ਨਵੀਂ ਦਿੱਲੀ, 13 ਨਵੰਬਰ (ਪੋਸਟ ਬਿਊਰੋ)- ਐੱਫ ਐੱਸ ਐੱਸ ਏ ਆਈ (ਭਾਰਤੀ ਫੂਡ ਸੇਫਟੀ ਸਟੈਂਡਰਜ਼ ਅਥਾਰਟੀ) ਨੇ ਸਕੂਲਾਂ-ਕਾਲਜਾਂ ਦੇ ਨੇੜੇ ਜੰਕ ਫੂਡ ਉੱਤੇ ਰੋਕ ਲਾ ਦਿੱਤੀ ਹੈ। ਦਸੰਬਰ ਤੋਂ ਇਹ ਰੋਕ ਲਾਗੂ ਹੋ ਜਾਵੇਗੀ। ਇਹੀ ਨਹੀਂ ਜੰਕ ਫੂਡ ਦੇ ਇਸ਼ਤਿਹਾਰ ਕਰਨ ਉੱਤੇ ਵੀ ਰੋਕ ਲੱਗੇਗੀ। ਇਹ ਰੋਕ ਸਕੂਲਾਂ-ਕਾਲਜਾਂ ਵਿੱਚ ਵਿਕਣ ਵਾਲੇ ਜੰਕ ਫੂਡ ਉੱਤੇ ਲਾਈ ਗਈ ਹੈ। ਇਸ ਰੋਕ ਦੇ ਤਹਿਤ ਸਕੂਲਾਂ-ਕਾਲਜਾਂ ਦੇ 50 ਮੀਟਰ ਦੇ ਦਾਇਰੇ ਵਿੱਚ ਜੰਕ ਫੂਡ ਨਾ ਵੇਚੇ ਜਾਣਗੇ ਅਤੇ ਨਾ ਇਨ੍ਹਾਂ ਦਾ ਪ੍ਰਚਾਰ ਕੀਤਾ ਜਾ ਸਕੇਗਾ।
ਪਤਾ ਲੱਗਾ ਹੈ ਕਿ ਐੱਫ ਐੱਸ ਐੱਸ ਏ ਆਈ ਨੇ ਕਈ ਤਰ੍ਹਾਂ ਦੀ ਸਟੱਡੀ ਦਾ ਹਵਾਲਾ ਦੇ ਕੇ ਸਕੂਲਾਂ-ਕਾਲਜਾਂ ਨੂੰ ਅਜਿਹੇ ਫੂਡ ਆਈਟਮਜ਼ ਉੱਤੇ ਪਾਬੰਦੀ ਲਾਉਣ ਨੂੰ ਕਿਹਾ ਹੈ, ਜਿਨ੍ਹਾਂ ਵਿੱਚ ਵੱਡੀ ਮਾਤਰਾ ਵਿੱਚ ਫੈਟ, ਸਾਲਟ ਜਾਂ ਸੂਗਰ ਹੁੰਦਾ ਹੈ। ਐੱਫ ਐੱਸ ਐੱਸ ਏ ਆਈ ਨੇ ਸਿਗਰੇਟ ਬੀੜੀ ਵਾਂਗ ਜੰਕ ਫੂਡ ਦੇ ਸਕੂਲ ਕੰਪਲੈਕਸ ਦੇ ਨਾਲ ਦੇ 50 ਮੀਟਰ ਦੇ ਘੇਰੇ ਵਿੱਚ ਵੇਚਣ ਉੱਤੇ ਰੋਕ ਲਾ ਦਿੱਤੀ ਹੈ। ਅਜਿਹੇ ਫੂਡਜ਼ ਵਿੱਚ ਪੀਜ਼ਾ, ਬਰਗਰ ਜਾਂ ਕੋਲਡ ਡਰਿੰਕ ਅਤੇ ਚਿਪਸ, ਫਰੈਂਚ ਫਰਾਈਜ਼, ਸਮੋਸੇ, ਪੇਸਟਰੀ, ਸੈਂਡਵਿਚ, ਬਰੈਡ ਪਕੌੜਾ ਵਰਗੀਆਂ ਚੀਜ਼ਾਂ ਵੀ ਸ਼ਾਮਲ ਹਨ।
ਇਸ ਸੰਬੰਧ ਵਿੱਚ ਡਾਕਟਰ ਵਿਵੇਕ ਬਿੰਦਾਲ ਦਾ ਕਹਿਣਾ ਹੈ ਕਿ ਜੰਕ ਫੂਡ (ਹਾਈ ਫੈਟ, ਸ਼ੂਗਰ, ਸਾਲਟ) ਇਕ ਤਰ੍ਹਾਂ ਦਾ ਪੈਕਡ ਫੂਡ ਹੁੰਦਾ ਹੈ। ਇਹ ਓਨਾ ਹੀ ਖਤਰਨਾਕ ਹੈ, ਜਿੰਨਾ ਤੰਬਾਕੂ ਤੇ ਸਿਗਰੇਟ। ਇਸ ਲਈ ਸਕੂਲਾਂ ਵਿੱਚ ਜਾਂ ਸਕੂਲਾਂ ਦੇ ਨੇੜੇ ਇਹ ਫੂਡ ਨਹੀਂ ਵੇਚਣੇ ਚਾਹੀਦੇ ਅਤੇ ਨਾ ਇਸ ਦਾ ਪ੍ਰਚਾਰ ਹੋਣਾ ਚਾਹੀਦਾ ਹੈ। ਅਜਿਹੇ ਫੂਡ ਬੱਚਿਆਂ ਦੇ ਨਾਲ ਵੱਡਿਆਂ ਲਈ ਵੀ ਖਤਰਨਾਕ ਹਨ। ਅਜਿਹੇ ਫੂਡ ਨਾਲ ਅੱਗੇ ਚੱਲ ਕੇ ਕਾਫੀ ਪ੍ਰੇਸ਼ਾਨੀ ਹੁੰਦੀ ਹੈ।
ਗੁਜਰਾਤ ਦੇ ਫੂਡ ਐਂਡ ਡਰੱਗ ਕਮਿਸ਼ਨਰ ਐੱਚ ਜੀ ਕੋਸ਼ੀਆ ਦੇ ਮੁਤਾਬਕ ਐੱਫ ਐੱਸ ਐੱਸ ਏ ਆਈ ਵੱਲੋਂ ਫੂਡ ਬਾਰੇ ਜੋ ਗਾਈਡਲਾਈਨ ਬਣਾਈ ਗਈ ਹੈ, ਉਹ ਜਲਦੀ ਲਾਗੂ ਹੋਵੇਗੀ। ਉਨ੍ਹਾਂ ਕਿਹਾ ਕਿ ਜੰਕ ਫੂਡ ਟੇਸਟੀ ਲੱਗਦਾ ਹੈ ਪਰ ਸ਼ਰੀਰ ਨੂੰ ਨੁਕਸਾਨ ਪੁਚਾਉਂਦਾ ਹੈ। ਭਾਰਤ ਡਾਇਬਟੀਜ਼ ਹੱਬ ਬਣਦਾ ਜਾ ਰਿਹਾ ਹੈ। ਇਸ ਨੂੰ ਰੋਕਣਾ ਹੋਵੇਗਾ।