ਵਾਸ਼ਿੰਗਟਨ, 12 ਨਵੰਬਰ, (ਪੋਸਟ ਬਿਊਰੋ)- ਯੂ ਐਨ ਓ ਵਿੱਚ ਅਮਰੀਕਾ ਦੀ ਸਾਬਕਾ ਰਾਜਦੂਤ ਨਿੱਕੀ ਹੇਲੀ ਨੇ ਕਿਹਾ ਹੈ ਕਿ ਪਾਕਿਸਤਾਨ ਉਨ੍ਹਾਂ ਅੱਤਵਾਦੀਆਂ ਨੂੰ ਸ਼ਰਨ ਦਿੰਦਾ ਹੈ,ਜਿਹੜੇ ਅਮਰੀਕੀ ਫ਼ੌਜੀਆਂ ਨੂੰ ਮਾਰਦੇ ਹਨ। ਹੇਲੀ ਨੇ ਇਹ ਦੋਸ਼ਆਪਣੀ ਕਿਤਾਬ ‘ਵਿਦ ਆਲ ਡਿਊ ਰਿਸਪੈਕਟ` ਵਿੱਚ ਲਾਇਆ ਹੈ।
ਭਾਰਤੀ ਮੂਲ ਦੀ ਅਮਰੀਕੀ ਨਾਗਰਿਕ ਨਿੱਕੀ ਹੇਲੀ ਨੇ ਬਾਜ਼ਾਰ ਵਿੱਚ ਆਈ ਆਪਣੀ ਕਿਤਾਬ ਵਿਚ ਲਿਖਿਆ ਹੈ ਕਿ ਰਾਸ਼ਟਰਪਤੀ ਡੋਨਾਲਡ ਟਰੰਪ ਓਦੋਂ ਨਾਰਾਜ਼ ਹੋ ਗਏ ਸਨ, ਜਦੋਂ ਉਨ੍ਹਾਂ ਨੇ ਉਨ੍ਹਾਂ ਨੂੰ ਆਪਣੀ ਇਹ ਰਿਪੋਰਟ ਸੌਂਪੀ ਸੀ ਕਿ ਅਮਰੀਕੀ ਮਦਦ ਲੈਣ ਵਾਲੇ ਮੁੱਖ ਦੇਸ਼ਾਂ ਵਿਚ ਸ਼ਾਮਲ ਹੋਣ ਦੇ ਬਾਵਜੂਦ ਪਾਕਿਸਤਾਨ ਨੇ ਨਾ ਕੇਵਲ ਯੂ ਐੱਨ ਓ ਵਿਚ ਅਮਰੀਕਾ ਦੇ ਖ਼ਿਲਾਫ਼ ਵੋਟ ਦਿੱਤੀ, ਬਲਕਿ ਅੱਤਵਾਦੀਆਂ ਨੂੰ ਸ਼ਰਨ ਵੀ ਦਿੱਤੀ ਹੈ।
ਇਸ ਸੰਬੰਧ ਵਿੱਚ ਨਿੱਕੀ ਹੇਲੀ ਨੇ ਆਪਣੀ ਕਿਤਾਬ ਵਿਚ ਲਿਖਿਆ ਹੈ ਕਿ ਅਸੀਂ ਪਾਕਿਸਤਾਨ ਨੂੰ ਹੋਰਨਾਂ ਦੇਸ਼ਾਂ ਦੇ ਮੁਕਾਬਲੇ ਵੱਧ ਮਦਦ ਦਿੱਤੀ ਤੇ ਸਾਲ 2017 ਵਿਚ ਅਮਰੀਕਾ ਨੇ ਉਸ ਦੀ ਫ਼ੌਜ ਨੂੰ ਕਰੀਬ ਇਕ ਅਰਬ ਅਮਰੀਕੀ ਡਾਲਰ ਦਿੱਤੇ ਸਨ, ਪਰ ਪਾਕਿਸਤਾਨ ਯੂ ਐੱਨ ਵਿਚ 76 ਫੀਸਦੀ ਸਮਾਂ ਸਾਡਾ ਵਿਰੋਧ ਕਰਦਾ ਹੈ। ਸਭ ਤੋਂ ਬੁਰੀ ਇਹ ਗੱਲ ਹੈ ਕਿ ਉਹ ਅੱਤਵਾਦੀਆਂ ਨੂੰ ਸ਼ਰਨ ਦਿੰਦਾ ਹੈ, ਜਿਹੜੇ ਸਾਡੇ ਅਮਰੀਕੀ ਫ਼ੌਜੀਆਂ ਨੂੰ ਮਾਰਨ ਜਾਂਦੇ ਹਨ।ਹੇਲੀ ਨੇ ਕਿਹਾ ਕਿ ਇਨ੍ਹਾਂ ਸਭ ਕਾਰਨਾਂ ਅਤੇ ਹੋਰ ਚੀਜ਼ਾਂ ਬਾਰੇ ਮੈਂ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੂੰ ਜਾਣੂ ਕਰਾਇਆ ਤਾਂ ਉਹ ਨਾਰਾਜ਼ ਹੋ ਗਏ। ਉਸ ਦੇ ਤੁਰੰਤ ਬਾਅਦ ਉਨ੍ਹਾਂ ਨੇ ਕਾਂਗਰਸ ਤੋਂ ਇਕ ਬਿੱਲ ਪਾਸ ਕਰਾਉਣ ਨੂੰ ਕਿਹਾ। ਇਸ ਵਿਚ ਇਹ ਨਿਸ਼ਚਿਤ ਕਰਨਾ ਸੀ ਕਿ ਅਮਰੀਕੀ ਵਿਦੇਸ਼ੀ ਮਦਦ ਕੇਵਲ ਅਮਰੀਕੀ ਹਿੱਤਾਂ ਤੇ ਅਮਰੀਕੀ ਮਿੱਤਰਾਂ ਨੂੰ ਉਤਸ਼ਾਹ ਦੇਣ ਲਈ ਦਿੱਤੀ ਜਾਏ।