ਮੋਗਾ, 7 ਅਕਤੂਬਰ (ਪੋਸਟ ਬਿਊਰੋ)- ਇਸ ਸ਼ਹਿਰ ਵਿੱਚ ਰਹਿਣ ਵਾਲੀ ਇੱਕ ਮਹਿਲਾ ਆਪਣੇ ਗੁਆਂਢ ਰਹਿੰਦੀ ਲੜਕੀ ਨੂੰ 25 ਹਜ਼ਾਰ ਰੁਪਏ ਮਹੀਨੇ 'ਤੇ ਘਰੇਲੂ ਕੰਮ ਕਰਾਉਣ ਲਈ ਮਲੇਸ਼ੀਆ ਲੈ ਗਈ ਤੇ ਉਥੇ ਉਸ ਨੂੰ ਦੇਹ ਵਪਾਰ ਦੇ ਧੰਦੇ ਵਿੱਚ ਧੱਕਣ ਦੀ ਕੋਸ਼ਿਸ਼ ਕੀਤੀ। ਜਦੋਂ ਲੜਕੀ ਨਹੀਂ ਮੰਨੀ ਤਾਂ ਬੰਦੀ ਬਣਾ ਕੇ ਚਾਰ ਸਾਲ ਬੇਰਹਿਮੀ ਨਾਲ ਕੁੱਟਮਾਰ ਕੀਤੀ ਜਾਂਦੀ ਰਹੀ ਅਤੇ 18-18 ਘੰਟੇ ਕੰਮ ਕਰਵਾ ਕੇ ਵੀ ਤਨਖਾਹ ਨਹੀਂ ਦਿੱਤੀ। ਫਿਰ ਲੜਕੀ ਦੀ ਮਾਂ ਮਲੇਸ਼ੀਆ ਵਿੱਚ ਇੱਕ ਗੁਰਦੁਆਰੇ ਦੇ ਪਾਠੀ ਦੀ ਮਦਦ ਨਾਲ ਓਥੋਂ ਦੀ ਪੁਲਸ ਨੂੰ ਨਾਲ ਲੈ ਕੇ ਬੇਟੀ ਨੂੰ ਛੁਡਾ ਕੇ ਭਾਰਤ ਆਈ ਹੈ। ਪੁਲਸ ਨੇ ਇਸ ਸੰਬੰਧ ਵਿੱਚ ਨੋਇਡਾ ਦੇ ਇੱਕ ਟਰੈਵਲ ਏਜੰਟ ਤੇ ਲੜਕੀ ਦੀ ਗੁਆਂਢਣ ਮਹਿਲਾ ਸਮੇਤ ਤਿੰਨ ਜਣਿਆਂ ਵਿਰੁੱਧ ਧੋਖਾਧੜੀ ਦੀ ਸਾਜ਼ਿਸ਼ ਰਚਣ ਦੇ ਦੋਸ਼ ਵਿੱਚ ਕੇਸ ਦਰਜ ਕੀਤਾ ਹੈ।
ਭਾਰਤ ਵਾਪਸ ਆਈ ਲੜਕੀ ਨੇ ਦੱਸਿਆ ਕਿ ਕਿਰਨਜੀਤ ਕੌਰ, ਕਰਮਜੀਤ ਕੌਰ ਅਤੇ ਰੇਸ਼ਮ ਸਿੰਘ ਇੱਕ ਗੈਂਗ ਚਲਾ ਰਹੇ ਹਨ, ਜਿਹੜਾ ਭਾਰਤ ਵਿੱਚੋਂ ਮਾਸੂਮ ਲੜਕੀਆਂ ਨੂੰ ਵਿਦੇਸ਼ ਵਿੱਚ ਚੰਗੀ ਤਨਖਾਹ 'ਤੇ ਕੰਮ ਦਿਵਾਉਣ ਦੇ ਸੁਫਨੇ ਦਿਖਾ ਕੇ ਓਥੇ ਲਿਜਾਂਦੇ ਅਤੇ ਫਿਰ ਦੇਹ ਵਪਾਰ ਲਈ ਮਜਬੂਰ ਕਰਦੇ ਹਨ। ਪੀੜਤ ਦੀ ਮਾਂ ਮਨਜੀਤ ਕੌਰ ਨੇ ਦੱਸਿਆ ਕਿ ਕੁਲਦੀਪ ਕੌਰ ਪਤਨੀ ਅਸ਼ੋਕ ਕੁਮਾਰ ਉਨ੍ਹਾਂ ਦੀ ਗੁਆਂਢਣ ਹੈ। ਚਾਰ ਸਾਲ ਪਹਿਲਾਂ ਕੁਲਦੀਪ ਕੌਰ ਦੀ ਮਲੇਸ਼ੀਆ ਵਿੱਚ ਰਹਿੰਦੀ ਭੈਣ ਕਰਮਜੀਤ ਕੌਰ ਆਈ ਸੀ। ਉਸ ਨੇ ਮਨਜੀਤ ਕੌਰ ਨੂੰ ਕਿਹਾ ਕਿ ਉਹ ਆਪਣੀ ਧੀ ਸੁਖਬਿੰਦਰ ਕੌਰ ਉਰਫ ਜੋਤੀ ਨੂੰ ਮਲੇਸ਼ੀਆ ਭੇਜ ਦੇਵੇ, ਉਥੇ ਉਸ ਨੂੰ 25 ਹਜ਼ਾਰ ਰੁਪਏ ਮਹੀਨੇ 'ਤੇ ਘਰੇਲੂ ਕੰਮ ਮਿਲ ਜਾਏਗਾ। ਇਸ ਦੇ ਲਈ ਨੋਇਡਾ ਦੇ ਇੱਕ ਏਜੰਟ ਨੂੰ ਜਲੰਧਰ ਵਿੱਚ ਮਿਲਣ ਲਈ ਕਿਹਾ ਸੀ ਤੇ ਇਸੇ ਏਜੰਟ ਨੇ ਜੋਤੀ ਨੂੰ ਮਲੇਸ਼ੀਆ ਭੇਜਿਆ ਸੀ। ਤਿੰਨ ਸਾਲ ਤੱਕ ਜਦ ਜੋਤੀ ਨਾਲ ਉਸ ਦੀ ਮਾਂ ਜਾਂ ਪਰਵਾਰ ਦੇ ਕਿਸੇ ਮੈਂਬਰ ਦੀ ਗੱਲ ਨਾ ਹੋਈ ਤਾਂ ਜੋਤੀ ਦੀ ਮਾਂ ਮਨਜੀਤ ਕੌਰ ਨੇ ਲੋਕਾਂ ਨਾਲ ਸੰਪਰਕ ਕਰਨਾ ਸ਼ੁਰੂ ਕੀਤਾ। ਇਸ ਦੌਰਾਨ ਮਨਜੀਤ ਦੀ ਗੱਲ ਮਲੇਸ਼ੀਆ ਦੇ ਇੱਕ ਗੁਰਦੁਆਰੇ ਵਿੱਚ ਅਮਰਜੀਤ ਸਿੰਘ ਨਾਂਅ ਦੇ ਪਾਠੀ ਨਾਲ ਹੋਈ ਤਾਂ ਪਾਠੀ ਦੇ ਕਹਿਣ 'ਤੇ ਮਨਜੀਤ ਕੌਰ ਓਥੇ ਗਈ। ਉਥੇ ਅਮਰਜੀਤ ਸਿੰਘ ਨੇ ਜੋਤੀ ਨੂੰ ਤਲਾਸ਼ ਕਰਨ ਵਿੱਚ ਉਸ ਦੀ ਮਦਦ ਕੀਤੀ ਅਤੇ ਮਲੇਸ਼ੀਆ ਪੁਲਸ ਦੀ ਮਦਦ ਨਾਲ ਮਨਜੀਤ ਬੇਟੀ ਛੁਡਵਾ ਕੇ ਭਾਰਤ ਵਾਪਸ ਲੈ ਕੇ ਆਈ ਹੈ। ਪਤਾ ਲੱਗਾ ਹੈ ਕਿ ਮਲੇਸ਼ੀਆ ਪਹੁੰਚਣ ਪਿੱਛੋਂ ਕਰਮਜੀਤ ਕੌਰ ਅਤੇ ਉਸ ਦੇ ਭਰਾ ਰੇਸ਼ਮ ਸਿੰਘ ਨੇ ਜੋਤੀ ਨੂੰ ਮਲੇਸ਼ੀਆ ਵਿੱਚ ਰਹਿੰਦੀ ਕਿਰਨਜੀਤ ਕੌਰ ਦੇ ਘਰ ਕੰਮ ਦਿਵਾਉਣ ਦੇ ਨਾਂਅ ਉੱਤੇ ਅੱਸੀ ਹਜ਼ਾਰ ਰੁਪਏ ਲਏ ਸਨ। ਕੁਝ ਦਿਨ ਜੋਤੀ ਕਰਮਜੀਤ ਕੌਰ ਦੇ ਘਰ ਰਹੀ, ਫਿਰ ਉਸ ਨੂੰ ਕਿਰਨਜੀਤ ਕੌਰ ਦੇ ਘਰ ਕੰਮ 'ਤੇ ਲਾ ਦਿੱਤਾ। ਇੱਕ ਸਾਲ ਹੋਰ ਸਭ ਠੀਕ ਰਿਹਾ, ਜੋਤੀ ਨੂੰ ਤਨਖਾਹ ਨਹੀਂ ਮਿਲੀ, ਪਰ ਪਰਵਾਰ ਦੇ ਲੋਕਾਂ ਨਾਲ ਫੋਨ 'ਤੇ ਗੱਲ ਕਰਾਉਂਦੇ ਰਹੇ। ਇਸ ਦੌਰਾਨ ਜੋਤੀ ਨੂੰ ਦੇਹ ਵਪਾਰ ਲਈ ਮਜਬੂਰ ਕੀਤਾ ਗਿਆ, ਪਰ ਜੋਤੀ ਨੇ ਇਨਕਾਰ ਕਰ ਦਿੱਤਾ ਤਾਂ ਉਸ ਦੇ ਘਰ ਦਿਆਂ ਨਾਲ ਉਸ ਦੀ ਗੱਲ ਕਰਾਉਣੀ ਬੰਦ ਕਰ ਦਿੱਤੀ ਅਤੇ ਉਸ ਦੀ ਬੇਰਹਿਮੀ ਨਾਲ ਕੁੱਟਮਾਰ ਕੀਤੀ ਜਾਣ ਲੱਗੀ।