ਲੁਧਿਆਣਾ, 7 ਅਕਤੂਬਰ (ਪੋਸਟ ਬਿਊਰੋ)- ਇਸ ਮਹਾਨਗਰ ਦੇ ਤਾਜਪੁਰ ਰੋਡ ਉੱਤੇ ਡਾਈਂਗ ਵਿੱਚ ਕੈਮੀਕਲ ਤੋਂ ਬਣੀ ਗੈਸ ਚੜ੍ਹਨ ਨਾਲ ਦੋ ਮਜ਼ਦੂਰਾਂ ਦੀ ਮੌਤ ਹੋ ਗਈ ਅਤੇ ਤੀਸਰੇ ਦੀ ਹਾਲਤ ਗੰਭੀਰ ਹੈ। ਹਾਦਸੇ ਤੋਂ ਤੁਰੰਤ ਬਾਅਦ ਤਿੰਨਾਂ ਨੂੰ ਸੀ ਐਮ ਸੀ ਦਾਖਲ ਕਰਵਾਇਆ ਗਿਆ, ਜਿੱਥੇ ਦੋ ਦੀ ਮੌਤ ਹੋ ਗਈ।
ਤਾਜਪੁਰ ਰੋਡ ਉੱਤੇ ਬਲਰਾਮ ਟੈਕਸਟਾਈਲ ਦੀ ਬਲਰਾਮ ਡਾਈਂਗ ਵਿੱਚ ਕੱਪੜਾ ਰੰਗਣ ਦਾ ਵੱਡਾ ਯੂਨਿਟ ਚੱਲਦਾ ਹੈ। ਦੁਪਹਿਰ ਸਮੇਂ ਇੱਥੇ ਵਾਟਰ ਟਰੀਟਮੈਂਟ ਟੈਂਕ ਵਿੱਚ ਤਿੰਨ ਮਜ਼ਦੂਰ ਰਜਿੰਦਰ ਪਾਠਕ ਵਾਸੀ ਕਮਹਰੀਆ ਥਾਣਾ ਲਾਲ ਗੰਜ ਉੱਤਰ ਪ੍ਰਦੇਸ਼, ਰਾਜੂ ਕੁਮਾਰ ਅਤੇ ਨਗਿੰਦਰ ਕੁਮਾਰ ਕੰਮ ਕਰ ਰਹੇ ਸਨ। ਜਦੋਂ ਪਾਣੀ ਵਿੱਚ ਕੈਮੀਕਲ ਪਾਇਆ ਤਾਂ ਗੈੈਸ ਬਣ ਗਈ ਅਤੇ ਤਿੰਨੇ ਬੇਹੋਸ਼ ਹੋ ਕੇ ਡਿੱਗ ਗਏ। ਮੌਕੇ 'ਤੇ ਮੌਜੂਦ ਹੋਰ ਮਜ਼ਦੂਰਾਂ ਵੱਲੋਂ ਰੌਲਾ ਪਾਉਣ 'ਤੇ ਲੋਕ ਇੱਕਠੇ ਹੋ ਗਏ। ਤਿੰਨਾਂ ਨੂੰ ਐਬੂਲੈਂਸ ਰਾਹੀ ਸੀ ਐਮ ਸੀ ਵਿੱਚ ਦਾਖਲ ਕਰਵਾਇਆ ਗਿਆ ਸੀ। ਦੇਰ ਸ਼ਾਮ ਰਾਜੂ ਤੇ ਰਜਿੰਦਰ ਦੀ ਮੌਤ ਹੋ ਗਈ, ਪਰ ਨਰਿੰਦਰ ਦੀ ਹਾਲਤ ਗੰਭੀਰ ਬਣੀ ਹੋਈ ਹੈ। ਨਰਿੰਦਰ ਅਤੇ ਰਾਜੂ ਦੋਵੇਂ ਸਕੇ ਭਰਾ ਸਨ ਅਤੇ ਡਾਈਂਗ ਵਿੱਚ ਹੀ ਰਹਿੰਦੇ ਸਨ। ਰਜਿੰਦਰ ਨੇੜੇ ਮੁੰਡੀਆਂ ਦੇ ਰਾਮ ਨਗਰ ਵਿੱਚ ਕਿਰਾਏ ਦੇ ਮਕਾਨ ਵਿੱਚ ਰਹਿੰਦਾ ਸੀ।
ਏ ਸੀ ਪੀ ਈਸਟ ਦਵਿੰਦਰ ਕੁੁਮਾਰ ਚੌਧਰੀ ਅਨੁਸਾਰ ਰਜਿੰਦਰ ਪਾਠਕ ਦੇ ਪਰਵਾਰ ਦਾ ਪਤਾ ਲੱਗਾ ਗਿਆ ਅਤੇ ਦੂਜੇ ਦੋਵਾਂ ਦੇ ਘਰਾਂ ਦਾ ਪਤਾ ਲਾਇਆ ਜਾ ਰਿਹਾ ਹੈ।