ਚੰਡੀਗੜ੍ਹ, 11 ਨਵੰਬਰ (ਪੋਸਟ ਬਿਊਰੋ)- ਪਾਕਿਸਤਾਨ ਵਿਚਲੇ ਗੁਰਦੁਆਰਾ ਦਰਬਾਰ ਸਾਹਿਬ ਕਰਤਾਰਪੁਰ ਦੇ ਲਾਂਘੇ ਦਾ ਖੁੱਲ੍ਹਣਾ ਸ੍ਰੀ ਗੁਰੂ ਨਾਨਕ ਦੇਵ ਜੀ ਦੇ 550 ਸਾਲਾ ਪ੍ਰਕਾਸ਼ ਪੁਰਬ ਸਮਾਗਮਾਂ ਦਾ ਸਭ ਤੋਂ ਸ਼ਾਨਦਾਰ ਪੱਖ ਸਮਜਿਆ ਜਾਂਦਾ ਹੈ ਤੇ ਦੂਜੇ ਸਾਰੇ ਸਮਾਗਮ ਉਸ ਦੇ ਸਾਹਮਣੇ ਛੋਟੇ ਪੈ ਜਾਂਦੇ ਹਨ। ਇਸ ਵੱਡੇ ਸਮਾਗਮ ਦਾ ਪ੍ਰਬੰਧ ਕਰਨ ਵਿੱਚ ਚੜ੍ਹਦੇ ਤੇ ਲਹਿੰਦੇ ਪੰਜਾਬ ਦੀਆਂ ਦੋਵਾਂ ਸਰਕਾਰਾਂ ਨੇ ਸਾਰੀ ਵਾਹ ਲਾਈ ਸੀ। ਕਰਤਾਰਪੁਰ ਲਾਂਘੇ ਨੂੰ ਖੋਲ੍ਹਣ ਦੇ ਮਾਮਲੇ ਵਿੱਚ ਭਾਰਤੀ ਪੰਜਾਬ ਦੀ ਸਰਕਾਰ ਨੇ ਬੜੀਆਂ ਔਕੜਾਂ ਦੇ ਬਾਵਜੂਦ ਸ਼ਾਨਦਾਰ ਕੰਮ ਕੀਤਾ ਕਿਹਾ ਜਾਂਦਾ ਹੈ।
ਇਸ ਸੰਬੰਧ ਵਿੱਚ ਖਾਸ ਗੱਲ ਇਹ ਕਿ ਇਮੀਗਰੇਸ਼ਨ ਸੈਂਟਰ ਮੂਹਰੇ ਪੰਜਾਬ ਦੇ ਮੰਤਰੀ ਚਰਨਜੀਤ ਸਿੰਘ ਚੰਨੀ ਸਾਰੇ ਯਾਤਰੀਆਂ ਦੇ ਸਵਾਗਤ ਲਈ ਖੜ੍ਹੇ ਸਨ ਤੇ ਇਹ ਨਹੀਂ ਵੇਖਿਆ ਜਾ ਰਿਹਾ ਸੀ ਕਿ ਕੌਣ ਕਿਹੜੀ ਸਿਆਸੀ ਸਟੇਜ ਤੋਂ ਆਇਆ ਸੀ। ਹਰ ਕੋਈ ਬਰਾਬਰ ਦੇ ਸਵਾਗਤ ਤੇ ਸਤਿਕਾਰ ਦਾ ਪਾਤਰ ਸਮਝਿਆ ਜਾਣ ਕਰ ਕੇ ਵਾਰ-ਵਾਰ ਚਰਨਜੀਤ ਸਿੰਘ ਚੰਨੀ ਤੇ ਸੁਖਜਿੰਦਰ ਸਿੰਘ ਰੰਧਾਵਾ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਕੋਲ ਸਾਂਝਾ ਸਮਾਗਮ ਕਰਨ ਦੀ ਬੇਨਤੀ ਕਰਦੇ ਰਹੇ ਸਨ, ਪਰ ਸਿਆਸਤ ਪਰਦੇ ਪਿੱਛੇ ਖੇਡ ਖੇਡਦੀ ਰਹੀ ਤੇ ਆਖਰੀ ਮੌਕੇ ਤੇਕ ਪੰਜਾਬ ਸਰਕਾਰ ਦੇ ਪ੍ਰਬੰਧਕਾਂ ਨੂੰ ਇਹ ਵੀ ਨਹੀਂ ਪਤਾ ਲੱਗਾ ਕਿ ਪ੍ਰਧਾਨ ਮੰਤਰੀ ਨਾਲ ਇੱਕ ਹੋਰ ਜਥਾ ਆ ਰਿਹਾ ਹੈ। ਸਟੇਜ 'ਤੇ ਪੰਜਾਬ ਸਰਕਾਰ ਨੂੰ ਨੀਵਾਂ ਦਿਖਾਉਣ ਲਈ ਇੱਕ ਹੋਰ ਜਥਾ ਬਿਠਾਉਣ ਦੀ ਤਿਆਰੀ ਕੀਤੀ ਗਈ, ਪਰ ਅਖੀਰ ਉੱਤੇ ਪਹਿਲਾ ਕਦਮ ਅਕਾਲ ਤਖਤ ਦੇ ਕਾਰਜਕਾਰੀ ਜਥੇਦਾਰ ਗਿਆਨੀ ਹਰਪ੍ਰੀਤ ਸਿੰਘ ਨੂੰ ਜਥੇ ਦੀ ਅਗਵਾਈ ਸੌਂਪ ਕੇ ਚੁੱਕਿਆ ਗਿਆ ਤੇ ਪੰਜਾਬ ਸਰਕਾਰ ਵੱਲੋਂ ਭੇਜੇ 550 ਨਾਵਾਂ ਵਿੱਚੋਂ 150 ਨਾਂਅ ਕੱਟ ਕੇ ਸੁਖਬੀਰ ਸਿੰਘ ਬਾਦਲ ਦੇ ਗੁਪਤ ਜਥੇ ਨੂੰ ਆਖਰੀ ਵੇਲੇ ਪ੍ਰਧਾਨ ਮੰਤਰੀ ਮੋਦੀ ਨਾਲ ਡੇਰਾ ਬਾਬਾ ਨਾਨਕ ਭੇਜ ਦਿੱਤਾ ਗਿਆ। ਪੰਜਾਬ ਸਰਕਾਰ ਇਸ ਗੁਪਤ ਅਕਾਲੀ-ਭਾਜਪਾ ਯੋਜਨਾ ਤੋਂ ਬੇਖਬਰ ਸੀ, ਪਰ ਇਸ ਚੱਕਰ ਵਿੱਚ ਆਮ ਲੋਕ ਦੁਖੀ ਹੋਏ। ਉਸ ਖਾਸ ਜਥੇ ਵਿੱਚ ਉਹ ਸਾਰੇ ਲੋਕ ਸਨ, ਜੋ ਖਾਸ ਦੇ ਖਾਤੇ ਵਿੱਚ ਨਹੀਂ ਆ ਸਕਦੇ। ਇੱਕ ਪਲ ਗੇਟ 'ਤੇ ਖੜ੍ਹੇ ਲੋਕਾਂ ਵਿੱਚ ਡਰ ਦਾ ਮਾਹੌਲ ਵੀ ਬਣਿਆ, ਜੇ ਕੁਝ ਹੋਰ ਸ਼ਰਧਾਲੂ ਹੁੰਦੇ ਤਾਂ ਡਰ ਸੱਚਾ ਵੀ ਸਾਬਤ ਹੋ ਸਕਦਾ ਸੀ, ਜਿਸ ਤੋਂ ਆਖਰ ਨੂੰ ਬਚਾਅ ਹੋ ਗਿਆ।