ਮੁੰਬਈ, 2 ਦਸੰਬਰ (ਪੋਸਟ ਬਿਊਰੋ)- ਮਹਾਰਾਸ਼ਟਰ 'ਚ ਭਾਰਤੀ ਜਨਤਾ ਪਾਰਟੀ (ਭਾਜਪਾ) ਦੀ ਸਰਕਾਰ ਜਾਂਦੇ ਸਾਰ ਹੀ ਸਾਬਕਾ ਮੁੱਖ ਮੰਤਰੀ ਦੇਵੇਂਦਰ ਫੜਨਵੀਸ ਦੇ ਵਿਰੁੱਧ ਬਗਾਵਤ ਦੇ ਸੁਰ ਉਠਣ ਲੱਗੇ ਹਨ। ਪਾਰਟੀ ਨੇਤਾ ਪੰਕਜਾ ਮੁੰਡੇ ਨੇ ਫੇਸਬੁਕ ਪੋਸਟ ਦੇ ਜ਼ਰੀਏ ਮਹਾਰਾਸ਼ਟਰ ਭਾਜਪਾ ਵਿੱਚ ਬਗਾਵਤ ਦੇ ਸੰਕੇਤ ਦਿੱਤੇ ਹਨ। ਉਸ ਨੇ ਆਪਣੇ ਪਿਤਾ ਗੋਪੀਨਾਥ ਮੁੰਡੇ ਦੀ ਬਰਸੀ ਉੱਤੇ 12 ਦਸੰਬਰ ਨੂੰ ਸਮਰਥਕਾਂ ਦੀ ਬੈਠਕ ਬੁਲਾਈ ਅਤੇ ਕਿਹਾ ਕਿ ਉਹ ਅੱਠ-ਦਸ ਦਿਨ 'ਚ ਵੱਡਾ ਫੈਸਲਾ ਲਵੇਗੀ। ਪੰਕਜਾ ਮੁੰਡੇ ਨੇ ਲਿਖਿਆ ਹੈ ਕਿ ਚੋਣਾਂ 'ਚ ਹਾਰ ਪਿੱਛੋਂ ਸਮਰਥਕਾਂ ਦੇ ਕਈ ਫੋਨ ਮੈਸੇਜ ਆਏ ਤੇ ਮਿਲਣ ਦੀ ਅਪੀਲ ਕੀਤੀ ਗਈ, ਪਰ ਸਿਆਸੀ ਸਥਿਤੀ ਅਜਿਹੀ ਸੀ ਕਿ ਸਮਰਥਕਾਂ ਨਾਲ ਮਿਲਣਾ ਨਹੀਂ ਹੋ ਸਕਿਆ।
ਫੜਨਵੀਸ ਸਰਕਾਰ ਵਿੱਚ ਸਾਬਕਾ ਮੰਤਰੀ ਪੰਕਜਾ ਮੁੰਡੇ ਆਪਣੇ ਗੜ੍ਹ ਪਰਲੀ ਤੋਂ ਚੋਣ ਹਾਰ ਗਈ ਸੀ। ਉਨ੍ਹਾਂ ਨੂੰ ਉਨ੍ਹਾਂ ਦੇ ਚਚੇਰੇ ਭਰਾ ਧਨੰਜੈ ਮੁੰਡੇ ਨੇ ਹਰਾਇਆ ਸੀ। ਧਨੰਜੈ ਮੁੰਡੇ ਇਸ ਵੇਲੇ ਊਧਵ ਠਾਕਰੇ ਸਰਕਾਰ ਦੇ ਨਾਲ ਹਨ। ਇਸ ਤੋਂ ਪਹਿਲਾਂ ਮਹਾਰਾਸ਼ਟਰ ਵਿਧਾਨ ਸਭਾ ਵਿੱਚ ਵਿਰੋਧੀ ਧਿਰ ਦੇ ਨੇਤਾ ਧਨੰਜੈ ਮੁੰਡੇ ਨੇ ਆਪਣੀ ਭੈਣ ਨੂੰ ਤੀਹ ਹਜ਼ਾਰ ਵੋਟਾਂ ਨਾਲ ਹਰਾਇਆ ਹੈ। ਫੇਸਬੁਕ ਪੋਸਟ 'ਚ ਪੰਕਜਾ ਮੁੰਡੇ ਨੇ ਲਿਖਿਆ ਹੈ, ‘ਬਦਲੇ ਸਿਆਸੀ ਦਿ੍ਰਸ਼ 'ਚ ਭਵਿੱਖ ਦੀ ਕਾਰਵਾਈ 'ਤੇ ਫੈਸਲਾ ਲਿਆ ਜਾਣਾ ਜ਼ਰੂਰੀ ਹੈ। ਅਗਲੇ ਅੱਠ-ਦਸ ਦਿਨ 'ਚ ਤੈਅ ਕਰਾਂਗੀ ਕਿ ਅੱਗੇ ਕੀ ਕਰਨਾ ਹੈ, ਕਿਸ ਰਸਤੇ 'ਤੇ ਮੈਂ ਚੱਲਣਾ ਹੈ। ਸਾਡੀ ਮਜ਼ਬੂਤੀ ਹੈ, ਇਸ 'ਤੇ ਧਿਆਨ ਦੇਣਾ ਜ਼ਰੂਰੀ ਹੈ।’
