ਚੰਡੀਗੜ੍ਹ, 23 ਜੁਲਾਈ (ਪੋਸਟ ਬਿਊਰੋ): ਅੱਜ ਕੇਂਦਰੀ ਖਜ਼ਾਨਾ ਮੰਤਰੀ ਨਿਰਮਲਾ ਸੀਤਾਰਮਨ ਨੇ ਸਾਲ 2024-25 ਲਈ ਲੋਕ ਸਭਾ ਵਿੱਚ ਬਜਟ ਪੇਸ਼ ਕੀਤਾ, ਜਿਸਨੇ ਖਾਸਕਰ ਕਿਸਾਨਾਂ ਅਤੇ ਆਮ ਲੋਕਾਂ ਨੂੰ ਨਿਰਾਸ਼ ਹੀ ਕੀਤਾ ਹੈ। ਇਹ ਗੱਲ ਅੱਜ ਇੱਥੋਂ ਪ੍ਰੈੱਸ ਨੂੰ ਜਾਰੀ ਕੀਤੇ ਇੱਕ ਪ੍ਰੈਸ ਬਿਆਨ ਵਿੱਚ ਭਾਰਤੀ ਕਿਸਾਨ ਯੂਨੀਅਨ ਦੇ ਪ੍ਰਧਾਨ ਅਤੇ ਸੰਯੁਕਤ ਕਿਸਾਨ ਮੋਰਚੇ ਦੇ ਸੀਨੀਅਰ ਆਗੂ ਸ. ਬਲਬੀਰ ਸਿੰਘ ਰਾਜੇਵਾਲ ਨੇ ਕਹੀ। ਉਨ੍ਹਾਂ ਕਿਹਾ ਕਿ 48 ਕਰੋੜ ਦੇ ਬਜਟ ਵਿੱਚ ਖੇਤੀ ਲਈ ਕੇਵਲ 1.51 ਕਰੋੜ ਹੀ ਰੱਖੇ ਗਏ ਹਨ ਅਤੇ ਇਹ ਵੀ ਵਧੇਰੇ ਕਰਕੇ ਤਨਖਾਹਾਂ ਵਿੱਚ ਹੀ ਖਰਚ ਹੋ ਜਾਣਗੇ। ਉਨ੍ਹਾਂ ਕਿਹਾ ਕਿ ਸਰਕਾਰ ਨੇ ਨਾ ਤਾਂ ਐਮ. ਐਸ. ਪੀ. ਦੀ ਕਾਨੂੰਨੀ ਗਰੰਟੀ ਬਾਰੇ ਕੁਝ ਕਿਹਾ ਅਤੇ ਨਾ ਹੀ ਕਿਸਾਨਾਂ ਦੇ ਕਰਜੇ ਬਾਰੇ। ਕੁਦਰਤੀ ਖੇਤੀ ਬਾਰੇ ਕੇਵਲ ਢਕੌਂਸਲਾ ਹੀ ਦਿੱਤਾ ਹੈ ਅਤੇ ਦਾਲਾਂ, ਤੇਲ, ਬੀਜਾਂ ਦੀ ਪੈਦਾਵਰ ਵਧਾਉਣ ਦਾ ਛੁਣਛੁਣਾਂ ਤਾਂ ਦਿੱਤਾ ਪਰ ਇਨਾਂ ਦੀ ਖਰੀਦ ਦੀ ਵੀ ਕੋਈ ਗਰੰਟੀ ਨਹੀਂ। ਉਨ੍ਹਾਂ ਕਿਹਾ ਕਿ ਬਜਟ ਮੋਦੀ ਸਰਕਾਰ ਦੀਆਂ ਫੋਹੜੀਆਂ ਬਿਹਾਰ ਅਤੇ ਆਂਧਰਾ ਪ੍ਰਦੇਸ਼ ਦੇ ਆਲੇ ਦੁਆਲੇ ਹੀ ਘੁੰਮਦਾ ਦਿਖਾਈ ਦਿੰਦਾ ਹੈ। ਬਜਟ ਦੀਆਂ ਬਹੁਤੀਆਂ ਸਕੀਮਾਂ ਬਿਹਾਰ ਅਤੇ ਆਂਧਰਾ ਪ੍ਰਦੇਸ਼ ਵੱਲ ਹੀ ਸੇਧਤ ਹਨ। ਜੋ ਬਚਿਆ ਉਹ ਬੀ. ਜੇ. ਪੀ. ਦੀਆਂ ਸਰਕਾਰਾਂ ਲਈ ਚਲਾ ਗਿਆ। ਇਸ ਬਜਟ ਨੇ ਪੰਜਾਬ ਖਾਸਕਰ ਕਿਸਾਨਾਂ ਨੂੰ ਬੁਰੀ ਤਰ੍ਹਾਂ ਨਿਰਾਸ਼ ਕੀਤਾ ਹੈ।