ਨਵੀਂ ਦਿੱਲੀ, 8 ਅਕਤੂਬਰ (ਪੋਸਟ ਬਿਊਰੋ)- ਪੰਜਾਬ 'ਚ ਵੱਧ ਰਹੀਆਂ ਅੱਤਵਾਦੀ ਗਤੀਵਿਧੀਆਂ ਨੂੰ ਵੇਖਦਿਆਂ ਕੇਂਦਰ ਸਰਕਾਰ ਵੱਲੋਂ ਏਥੇ ਨੈਸ਼ਨਲ ਸਕਿਉਰਟੀ ਗਾਰਡਜ਼ (ਐਨ ਐਸ ਜੀ) ਦੇ ਕਮਾਂਡੋਜ਼ ਦਾ ਖੇਤਰੀ (ਰੀਜਨਲ) ਹੱਬ ਬਣਾਉਣ ਬਾਰੇ ਵਿਚਾਰ ਕੀਤੀ ਜਾ ਰਹੀ ਹੈ। ਸੂਤਰਾਂ ਮੁਤਾਬਕ ਕੇੇਂਦਰੀ ਗ੍ਰਹਿ ਮੰਤਰਾਲੇ ਅਤੇ ਪੰਜਾਬ ਸਰਕਾਰ ਵੱਲੋਂ ਐਨ ਐਸ ਜੀ ਦਾ ਕੇਂਦਰ ਸਥਾਪਿਤ ਕਰਨ ਬਾਰੇ ਵਿਆਪਕ ਯੋਜਨਾ ਤਿਆਰ ਕੀਤੀ ਜਾ ਰਹੀ ਹੈ ਅਤੇ ਇਸ ਬਾਰੇ ਕੇਂਦਰ ਵੱਲੋਂ ਪੰਜਾਬ ਸਰਕਾਰ ਨੂੰ ਪਠਾਨਕੋਟ ਜਾਂ ਅੰਮ੍ਰਿਤਸਰ 'ਚ ਜ਼ਮੀਨ ਦੇਣ ਲਈ ਕਿਹਾ ਗਿਆ ਹੈ।
ਜਾਣਕਾਰ ਸੂਤਰਾਂ ਮੁਤਾਬਕ ਇਸ ਹੱਬ ਵਿੱਚ ਐਨ ਐਸ ਜੀ ਕਮਾਂਡੋਜ਼ ਦੀ ਅਜਿਹੀ ਟੀਮ ਹੋਵੇਗੀ, ਜੋ ਅੱਤਵਾਦੀ ਗਤੀਵਿਧੀਆਂ ਵਿਰੁੱਧ ਕੰਮ ਕਰੇਗੀ ਅਤੇ ਪੰਜਾਬ ਦੇ ਨਾਲ ਜੰਮੂ-ਕਸ਼ਮੀਰ 'ਚ ਵੀ ਸਰਗਰਮ ਰਹੇਗੀ। ਆਪਣੀ ਪਛਾਣ ਗੁਪਤ ਰੱਖਣ ਦੀ ਸ਼ਰਤ 'ਤੇ ਕੇਂਦਰੀ ਗ੍ਰਹਿ ਮੰਤਰਾਲੇ ਦੇ ਇੱਕ ਅਧਿਕਾਰੀ ਨੇ ਦੱਸਿਆ ਕਿ ਪੰਜਾਬ ਸਰਕਾਰ ਐਨ ਐਸ ਜੀ ਹੱਬ ਲਈ ਪਠਾਨਕੋਟ 'ਚ ਜ਼ਮੀਨ ਦੇਣ ਲਈ ਤਿਆਰ ਹੈ, ਜਦਕਿ ਬਿਹਤਰ ਗਤੀਵਿਧੀ ਤੇ ਸਹਿਯੋਗ ਲਈ ਅੰਮ੍ਰਿਤਸਰ 'ਚ ਜ਼ਮੀਨ ਦੇਣ ਬਾਰੇ ਗੱਲਬਾਤ ਜਾਰੀ ਹੈ। ਇਸ ਸਮੇਂ ਮੁੰਬਈ, ਕੋਲਕਾਤਾ, ਚੇਨਤੀ, ਹੈਦਰਾਬਾਦ ਤੇ ਗੁਜਰਾਤ ਐਨ ਐਸ ਜੀ ਹੱਬ ਹਨ ਅਤੇ ਜੇ ਪੰਜਾਬ ਵਿੱਚ ਬਣਿਆ ਤਾਂ ਇਹ ਦੇਸ਼ ਦਾ 6ਵਾਂ ਐਨ ਐਸ ਜੀ ਹੱਬ ਹੋਵੇਗਾ, ਜਿਸ ਦੇ ਜ਼ਿੰਮੇ ਪੂਰੇ ਉੱਤਰ ਭਾਰਤ ਦੇ ਸਾਰੇ ਪਹਾੜੀ ਇਲਾਕੇ ਵੀ ਹੋਣਗੇ। ਬੀਤੇ ਦਿਨੀਂ ਪੰਜਾਬ ਦੇ ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਨੇ ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਨਾਲ ਮੁਲਾਕਾਤ ਵੇਲੇ ਪੰਜਾਬ 'ਚ ਸਰਗਰਮ ਹੋ ਰਹੇ ਖਾੜਕੂਵਾਦ ਦਾ ਮੁੱਦਾ ਉਠਾਇਆ ਸੀ। ਸੂਤਰਾਂ ਮੁਤਾਬਕ ਪੰਜਾਬ 'ਚ ਇਹ ਕੇਂਦਰ ਬਣਨ 'ਤੇ ਪੰਜਾਬ ਪੁਲਸ ਦੀ ਕਮਾਂਡ 'ਚ ਐਨ ਐਸ ਜੀ ਕਮਾਂਡੋਜ਼ ਵੀ ਹੋਣਗੇ ਅਤੇ ਉਹ ਪੰਜਾਬ ਪੁਲਸ ਦੀ ਸਪੈਸ਼ਲ ਫੋਰਸ ਨੂੰ ਅੱਤਵਾਦ ਦੇ ਨਾਲ ਅਗਵਾ ਦੀਆਂ ਘਟਨਾਵਾਂ ਬਾਰੇ ਵੀ ਸਿਖਲਾਈ ਦੇਣਗੇ।