ਨਵੀਂ ਦਿੱਲੀ, 12 ਅਕਤੂਬਰ (ਪੋਸਟ ਬਿਊਰੋ)- ਆਪਣੇ ਤੋਂ ਪੰਜ ਸਾਲ ਜੂਨੀਅਰ ਸਾਥੀ ਦੇ ਸਿੱਖਿਆ ਸਰਟੀਫਿਕੇਟਾਂ ਦਾ ਇਸਤੇਮਾਲ ਕਰਕੇ 2007 ਵਿੱਚ ਯੂਨੀਅਨ ਪਬਲਿਕ ਸਰਵਿਸ ਕਮਿਸ਼ਨ ਦੀ ਪ੍ਰੀਖਿਆ ਵਿੱਚ ਬੈਠ ਅਤੇ ਪਾਸ ਹੋਏ ਆਈ ਆਰ ਐਸ ਅਧਿਕਾਰੀ ਦੇ ਖਿਲਾਫ ਸੀ ਬੀ ਆਈ ਨੇ ਧੋਖਾਦੇਹੀ ਦਾ ਮਾਮਲਾ ਦਰਜ ਕੀਤਾ ਹੈ।
ਅਧਿਕਾਰੀਆਂ ਦੇ ਦੱਸਣ ਮੁਤਾਬਕ ਕਸਟਮ ਅਤੇ ਸੈਂਟਰਲ ਐਕਸਾਈਜ਼ ਵਿੱਚ ਕੰਮ ਕਰਦੇ 2007 ਬੈਚ ਦੇ ਭਾਰਤੀ ਰੈਵੇਨਿਊ ਸੇਵਾ (ਆਈ ਆਰ ਐਸ) ਦੇ ਇੱਕ ਅਫਸਰ ਨਵਨੀਤ ਕੁਮਾਰ ਨੇ ਯੂਨੀਅਨ ਪਬਲਿਕ ਸਰਵਿਸ ਕਮਿਸ਼ਨ ਦੀ ਪ੍ਰੀਖਿਆ ਵਿੱਚ ਬੈਠਣ ਲਈ ਫਰਜ਼ੀ ਜਨਮ ਤਰੀਕ ਤੇ ਸਿੱਖਿਆਂ ਸਰਟੀਫਿਕੇਟਾਂ ਦੀ ਵਰਤੋਂ ਕੀਤੀ ਸੀ। ਜਾਂਚ ਏਜੰਸੀ ਨੂੰ ਸ਼ੱਕ ਹੈ ਕਿ ਨਵਨੀਤ ਕੁਮਾਰ ਅਸਲ ਵਿੱਚ ਰਾਜੇਸ਼ ਕੁਮਾਰ ਸ਼ਰਮਾ ਹੈ, ਜਿਸ ਨੇ ਮਿਥੀ ਉਮਰ ਸੀਮਾ ਟੱਪਟ ਪਿੱਛੋਂ 2007 ਦੀ ਪ੍ਰੀਖਿਆ ਵਿਚ ਬੈਠਣ ਲਈ ਨਵਨੀਤ ਦੇ ਸਰਟੀਫਿਕੇਟਾਂ ਦਾ ਇਸਤੇਮਾਲ ਕੀਤਾ। ਜਾਂਚ ਤੋਂ ਪਤਾ ਲੱਗਾ ਹੈ ਕਿ ਨਵਨੀਤ ਦਾ ਜਨਮ 15 ਜੂਨ 1980 ਨੂੰ ਹੋਇਆ ਸੀ ਤੇ ਉਸ ਨੇ 1996 ਵਿੱਚ ਹਾਈ ਸਕੂਲ, 2003 ਵਿੱਚ ਇੰਟਰਮੀਡੀਅਟ ਅਤੇ 2008 ਵਿੱਚ ਗੈਜੂਏਟ ਦੀ ਪ੍ਰੀਖਿਆ ਪਾਸ ਕੀਤੀ। ਰਾਜੇਸ਼ ਨੇ ਬਿਹਾਰ ਦੇ ਬੇਤੀਆ ਤੋਂ ਸੀ ਬੀ ਐਸ ਈ ਬੋਰਡ ਤੋਂ 1991 ਵਿੱਚ 10ਵੀਂ ਦੀ ਪ੍ਰੀਖਿਆ ਅਤੇ 1993 ਵਿੱਚ 12ਵੀਂ ਦੀ ਪ੍ਰੀਖਿਆ ਪਾਸ ਕੀਤੀ। ਕੇਸ ਦੇ ਮੁਤਾਬਕ ਰਾਜੇਸ਼ ਜਦੋਂ ਯੂਪੀ ਐਸ ਸੀ ਪ੍ਰੀਖਿਆ ਵਿੱਚ ਬੈਠਣ ਲਈ ਮਿਥੀ ਉਮਰ ਹੱਦ ਪਾਰ ਕਰ ਗਿਆ ਤਾਂ ਉਸ ਨੇ ਨਵਨੀਤ ਦੇ ਨਾਂ ਦੇਸਰਟੀਫਿਕੇਟ ਬਣਵਾਏ, ਪਰ ਘਰ ਦਾ ਪਤਾ ਤੇ ਪਿਤਾ ਦਾ ਨਾਂ ਉਹੀ ਰੱਖਿਆ। ਸੀ ਬੀ ਆਈ ਦਾ ਦੋਸ ਹੈ ਕਿ ਸਰਟੀਫਿਕੇਟਾਂ ਦੀ ਤਸਦੀਕ ਦੌਰਾਨ ਬੇਤੀਆ ਦੇ ਉਪ ਚੋਣ ਅਧਿਕਾਰੀ, ਸਾਬਕਾ ਅਤੇ ਮੌਜੂਦਾ ਸਰਪੰਚ ਅਤੇ ਪਿੰਡ ਵਿੱਚ ਰਹਿੰਦੇ ਹੋਰ ਲੋਕਾਂ ਦੇ ਬਿਆਨ ਦੱਸਦੇ ਹਨ ਕਿ ਰਾਜੇਸ਼ ਕੁਮਾਰ ਸ਼ਰਮਾ ਨੇ ਨਵਨੀਤ ਦੇ ਸਰਟੀਫਿਕੇਟਾਂ ਦਾ ਇਸਤੇਮਾਲ ਕੀਤਾ। ਸੀ ਬੀ ਆਈ ਦਾ ਦੋਸ਼ ਹੈ ਕਿ ਨਵਨੀਤ ਨੇ ਅਜੇ ਤੱਕ ਜਨਮ ਤਰੀਕ ਅਤੇ 2003 ਵਿੱਚ ਇੰਟਰਮੀਡੀਅਟ ਪ੍ਰੀਖਿਆ ਪਾਸ ਕਰਨ ਦਾ ਕਿਸੇ ਵੀ ਤਰ੍ਹਾਂ ਦਾ ਸਰਟੀਫਿਕੇਟ ਜਮ੍ਹਾਂ ਨਹੀਂ ਕਰਾਇਆ। ਜਾਂਚ ਏਜੰਸੀ ਦਾ ਇਹ ਵੀ ਦੋਸ਼ ਹੈ ਕਿ ਬਿਹਾਰ ਵਿਦਿਆਲਾ ਪ੍ਰੀਖਿਆ ਸਮਿਤੀ (ਬਿਹਾਰ ਸਿੱਖਿਆ ਬੋਰਡ) ਨੇ ਨਵਨੀਤ ਦੇ ਸਰਟੀਫਿਕੇਟ ਪਰਖਣ ਵਿੱਚ ਕੋਈ ਸਹਿਯੋਗ ਨਹੀ ਕੀਤਾ।