ਬਠਿੰਡਾ, 29 ਨਵੰਬਰ (ਪੋਸਟ ਬਿਊਰੋ)- ਨਵੀਂਆਂ ਪਿਰਤਾਂ ਪਾਉਣ ਦੇ ਇਸ ਦੌਰ ਵਿੱਚ ਫਿਰ ਇੱਕ ਨੌਜਵਾਨ ਨੇ ਆਪਣੀ ਕਿਸਮ ਦੀ ਪਿਰਤ ਪਾਈ ਹੈ। ਉਹ ਸਾਈਕਲ 'ਤੇ ਨਵੀਂ ਲਾੜੀ ਨੂੰ ਵਿਆਹ ਕੇ ਲੈ ਆਇਆ ਹੈ।
ਬਠਿੰਡਾ ਜ਼ਿਲੇ੍ਹ ਦੇ ਪਿੰਡ ਰਾਮਨਗਰ ਦੇ ਨੌਜਵਾਨ ਗੁਰਬਖਸ਼ੀਸ਼ ਸਿੰਘ ਗੱਗੀ ਨਾਂ ਦਾ ਵਿਆਹ ਪਿੰਡ ਵੀਰ ਖੁਰਦ ਦੀ ਰਮਨਦੀਪ ਕੌਰ ਨਾਲ ਹੋਇਆ ਹੈ। ਉਹ ਸਾਈਕਲ ਉੱਤੇ ਹੀ ਵਿਆਹ ਕਰਵਾਉਣ ਗਿਆ ਅਤੇ ਸਾਈਕਲ 'ਤੇ ਹੀ ਲਾੜੀ ਨੂੰ ਬਿਠਾ ਕੇ ਲੈ ਆਇਆ। ਇਸ ਤਰ੍ਹਾਂ ਉਸ ਨੇ ਫਜ਼ੂਲ ਖਰਚੀ ਅਤੇ ਦਾਜ ਪ੍ਰਥਾ ਨੂੰ ਰੋਕਣ ਦੇ ਨਾਲ ਵਾਤਾਵਰਨ ਨੂੰ ਬਚਾਉਣ ਦਾ ਹੋਕਾ ਵੀ ਦਿੱਤਾ ਹੈ। ਵਾਤਾਵਰਨ ਪ੍ਰੇਮੀ ਗੁਰਬਖਸ਼ੀਸ਼ ਸਿੰਘ ਨੇ ਬਰਾਤ ਲਈ ਕੋਈ ਗੱਡੀ ਨਹੀਂ ਸਜਾਈ, ਸਗੋਂ ਮਾਂ ਬੋਲੀ 'ਚ ਆਪਣਾ ਅਤੇ ਜੀਵਨ ਸਾਬਣ ਦਾ ਨਾਂ ਲਿਖ ਕੇ ਤਖਤੀ ਲਾਈ ਅਤੇ ਪ੍ਰਦੂਸ਼ਣ ਬਚਾਉਣ ਦਾ ਹੋਕਾ ਦਿੰਦਾ ਸਾਈਕਲ 'ਤੇ ਪਿੰਡ ਠੂਠੀਆਂ ਵਾਲੀ ਗੁਰਦੁਆਰਾ ਸਾਹਿਬ ਜਾ ਪੁੱਜਿਆ ਅਤੇ ਉਥੇ ਆਨੰਦ ਕਾਰਜ ਕਰਵਾ ਲਏ। ਗੁਰਬਖਸ਼ੀਸ਼ ਸਿੰਘ ਗੱਗੀ ਪੁੱਤਰ ਸ਼ਿੰਦਰ ਸਿੰਘ ਵਾਸੀ ਰਾਮਨਗਰ ਨੇ ਕਿਹਾ ਕਿ ਵਿਆਹ ਤੋਂ ਪਹਿਲਾਂ ਦਾਜ ਦੇ ਸੌਦੇ ਹੋਣੇ ਸ਼ੁਰੂ ਹੋਣ ਲੱਗੋ ਜਾਂਦੇ ਹਨ ਤੇ ਲੱਖਾਂ ਰੁਪਏ ਫਜ਼ੂਲ ਹੀ ਵਿਆਹਾਂ 'ਤੇ ਖਰਚ ਕੀਤੇ ਜਾਂਦੇ ਹਨ। ਬਾਅਦ ਵਿੱਚ ਲੋਕ ਏਨਾ ਪੈਸਾ ਫੂਕ ਕੇ ਪਛਤਾਉਂਦੇ ਹਨ ਪਰ ਵੇਖੋ-ਵੇਖੀ ਅਜਿਹਾ ਕਰਦੇ ਹਨ। ਸਮਾਜ ਵਿੱਚ ਦਾਜ ਤੇ ਫਜ਼ੂਲ ਖਰਚੀ ਦੀਆਂ ਵਧ ਰਹੀਆਂ ਇਨ੍ਹਾਂ ਕੁਰੀਤੀਆਂ ਨੂੰ ਰੋਕਣਾ ਹੈ। ਇਹ ਸੁਨੇਹਾ ਦੇਣ ਲਈ ਉਸ ਨੇ ਸਾਦਾ ਵਿਆਹ ਕੀਤਾ ਤੇ 20 ਕਿਲੋਮੀਟਰ ਸਾਈਕਲ ਚਲਾ ਕੇ ਲਾੜੀ ਨੂੰ ਵਿਆਹ ਕੇ ਲਿਆਇਆ। ਗੱਗੀ ਨੇ ਦੱਸਿਆ ਕਿ ਉਸ ਕੋਲ 25 ਏਕੜ ਜ਼ਮੀਨ ਹੈ, ਪਰ ਉਸ ਨੇ ਆਪਣੀ ਫੋਕੀ ਟੌਹਰ ਪਾਸੇ ਰੱਖੀ ਅਤੇ ਆਪਣਾ ਤੇ ਕੁੜੀ ਵਾਲਿਆਂ ਦੇ ਘਰ ਦਾ ਖਿਆਲ ਰੱਖਿਆ। ਉਹ ਆਨੰਦ ਕਾਰਜ ਕਰਵਾ ਕੇ ਲਾੜੀ ਨਾਲ ਸਿੱਧੇ ਗੁਰਦੁਆਰਾ ਸਾਹਿਬ ਤੋਂ ਆਪਣੇ ਘਰ ਵੱਲ ਆਇਆ ਅਤੇ ਲੜਕੀ ਵਾਲਿਆਂ ਦੇ ਘਰ ਵੀ ਨਹੀਂ ਗਿਆ।