ਨਵੀਂ ਦਿੱਲੀ, 19 ਅਕਤੂਬਰ (ਪੋਸਟ ਬਿਊਰੋ)- ਇਨਫੋਰਸਮੈਂਟ ਡਾਇਰੈਕਟੋਰੇਟ (ਈ ਡੀ) ਨੇ ਮਨਮੋਹਨ ਸਿੰਘ ਵਾਲੀ ਯੂ ਪੀ ਏ ਸਰਕਾਰ ਦੇ ਵਕਤ ਹੋਏ ਏਅਰ ਇੰਡੀਆ ਤੇ ਇੰਡੀਅਨ ਏਅਰਲਾਈਨਜ਼ ਦੇ ਵਿਵਾਦਤ ਰਲੇਵੇਂ ਸਮੇਤ ਹੋਏ ਕਰੀਬ ਚਾਰ ਸੌਦਿਆਂ ਵਿੱਚ ਹਵਾਲਾ ਰਾਸ਼ੀ ਦੇ ਦੋਸ਼ਾਂ ਤੇ ਹੋਰ ਬੇਨਿਯਮੀਆਂ ਦੀ ਜਾਂਚ ਲਈ ਅਪਰਾਧਕ ਕੇਸ ਦਰਜ ਕੀਤਾ ਹੈ, ਜੋ ਸਰਕਾਰੀ ਹਵਾਈ ਕੰਪਨੀ ਏਅਰ ਇੰਡੀਆ ਲਈ ਤਾਜ਼ਾ ਮੁਸੀਬਤ ਬਣ ਸਕਦਾ ਹੈ।
ਇਸ ਬਾਰੇ ਕੇਂਦਰੀ ਏਜੰਸੀ ਨੇ ਪੁਲਸ ਕੇਸ ਦੇ ਬਰਾਬਰ ਘੱਟੋ-ਘੱਟ ਚਾਰ ‘ਈ ਸੀ ਆਈ ਆਰ’ ਦਾਇਰ ਕੀਤੀਆਂ ਹਨ। ਈ ਡੀ ਨੇ ਇਹ ਈ ਸੀ ਆਈ ਆਰ ਹਵਾਲਾ ਰਾਸ਼ੀ ਰੋਕਥਾਮ ਐਕਟ ਹੇਠ ਦਾਇਰ ਕੀਤੀਆਂ ਹਨ। ਇਸ ਸਬੰਧ ਵਿੱਚ ਅਧਿਕਾਰੀ ਨੇ ਦੱਸਿਆ ਕਿ ਈ ਡੀ ਨੇ ਇਸ ਕੇਸ ਵਿੱਚ ਏਅਰਲਾਈਨ ਤੇ ਇਸ ਨਾਲ ਸਬੰਧਤ ਹੋਰ ਵਿਭਾਗਾਂ ਤੋਂ ਸਬੰਧਤ ਦਸਤਾਵੇਜ਼ ਪ੍ਰਾਪਤ ਕਰ ਲਏ ਹਨ, ਜਿਨ੍ਹਾਂ ਨੂੰ ਰਾਜਨੀਤਕ ਤੌਰ 'ਤੇ ਸੰਵੇਦਨਸ਼ੀਲ ਮੰਨਿਆ ਜਾ ਰਿਹਾ ਹੈ। ਅਧਿਕਾਰੀਆਂ ਦੇ ਅਨੁਸਾਰ ਜਾਂਚ ਏਜੰਸੀ ਇਹ ਪਤਾ ਲਾਉਣ ਲਈ ਖਾਸ ਜਾਂਚ ਕਰੇਗੀ ਕਿ ਬੇਨਿਯਮੀ ਨਾਲ ਕਿੰਨਾ ਕਾਲਾ ਧਨ ਪੈਦਾ ਹੋਇਆ ਤੇ ਕੀ ਦੋਸ਼ੀਆਂ ਨੇ ਨਾਜਾਇਜ਼ ਜਾਇਦਾਦ ਬਣਾਉਣ ਲਈ ਹਵਾਲਾ ਰਾਹੀਂ ਰਾਸ਼ੀ ਤਾਂ ਨਹੀਂ ਸੀ ਪ੍ਰਾਪਤ ਕੀਤੀ। ਈ ਡੀ ਵੱਲੋਂ ਇਹ ਕੇਸ ਸੀ ਬੀ ਆਈ ਦੇ ਚਾਰ ਕੇਸਾਂ ਉੱਤੇ ਆਧਾਰਤ ਹਨ। ਸੀ ਬੀ ਆਈ ਅਨੁਸਾਰ ਯੂ ਪੀ ਏ ਸਰਕਾਰ ਦੌਰਾਨ ਦੋ ਕੇਸ ਏਅਰ ਇੰਡੀਆ ਅਤੇ ਇੰਡੀਅਨ ਏਅਰਲਾਈਨਜ਼ ਦੇ ਵਿਵਾਦਤ ਰਲੇਵੇਂ ਤੇ ਇਨ੍ਹਾਂ ਦੋਵਾਂ ਕੰਪਨੀਆਂ ਵੱਲੋਂ ਜਹਾਜ਼ਾਂ ਦੀ ਖਰੀਦ ਤੇ ਉਨ੍ਹਾਂ ਨੂੰ ਪੱਟੇ 'ਤੇ ਦੇਣ 'ਚ ਹੋਈਆਂ ਬੇਨਿਯਮੀਆਂ ਨਾਲ ਸਬੰਧਤ ਹਨ।