ਬੀਜਿੰਗ, 21 ਅਕਤੂਬਰ (ਪੋਸਟ ਬਿਊਰੋ)- ਚੀਨ-ਹਾਂਗਕਾਂਗ ਵਿਚਾਲੇ ਬਣਿਆ ਦੁਨੀਆ ਦਾ ਸਭ ਤੋਂ ਲੰਬਾ ਸਮੁੰਦਰੀ ਪੁਲ ਆਉਂਦ ਬੁੱਧਵਾਰ ਜਨਤਾ ਲਈ ਖੋਲ੍ਹ ਦਿੱਤਾ ਜਾਵੇਗਾ।
ਵਰਨਣ ਯੋਗ ਹੈ ਕਿ 55 ਕਿਲੋਮੀਟਰ ਲੰਬੇ ਇਸ ਪੁਲ ਦਾ ਨਾਂਅ ਹਾਂਗਕਾਂਗ-ਝੂਹੈਈ-ਮਕਾਊ ਹੈ ਤੇ ਪਰਲ ਰਿਵਰ ਈਸਟੂਰੀ ਉਤੇ ਬਣੇ ਇਸ ਪੁਲ ਦਾ ਕੰਮ ਦਸੰਬਰ 2009 'ਚ ਸ਼ੁਰੂ ਹੋਇਆ ਸੀ। ਇਸ ਦੇ ਬਣਨ ਤੋਂ ਬਾਅਦ ਹਾਂਗਕਾਂਗ ਅਤੇ ਚੀਨ ਦੇ ਝੂਹੈਈ ਸ਼ਹਿਰ ਦੀ ਦੂਰੀ ਤਿੰਨ ਘੰਟੇ ਤੋਂ ਘਟ ਕੇ ਸਿਰਫ ਤੀਹ ਮਿੰਟ ਰਹਿ ਜਾਵੇਗੀ। ਸਥਾਨਕ ਅਖਬਾਰ ਦੇ ਮੁਤਾਬਕ ਹਾਂਗਕਾਂਗ ਦੇ ਪਾਰਲੀਮੈਂਟ ਮੈਂਬਰਾਂ ਨੇ ਕਿਹਾ ਕਿ ਇਹ ਪੁਲ ਹਾਂਗਕਾਂਗ ਕੌਮਾਂਤਰੀ ਹਵਾਈ ਅੱਡੇ ਨੂੰ ਜੋੜਦਾ ਹੈ, ਇਸ ਕਾਰਨ ਹਾਂਗਕਾਂਗ ਦੇ ਲੰਤਾਊ ਟਾਪੂ 'ਤੇ ਵਾਧੂ ਟਰੈਫਿਕ ਦਾ ਬੋਝ ਵਧ ਜਾਵੇਗਾ। ਇਸ ਨਾਲ ਜਾਮ ਦੀ ਸਮੱਸਿਆ ਪੈਦਾ ਹੋ ਜਾਵੇਗੀ। ਟਰਾਂਸਪੋਰਟ ਵਿਭਾਗ ਪਹਿਲਾਂ ਹੀ ਸਾਫ ਕਰ ਚੁੱਕਾ ਹੈ ਕਿ ਪੰਜ ਹਜ਼ਾਰ ਤੋਂ ਵੱਧ ਨਿੱਜੀ ਵਾਹਨਾਂ ਨੂੰ ਪੁਲ ਤੋਂ ਲੰਘਣ ਦੀ ਇਜਾਜ਼ਤ ਨਹੀਂ ਦਿੱਤੀ ਜਾਵੇਗੀ। ਸਾਲ 2016 ਦੀ ਇੱਕ ਰਿਪੋਰਟ ਮੁਤਾਬਕ 2030 ਤੱਕ ਕਰੀਬ 29 ਹਜ਼ਾਰ ਵਾਹਨ ਪੁਲ ਦੀ ਵਰਤੋਂ ਕਰਨਗੇ, ਜੋ 2008 ਵਿੱਚ ਜਾਰੀ ਰਿਪੋਰਟ ਤੋਂ 12 ਫੀਸਦੀ ਘੱਟ ਹਨ।