ਰਾਂਚੀ, 10 ਅਕਤੂਬਰ (ਪੋਸਟ ਬਿਊਰੋ)- ਸਥਾਨਕ ਜ਼ਿਲ੍ਹਾ ਅਦਾਲਤ ਨੇ ਭਾਰਤੀ ਜਨਤਾ ਪਾਰਟੀ ਦੇ ਇੱਕ ਵਿਧਾਇਕ ਧੂਲੇ ਮਹਿਤੋ ਨੂੰ ਛੇ ਸਾਲ ਪਹਿਲਾਂ 2013 ਦਰਜ ਹੋਏ ਕੇਸ ਦਾ ਦੋਸ਼ੀ ਮੰਨਦੇ ਹੋਏ 18 ਮਹੀਨੇ ਦੀ ਜੇਲ੍ਹ ਦੀ ਸਜ਼ਾ ਦਿੱਤੀ ਹੈ। ਬਾਘਮਾਰਾ ਵਿਧਾਨ ਸਭਾ ਹਲਕੇ ਦੇ ਇਸ ਵਿਧਾਇਕ ਨੂੰ ਇੱਕ ਵਿਅਕਤੀ ਨੂੰ ਪੁਲਸ ਹਿਰਾਸਤ ਵਿੱਚੋਂ ਭਜਾਉਣ ਦਾ ਦੋਸ਼ੀ ਪਾਇਆ ਗਿਆ ਸੀ। ਇਹ ਘਟਨਾ 12 ਮਈ 2013 ਨੂੰ ਵਾਪਰੀ ਸੀ।
ਵਰਨਣ ਯੋਗ ਹੈ ਕਿ ਅਦਾਲਤੀ ਹੁਕਮਾਂ ਉਤੇ ਰਾਜੇਸ਼ ਕੁਮਾਰ ਨਾਮੀ ਇੱਕ ਵਿਅਕਤੀ ਨੂੰ ਗ੍ਰਿਫਤਾਰ ਕੀਤਾ ਗਿਆ ਸੀ। ਭਾਜਪਾ ਵਿਧਾਇਕ ਧੂਲੋ ਮਹਿਤੋ ਆਪਣੇ ਹਮਾਇਤੀਆਂ ਨਾਲ ਪੁਲਸ ਸਟੇਸ਼ਨ ਪੁੱਜਾ ਅਤੇ ਉਥੇ ਪੁਲਸ ਮੁਲਾਜ਼ਮਾਂ 'ਤੇ ਹਮਲਾ ਕਰ ਕੇ ਰਾਜੇਸ਼ ਨੂੰ ਛੁਡਵਾ ਲਿਆ। ਪੁਲਸ ਨੇ ਵਿਧਾਇਕ ਅਤੇ ਪੰਜ ਹੋਰਨਾਂ ਵਿਅਕਤੀਆਂ ਵਿਰੁੱਧ ਮਾਮਲਾ ਦਰਜ ਕੀਤਾ ਸੀ। ਧੂਲੋ ਮਹਿਤੋ ਦੇ ਵਿਰੁੱਧ ਧਨਬਾਦ 'ਚ ਕਈ ਹੋਰ ਅਪਰਾਧਕ ਕੇਸ ਵੀ ਹਨ। ਕੁਝ ਦਿਨ ਪਹਿਲਾਂ ਵਿਧਾਇਕ ਵਿਰੁੱਧ ਬਲਾਤਕਾਰ ਦੇ ਯਤਨ ਦਾ ਇੱਕ ਮਾਮਲਾ ਵੀ ਦਰਜ ਕੀਤਾ ਗਿਆ ਸੀ।