ਅੰਮ੍ਰਿਤਸਰ, 10 ਅਕਤੂਬਰ (ਪੋਸਟ ਬਿਊਰੋ)- ਪੰਜਾਬ ਰਾਜ ਪਾਵਰ ਕਾਰਪੋਰੇਸ਼ਨ ਸਰਹੱਦੀ ਜ਼ੋਨ ਦੇ ਚੀਫ ਇੰਜੀਨੀਅਰ ਸੰਦੀਪ ਕੁਮਾਰ ਨੂੰ ਡਿਊਟੀ ਤੋਂ ਕੁਤਾਹੀ/ ਅਣਗਹਿਲੀ ਦੇ ਦੋਸ਼ ਹੇਠ ਪੰਜਾਬ ਰਾਜ ਬਿਜਲੀ ਬੋਰਡ ਕਰਮਚਾਰੀ (ਸਜ਼ਾ ਅਤੇ ਅਪੀਲ) ਰੈਗੂਲੇਸ਼ਨ 1971 ਦੇ ਨਿਯਮ-4 ਅਧੀਨ ਹੇਠ ਸਸਪੈਂਡ ਮੁਅੱਤਲ ਕੀਤਾ ਗਿਆ ਹੈ। 

ਵਰਨਣ ਯੋਗ ਹੈ ਕਿ ਸੋਸ਼ਲ ਮੀਡੀਏ ਉਤੇ ਕੱਲ੍ਹ ਇੱਕ ਆਡੀਓ ਵਾਇਰਲ ਹੋਈ ਸੀ, ਜਿਸ ਵਿੱਚ ਫੋਨ ਉਤੇ ਇੱਕ ਠੇਕੇਦਾਰ ਦੇ ਨਜ਼ਦੀਕੀ ਦੱਸੇ ਜਾਂਦੇ ਵਿਅਕਤੀ ਨਾਲ ਚੀਫ ਇੰਜੀਨੀਅਰ ਵੱਲੋਂ ਕੀਤੇ ਕੰਮਾਂ ਵਿੱਚੋਂ ਕਮਿਸ਼ਨ ਪੂਰਾ ਨਾ ਦਿੱਤੇ ਜਾਣ ਕਾਰਨ ਅਤੇ ਉਸ ਠੇਕੇਦਾਰ ਵੱਲੋਂ ਫੋਨ ਨਾ ਚੁੱਕਣ ਬਾਰੇ ਗੱਲਬਾਤ ਕੀਤੀ ਗਈ ਹੈ ਅਤੇ ਆਪਣਾ ਹਿੱਸਾ ਸੱਤ ਫੀਸਦੀ ਲੈਣ ਦੀ ਗੱਲਬਾਤ ਹੁੰਦੀ ਹੈ। ਇਸ ਆਡੀਓ ਵਿੱਚ ਆ ਰਹੇ ਨਾਂਅ ਦੇ ਠੇਕੇਦਾਰ ਨੇ ਇਨ੍ਹਾਂ ਦੋਸ਼ਾਂ ਨੂੰ ਨਕਾਰਦਿਆਂ ਕਿਸੇ ਤਰ੍ਹਾਂ ਦੇ ਕਮਿਸ਼ਨ ਦੀ ਕੋਈ ਵੀ ਜਾਣਕਾਰੀ ਹੋਣ ਤੋਂ ਬਿਲਕੁਲ ਇਨਕਾਰ ਕੀਤਾ, ਪਰ ਇਸ ਦੇ ਸੱਚ ਦਾ ਨਿਤਾਰਾ ਪੜਤਾਲ ਦੇ ਬਾਅਦ ਹੋਵੇਗਾ। ਸਸਪੈਂਸ਼ਨ ਸਮੇਂ ਉਪਰੋਕਤ ਅਫਸਰ ਨੂੰ ਪੰਜਾਬ ਰਾਜ ਬਿਜਲੀ ਬੋਰਡ ਦੀ ਨਿਯਮਾਂਵਲੀ 1972 ਦਾ ਭਾਗ ਇੱਕ ਦੇ ਰੈਗੂਲੇਸ਼ਨ-7/2 ਅਨੁਸਾਰ ਗੁਜ਼ਾਰਾ ਭੱਤਾ ਮਿਲੇਗਾ।
ਮੁੱਖ ਇੰਜੀਨੀਅਰ ਸੰਦੀਪ ਕੁਮਾਰ ਦੀ ਰਿਸ਼ਵਤਖੋਰੀ ਬਾਰੇ ਜਿਹੜੀ ਆਡੀਓ ਸੀ ਐੱਮ ਜੀ ਬਲਦੇਵ ਸਿੰਘ ਸਰਾਂ ਕੋਲ ਪੁੱਜੀ ਹੈ, ਉਸ ਵਿੱਚ ਮੁੱਖ ਇੰਜੀਨੀਅਰ ਇੱਕ ਠੇਕੇਦਾਰ ਨਾਲ ਗੱਲ ਕਰ ਰਿਹਾ ਹੈ, ਜਿਸ ਵਿੱਚ ਮੁੱਖ ਇੰਜੀਨੀਅਰ ਠੇਕੇਦਾਰ ਨੂੰ ਆਖਦਾ ਹੈ ਕਿ ਢਾਈ ਲੱਖ ਰੁਪਏ ਆ ਗਏ ਹਨ ਅਤੇ ਬਚਦੇ ਅੱਸੀ ਹਜ਼ਾਰ ਰੁਪਏ ਹੋਰ ਦੇਣੇ ਹਨ। ਇਸ ਦੇ ਜਵਾਬ ਵਿੱਚ ਠੇਕੇਦਾਰ ਆਖਦਾ ਹੈ ਕਿ ਉਹ ਸੋਮਵਾਰ ਨੂੰ ਉਸ ਵਿਅਕਤੀ ਨੂੰ ਤੁਹਾਡੇ ਕੋਲ ਲੈ ਆਵੇਗਾ, ਜਿਸ ਨੇ ਬਾਕੀ ਦੀ ਰਕਮ ਦੇਣੀ ਹੈ। ਮੁੱਖ ਇੰਜੀਨੀਅਰ ਇਹ ਵੀ ਆਖਦਾ ਹੈ ਕਿ ਜਿਸ ਕੰਮ ਦੀ ਕੀਮਤ 4200 ਰੁਪਏ ਹੈ, ਉਸ ਨੂੰ ਉਸ ਨੇ 4800 ਰੁਪਏ ਵਿੱਚ ਕਰ ਦਿੱਤਾ ਹੈ, ਜੋ ਹੋਰ ਕੋਈ ਵੀ ਨਹੀਂ ਕਰ ਸਕਦਾ ਸੀ।ੇ