ਇਸ ਦੌਰਾਨ ਸ਼ਿਵ ਸੈਨਾ ਦੇ ਸੀਨੀਅਰ ਨੇਤਾ ਸੰਜੇ ਰਾਊਤ ਨੇ ਕਿਹਾ ਕਿ ਸਾਬਕਾ ਮੁੱਖ ਮੰਤਰੀ ਦੇਵੇਂਦਰ ਫੜਨਵੀਸ ਦੀ ਸੱਤਾ ਹਾਸਲ ਕਰਨ ਦੀ ਜਲਦਬਾਜ਼ੀ ਤੇ ਬਚਕਾਨੀਆਂ ਹਰਕਤਾਂ ਮਹਾਰਾਸ਼ਟਰ 'ਚ ਭਾਜਪਾ ਨੂੰ ਲੈ ਡੁੱਬੀਆਂ ਹਨ ਅਤੇ ਫੜਨਵੀਸ ਨੂੰ ਵਿਰੋਧੀ ਧਿਰ 'ਚ ਬੈਠਣਾ ਪੈ ਗਿਆ ਹੈ। ਸੰਜੇ ਰਾਊਤ ਨੇ ਸ਼ਿਵ ਸੈਨਾ ਦੇ ਮੁੱਖ ਪੱਤਰ ‘ਸਾਮਨਾ’ ਵਿੱਚ ਆਪਣੇ ‘ਰੋਖਠੋਖ’ ਕਾਲਮ ਵਿੱਚ ਲਿਖਿਆ ਹੈ ਕਿ ਸ਼ਿਵ ਸੈਨਾ ਮੁਖੀ ਊਧਵ ਠਾਕਰੇ, ਐਨ ਸੀ ਪੀ ਦੇ ਪ੍ਰਧਾਨ ਸ਼ਰਦ ਪਵਾਰ ਤੇ ਕਾਂਗਰਸ ਨੇਤਾ ਸੋਨੀਆ ਗਾਂਧੀ ਦੇ ਇਕੱਠੇ ਹੋਣ ਨਾਲ ਮਹਾਰਾਸ਼ਟਰ ਵਿੱਚ ਜੋ ਹੋਇਆ, ਉਹ ਦੇਸ਼ ਨੂੰ ਸਵੀਕਾਰ ਹੈ।
ਮਹਾਰਾਸ਼ਟਰ ਦੇ ਸਾਬਕਾ ਮੁੱਖ ਮੰਤਰੀ ਦੇਵੇਂਦਰ ਫੜਨਵੀਸ ਨੇ ਇੱਕ ਵਾਰ ਫਿਰ ਸੱਤਾ ਵਿੱਚ ਵਾਪਸ ਆਉਣ ਦੀ ਗੱਲ ਕਹੀ ਹੈ। ਉਨ੍ਹਾਂ ਨੇ ਕੱਲ੍ਹ ਕਿਹਾ ਕਿ ਕਦੋਂ ਵਾਪਸ ਆਵਾਂਗਾ, ਇਹ ਨਹੀਂ ਪਤਾ, ਪਰ ਪਰਤ ਕੇ ਜ਼ਰੂਰ ਆਵਾਂਗਾ। ਊਧਵ ਠਾਕਰੇ ਸਰਕਾਰ ਨੂੰ ਚਿਤਾਵਨੀ ਦਿੰਦੇ ਹੋਏ ਫੜਨਵੀਸ ਨੇ ਕਿਹਾ, ‘ਮੇਰਾ ਪਾਣੀ ਉਤਰਿਆ ਦੇਖ ਕੇ ਕੰਢੇ 'ਤੇ ਘਰ ਨਾ ਵਸਾ ਲੈਣਾ, ਮੈਂ ਸਮੁੰਦਰ ਹਾਂ, ਪਰਤ ਕੇ ਜ਼ਰੂਰ ਆਵਾਂਗਾ।’ ਫੜਨਵੀਸ ਦੇ ਬੋਲਣ ਪਿੱਛੋਂ ਮਹਾਰਾਸ਼ਟਰ ਦੇ ਮੁੱਖ ਮੰਤਰੀ ਊਧਵ ਠਾਕਰੇ ਵੀ ਪਿੱਛੇ ਨਹੀਂ ਰਹੇ ਤੇ ਉਨ੍ਹਾਂ ਨੇ ਫੜਨਵੀਸ 'ਤੇ ਵਿਅੰਗ ਕਰਦੇ ਹੋਏ ਕਿਹਾ ਕਿ ਕਦੇ ਨਾ ਕਹਿਣਾ, ਮੈਂ ਪਰਤਾਂਗਾ।