ਨਵੀਂ ਦਿੱਲੀ, 14 ਨਵੰਬਰ (ਪੋਸਟ ਬਿਊਰੋ)- ਅੱਜ ਬਾਲ ਦਿਵਸ ਸੀ। ਇਸ ਦਿਨ ਅਸੀਂ ਆਪਣੇ ਬੱਚਿਆਂ ਦੇ ਚਿਹਰਿਆਂ 'ਤੇ ਮੁਸਕਾਨ ਦਾ ਸੰਕਲਪ ਲੈਂਦੇ ਹਾਂ, ਪਰ ਕੌਮਾਂਤਰੀ ਸੰਸਥਾਵਾਂ ਦੀ ਸਾਂਝੀ ਆਈ ਰਿਪੋਰਟ ਦੱਸਦੀ ਹੈ ਕਿ 2018 ਦੌਰਾਨ ਭਾਰਤ ਵਿੱਚ ਪੰਜ ਸਾਲ ਤੋਂ ਘੱਟ ਉਮਰ ਦੇ 14 ਤੋਂ ਜ਼ਿਆਦਾ ਬੱਚਿਆਂ ਨੇ ਹਰ ਘੰਟੇ ਦਮ ਤੋੜਿਆ ਹੈ।
ਫਾਈਟਿੰਗ ਫਾਰ ਬੈ੍ਰਥਇਨ ਇੰਡੀਆ ਨਾਂ ਦੇ ਇਸ ਅਧਿਐਨ ਵਿੱਚ ਸੇਵ ਦ ਚਿਲਡ੍ਰੇਨ, ਯੂਨੀਸੈਂਫ ਅਤੇ ਐਵਰੀ ਬ੍ਰੈਥ ਕਾਊਂਟਸ ਨੇ ਸਾਂਝੇ ਰੂਪ ਨਾਲ ਦੇਸ਼-ਦੁਨੀਆ ਦੀ ਇਸ ਬਦਰੰਗ ਤਸਵੀਰ ਨੂੰ ਦਿਖਾਇਆ ਹੈ। ਦੇਸ਼ ਵਿੱਚ 1.27 ਲੱਖ ਬੱਚਿਆਂ ਦੀਆਂ ਮੌਤਾਂ 2018 ਵਿੱਚ ਨਿਮੋਨੀਆ ਦੇ ਕਾਰਨ ਪੰਜ ਸਾਲ ਤੋਂ ਘੱਟ ਉਮਰ ਵਿੱਚ ਹੋਈਆਂ, ਜਦ ਕਿ ਦੁਨੀਆ ਦੇ ਦੂਜੇ ਸਾਰੇ ਦੇਸ਼ਾਂ ਵਿੱਚ ਨਿਮੋਨੀਆ ਕਾਰਨ 8 ਲੱਖ ਬੱਚਿਆਂ ਦੀਆਂ ਮੌਤਾਂ ਹੋਈਆਂ। ਡਿਪਟੀ ਡਾਇਰੈਟਰ ਆਫ ਹੈਲਥ ਐਂਡ ਨਿਊਟ੍ਰੀਸ਼ਨ, ਸੇਵ ਦ ਚਿਲਡ੍ਰੇਨ ਸੰਸਥਾ ਦੇ ਡਾ. ਰਾਜੇਸ਼ ਖੰਨਾ ਮੁਤਾਬਕ, ਭਾਰਤ 'ਚ ਹਰ ਚਾਰ ਮਿੰਟ 'ਤੇ ਇੱਕ ਬੱਚੇ (ਪੰਜ ਸਾਲ ਤੋਂ ਘੱਟ ਉਮਰ ਦੇ) ਦੀ ਨਿਮੋਨੀਆ ਕਾਰਨ ਮੌਤ ਹੁੰਦੀ ਹੈ। ਕੁਪੋਸ਼ਣ ਅਤੇ ਪ੍ਰਦੂਸ਼ਣ ਇਸ ਦੇ ਦੋ ਪ੍ਰਮੁੱਖ ਕਾਰਨ ਹਨ। ਨਿਮੋਨੀਆ ਨਾਲ ਹੋਣ ਵਾਲੀਆਂ ਅੱਧੀਆਂ ਮੌਤਾਂ ਤਾਂ ਸਿਰਫ ਕੁਪੋਸ਼ਣ ਕਾਰਨ ਹੁੰਦੀਆਂ ਹਨ, ਜਦ ਕਿ ਇਨਡੋਰ ਪ੍ਰਦੂਸ਼ਣ ਦੀ 22 ਫੀਸਦੀ ਅਤੇ ਆਊਟਡੋਰ ਹਵਾ ਪ੍ਰਦੂਸ਼ਣ ਦੀ ਹਿੱਸੇਦਾਰੀ 27 ਫੀਸਦੀ ਹੈ।