ਨਵੀਂ ਦਿੱਲੀ, 17 ਅਕਤੂਬਰ (ਪੋਸਟ ਬਿਊਰੋ)- ਦਿੱਲੀ ਦੇ ਭੀਕਾਜੀ ਕਾਮਾ ਪਲੇਸ ਵਿੱਚ ਫਾਈਵ ਸਟਾਰ ਹੋਟਲ ਹਿਆਤ ਵਿੱਚ ਬਹੁਜਨ ਸਮਾਜ ਪਾਰਟੀ (ਬਸਪਾ) ਦੇ ਸਾਬਕਾ ਪਾਰਲੀਮੈਂਟ ਮੈਂਬਰ ਰਾਕੇਸ਼ ਪਾਂਡੇ ਦੇ ਬੇਟੇ ਆਸ਼ੀਸ਼ ਨੇ ਭੱਦਾ ਵਿਹਾਰ ਕੀਤਾ। ਪਹਿਲਾਂ ਉਹ ਜਬਰ ਦਸਤੀ ਲੇਡੀਜ਼ ਵਾਸ਼ਰੂਮ ਵਿੱਚ ਜਾ ਵੜਿਆ, ਟੋਕਣ ਉੱਤੇ ਪਿਸਟਲ ਤਾਣ ਕੇ ਪਤੀ-ਪਤਨੀ ਅਤੇ ਉਸ ਹੋਟਲ ਦੇ ਸਟਾਫ ਨੂੰ ਧਮਕਾਉਂਦਾ ਰਿਹਾ ਤੇ ਭੱਦੀ ਸ਼ਬਦਾਵਲੀ ਦੀ ਵੀ ਵਰਤੋਂ ਕੀਤੀ।
ਇਸ ਸੰਬੰਧ ਵਿੱਚ ਵੀਡੀਓ ਵਾਇਰਲ ਹੋ ਜਾਣ ਮਗਰੋਂ ਦਿੱਲੀ ਪੁਲਸ ਨੇ ਆਸ਼ੀਸ਼ ਦੇ ਖਿਲਾਫ ਲੁਕਆਊਟ ਨੋਟਿਸ ਜਾਰੀ ਕਰ ਦਿੱਤਾ ਹੈ। ਕੱਲ੍ਹ ਦੁਪਹਿਰ ਦਿੱਲੀ ਪੁਲਸ ਆਸ਼ੀਸ਼ ਦੀ ਤਲਾਸ਼ ਕਰਦੀ ਹੋਈ ਲਖਨਊ ਉਸ ਦੇ ਘਰ ਵੀ ਪਹੁੰਚੀ, ਪਰ ਉਹ ਹੱਥ ਨਹੀਂ ਲੱਗਾ। ਸ਼ਨੀਵਾਰ ਰਾਤ ਵਾਪਰੀ ਇਸ ਘਟਨਾ ਬਾਰੇ ਕਿਸੇ ਨੇ ਵੀ ਸ਼ਿਕਾਇਤ ਨਹੀਂ ਦਰਜ ਕਰਵਾਈ। ਪੁਲਸ ਨੇ ਵੀਡੀਓ ਦੇ ਆਧਾਰ 'ਤੇ ਦੋਸਲੀ ਦੇ ਖਿਲਾਫ ਆਰ ਕੇ ਪੁਰਮ ਥਾਣੇ ਵਿੱਚ ਆਰਮਜ਼ ਐਕਟ ਅਤੇ ਹੋਰਨਾਂ ਧਾਰਾਵਾਂ ਦੀ ਰਿਪੋਰਟ ਦਰਜ ਕੀਤੀ ਹੈ। ਹੋਟਲ ਦੇ ਅਸਿਸਟੈਂਟ ਸਕਿਓਰਿਟੀ ਮੈਨੇਜਰ ਦਾ ਕਹਿਣਾ ਹੈ ਕਿ ਇਹ ਸੂਚਨਾ ਮਿਲੀ ਸੀ ਕਿ ਇੱਕ ਨੌਜਵਾਨ ਲੇਡੀਜ਼ ਵਾਸ਼ਰੂਮ ਵਿੱਚ ਵੜ ਗਿਆ ਹੈ। ਜਦੋਂ ਉਹ ਪਹੁੰਚੇ ਤਾਂ ਵਾਸ਼ਰੂਮ ਦੇ ਬਾਹਰ ਬਹਿਸ ਹੋ ਰਹੀ ਸੀ। ਇਸ ਦੇ ਬਾਅਦ ਆਸ਼ੀਸ਼ ਪਾਂਡੇ ਆਪਣੀ ਬੀ ਐਮ ਡਬਲਯੂ ਕਾਰ ਵਿੱਚੋ ਪਿਸਟਲ ਕੱਢ ਲਿਆਇਆ ਤੇ ਪਤੀ-ਪਤਨੀ ਨੂੰ ਧਮਕਾਉਣ ਲੱਗ ਪਿਆ। ਆਸ਼ੀਸ਼ ਦੇ ਨਾਲ ਤਿੰਨ ਲੜਕੀਆਂ ਵੀ ਸਨ।