜੇ ਕੋਈ ਚੀਜ਼ ਇੰਨੀ ਔਖੀ ਹੈ ਕਿ ਨਾਸਾ ਵੀ ਉਸ ਨੂੰ ਲੱਭ ਨਹੀਂ ਸਕਦਾ ਤਾਂ ਕਿਉਂ ਨਾ ਅਸੀਂ ਕੋਸ਼ਿਸ਼ ਕਰੀਏ। ਉਨ੍ਹਾਂ ਕਿਹਾ ਕਿ ਜੇ ਵਿਕਰਮ ਲੈਂਡਰ ਸਫ਼ਲਤਾ ਨਾਲ ਲੈਂਡ ਹੋ ਜਾਂਦਾ ਤਾਂ ਮੈਨੂੰ ਨਹੀਂ ਲੱਗਦਾ ਕਿ ਭਾਰਤ ਉੱਤੇ ਖਾਸ ਪ੍ਰਭਾਵ ਪੈਂਦਾ, ਪਰ ਉਸ ਦੇ ਗੁਆਚਣ ਨਾਲ ਹਰ ਥਾਂ ਉਸਦੀ ਚਰਚਾ ਹੋਈ ਸੀ। ਇਸ ਬਾਰੇ ਸੁਬਰਾਮਨੀਅਨ ਨੇ ਕਿਹਾ ਕਿ ਸ਼ੁਰੂ ਵਿਚ ਜਦੋਂ ਉਨ੍ਹਾਂ ਨੇ ਖੋਜ ਆਰੰਭੀ ਤਾਂ ਚੇਨਈ ਵਿੱਚ ਉਨ੍ਹਾਂ ਨੂੰ ਆਪਣੇ ਕੰਪਿਊਟਰ ਉੱਤੇ ਨਾਸਾ ਦੇ ਲੂਨਰ ਤੋਂ ਜਾਰੀ ਹੋਈਆਂ ਕੁਝ ਫੋਟੋ ਤੋਂ ਕੁਝ ਸੁਰਾਗ ਮਿਲੇ। ਅਸਲ ਵਿੱਚ ਬੀਤੀ 26 ਸਤੰਬਰ ਨੂੰ ਨਾਸਾ ਨੇ ਇੱਕ ਮੋਜ਼ੇਕ ਤਸਵੀਰ ਜਾਰੀ ਕੀਤੀ ਤੇ ਲੋਕਾਂ ਨੂੰ ਲੈਂਡਰ ਦੇ ਸੰਕੇਤ ਲੱਭਣ ਲਈ ਸੱਦਾ ਦਿੱਤਾ ਸੀ। ਸੁਬਰਾਮਨੀਅਨ ਨੇ ਉਸ ਤੋਂ ਬਾਅਦ ਮਲਬੇ ਦੀ ਪਾਜਿ਼ਟਿਵ ਪਛਾਣ ਨਾਲ ਇਹ ਲੈਂਡਰ ਲੱਭਣ ਲਈ ਪ੍ਰੋਜੈਕਟ ਨਾਲ ਸੰਪਰਕ ਕੀਤਾ। ਉਨ੍ਹਾ ਨੇ ਹਾਦਸੇ ਵਾਲੀ ਥਾਂ ਦੇ ਉੱਤਰ-ਪੱਛਮ ਵਿੱਚ ਲਗਭਗ 750 ਮੀਟਰ ਦੂਰ ਮਲਬੇ ਨੂੰ ਪਹਿਲਾਂ ਮੋਜ਼ੇਕ ਵਿੱਚ ਇੱਕ ਸਿੰਗਲ ਚਮਕਦਾਰ ਪਿਕਸਲ ਦੀ ਪਛਾਣ ਕੀਤੀ। ਇਸ ਮਲਬੇ ਵਿਚ ਤਿੰਨ ਸਭ ਤੋਂ ਵੱਡੇ ਟੁਕੜੇ ਦੋ ਗੁਣਾ ਦੋ ਪਿਕਸੇਲ ਦੇ ਸਨ।