ਨਕੋਦਰ, 10 ਨਵੰਬਰ (ਪੋਸਟ ਬਿਊਰੋ)- ਇਸ ਨਗਰ ਦੇ ਥਾਣਾ ਸਿਟੀ ਦੀ ਪੁਲਸ ਨੇ ਧੋਖਾਧੜੀ ਅਤੇ ਅਪਰਾਧਕ ਸਾਜ਼ਿਸ਼ ਦੇ ਦੋਸ਼ ਵਿੱਚ ਇੱਕ ਮਹਿਲਾ ਸਮੇਤ ਪੰਜ ਜਣਿਆਂ ਖਿਲਾਫ ਕੇਸ ਦਰਜ ਕੀਤਾ ਹੈ।
ਥਾਣਾ ਇੰਚਾਰਜ ਮੁਹੰਮਦ ਜ਼ਮੀਲ ਨੇ ਦੱਸਿਆ ਕਿ ਲਾਂਬਾ ਪੁਲਸ ਸਟੇਸ਼ਨ ਹੇਠਲੇ ਸੰਗਲ ਸੋਹਲ ਪਿੰਡ ਦੇ ਸੁਖਦੀਪ ਸਿੰਘ ਨੇ ਜਲੰਧਰ (ਦਿਹਾਤੀ) ਦੇ ਡਿਪਟੀ ਸੁਪਰਡੈਂਟ ਨੂੰ ਸ਼ਿਕਾਇਤ ਕੀਤੀ ਸੀ ਕਿ ਉਸ ਨੇ 12 ਏਕੜ ਜ਼ਮੀਨ ਦੀਆਂ ਤਿੰਨ ਰਜਿਸਟਰੀਆਂ ਕਰਾਈਆਂ ਹਨ, ਜੋ ਨਕੋਦਰ ਤਹਿਸੀਲ ਵਿੱਚ ਦਰਜ ਹਨ। ਬਾਅਦ ਵਿੱਚ ਉਸ ਨੂੰ ਇਹ ਪਤਾ ਲੱਗਾ ਕਿ ਜਾਅਲੀ ਮੁਖਤਿਆਰਨਾਮਾ ਅਤੇ ਜਾਅਲੀ ਆਧਾਰ ਕਾਰਡ ਬਣਾ ਕੇੇ ਸਾਡੇ ਨਾਲ ਧੋਖਾ ਕੀਤਾ ਗਿਆ ਹੈ ਅਤੇ ਦਵਿੰਦਰ ਸਿੰਘ ਵਾਲੀਆ ਨੇ ਜਾਅਲੀ ਮੁਖਤਿਆਰਨਾਮਾ ਆਪਣੇ ਨਾਂਅ ਬਣਵਾਇਆ ਤੇ ਇੱਕ ਬੇਨਾਮੀ ਔਰਤ ਨੇ ਊਸ਼ਾ ਰਾਣੀ ਬਣ ਕੇ ਪੇਸ਼ ਹੋ ਕੇ ਜਾਅਲੀ ਆਧਾਰ ਕਾਰਡ ਲਗਾ ਕੇ ਗੋਰਾਇਆ ਤਹਿਸੀਲ ਵਿੱਚ ਮੁਖਤਿਆਰਨਾਮਾ ਦਵਿੰਦਰ ਸਿੰਘ ਦੇ ਨਾਂਅ 'ਤੇ ਦਰਜ ਕਰਵਾਇਆ ਹੈ। ਆਰਥਿਕ ਅਪਰਾਧ ਸੈੱਲ ਜ਼ਿਲਾ ਜਲੰਧਰ (ਰੂਰਲ) ਨੇ ਆਪਣੀ ਜਾਂਚ ਰਿਪੋਰਟ ਵਿੱਚ ਕਿਹਾ ਕਿ ਸੋਚੀ ਸਮਝੀ ਸਾਜ਼ਿਸ਼ ਫਰਜ਼ੀ ਪਾਵਰ ਆਫ ਅਟਾਰਨੀ ਅਤੇ ਆਧਾਰ ਕਾਰਡ ਤਿਆਰ ਕਰਵਾ ਕੇ ਰਜਿਸਟਰੀਆਂ ਕਰਵਾ ਕੇ 1,68,50,000 ਰੁਪਏ ਦੀ ਠੱਗੀ ਕੀਤੀ ਹੈ। ਜਾਂਚ ਰਿਪੋਰਟ 'ਤੇ ਡੀ ਏ ਲੀਗਲ ਦੀ ਰਾਏ ਉਪਰੰਤ ਐੱਸ ਐੱਸ ਪੀ ਦੇ ਹੁਕਮਾਂ 'ਤੇ ਪੁਲਸ ਨੇ ਊਸ਼ਾ ਰਾਣੀ ਵਾਸੀ ਖਲਵਾੜਾ ਰੋਡ ਫਗਵਾੜਾ ਸ਼ਹੀਦ ਜਰਨੈਲ ਸਿੰਘ ਨਗਰ ਲੁਧਿਆਣਾ ਦੇ ਵਾਸੀ ਜਸਵਿੰਦਰ ਸਿੰਘ, ਚੱਕ ਕਲਾਲ ਪਿੰਡ (ਐ/ੱਸ ਬੀ ਐੱਸ ਨਗਰ) ਦੇ ਵਾਸੀ ਦਵਿੰਦਰ ਸਿੰਘ ਵਾਲੀਆ, ਦੁਸਾਂਝ ਕਲਾਂ ਪਿੰਡ ਵਾਸੀ ਪਲਵਿੰਦਰ ਸਿੰਘ ਅਤੇ ਬੜਾ ਪਿੰਡ ਵਾਸੀ ਹਰਜੀਤ ਸਿੰਘ ਦੇ ਖਿਲਾਫ ਕੇਸ ਦਰਜ ਕਰ ਲਿਆ ਹੈ ਤੇ ਅੱਗੇ ਦੀ ਜਾਂਚ, ਜਾਂਚ ਅਧਿਕਾਰੀ ਏ ਐੱਸ ਆਈ ਜੀਤ ਸਿੰਘ ਨੂੰ ਸੌਂਪ ਦਿੱਤੀ ਹੈ।