ਓਟਵਾ, 7 ਮਾਰਚ (ਪੋਸਟ ਬਿਊਰੋ) : ਓਟਵਾ ਪੁਲਿਸ ਵੱਲੋਂ ਓਟਵਾ ਸਬਅਰਬ ਵਿੱਚ ਮਾਰੇ ਗਏ ਛੇ ਵਿਅਕਤੀਆਂ, ਜਿਨ੍ਹਾਂ ਵਿੱਚ ਇੱਕ ਨਵ ਜੰਮਿਆਂ ਬੱਚਾ ਵੀ ਸ਼ਾਮਲ ਹੈ, ਦੀ ਪਛਾਣ ਕਰ ਲਈ ਗਈ ਹੈ। ਇਹ ਪਰਿਵਾਰ ਪਿੱਛੇ ਜਿਹੇ ਸ੍ਰੀ ਲੰਕਾ ਤੋਂ ਇੱਥੇ ਆ ਕੇ ਵੱਸਿਆ ਸੀ।
ਬੁੱਧਵਾਰ ਰਾਤ ਨੂੰ 911 ਉੱਤੇ ਕਾਲਜ਼ ਮਿਲਣ ਤੋਂ ਬਾਅਦ ਓਟਵਾ ਪੁਲਿਸ ਸਰਵਿਸ (ਓਪੀਐਸ) 10:52 ਉੱਤੇ ਬੈਰੀਗਨ ਡਰਾਈਵ ਦੇ 300ਵੇਂ ਬਲਾਕ ਵਿੱਚ ਸਥਿਤ ਇੱਕ ਘਰ ਵਿੱਚ ਪਹੁੰਚੀ।ਜਾਂਚਕਾਰਾਂ ਨੇ ਦੱਸਿਆ ਕਿ ਇੱਕ ਵਿਅਕਤੀ ਘਰ ਦੇ ਬਾਹਰ ਮਦਦ ਲਈ ਕੁਰਲਾਉਂਦਾ ਮਿਲਿਆ ਤੇ ਉਸ ਨੂੰ ਤੁਰੰਤ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਉਸ ਦੀ ਹਾਲਤ ਗੰਭੀਰ ਪਰ ਸਥਿਰ ਦੱਸੀ ਜਾਂਦੀ ਹੈ।
ਪੁਲਿਸ ਨੇ ਦੱਸਿਆ ਕਿ ਉਸ ਦੀ ਪਤਨੀ, ਚਾਰ ਬੱਚਿਆਂ ਤੇ ਉਨ੍ਹਾਂ ਦੀ ਜਾਣ-ਪਛਾਣ ਵਿੱਚੋਂ ਇੱਕ ਵਿਅਕਤੀ ਘਰ ਦੇ ਅੰਦਰ ਮ੍ਰਿਤਕ ਪਏ ਮਿਲੇ। ਮ੍ਰਿਤਕਾਂ ਦੀ ਪਛਾਣ ਹੇਠ ਲਿਖੇ ਅਨੁਸਾਰ ਹੋਈ :
· ਦਰਸ਼ਨੀ ਬੰਬਾਰਨਾਇਕਾ, ਹਮਾ ਵਾਲਵੇ ਦਰਸ਼ਨੀ ਦਿਲਾਂਥਿਕਾ ਏਕਨਯੇਕੇ, ਉਮਰ 35 ਸਾਲ
· ਇਨੁਕਾ ਵਿਕਰਮਾਸਿੰਘੇ, ਉਮਰ 7 ਸਾਲ
· ਅਸ਼ਵਿਨੀ ਵਿਕਰਮਾਸਿੰਘੇ, ਉਮਰ 4 ਸਾਲ
· ਰਿਨਯਾਨਾ ਵਿਕਰਮਾਸਿੰਘੇ, ਉਮਰ 2 ਸਾਲ
· ਕੈਲੀ ਵਿਕਰਮਾਸਿੰਘੇ, ਉਮਰ 2 ਮਹੀਨੇ
· ਅਮਰਾਕੂਨਮੁਬਿਯਾਨਸੇਲਾ ਜੀ ਗਾਮਿਨੀ ਅਮਰਾਕੂਨ, ਉਮਰ 40 ਸਾਲ
ਸ੍ਰੀ ਲੰਕਾ ਦੇ ਹਾਈ ਕਮਿਸ਼ਨ ਦਾ ਕਹਿਣਾ ਹੈ ਕਿ ਉਹ ਕੋਲੰਬੋ ਵਿੱਚ ਇਸ ਪਰਿਵਾਰ ਦੇ ਹੋਰਨਾਂ ਮੈਂਬਰਾਂ ਨਾਲ ਪੂਰਾ ਰਾਬਤਾ ਰੱਖ ਰਿਹਾ ਹੈ।
ਓਟਵਾ ਪੁਲਿਸ ਨੇ ਦੱਸਿਆ ਕਿ ਉਨ੍ਹਾਂ ਨੇ 19 ਸਾਲਾਂ ਦੇ ਫੈਬਰੀਓ ਡੀ ਜੌਇਸਾ ਨੂੰ ਫਰਸਟ ਡਿਗਰੀ ਮਰਡਰ ਦੇ ਛੇ ਮਾਮਲਿਆਂ ਤੇ ਕਤਲ ਕਰਨ ਦੀ ਕੋਸਿ਼ਸ਼ ਕਰਨ ਦੇ ਇੱਕ ਮਾਮਲੇ ਵਿੱਚ ਚਾਰਜ ਕੀਤਾ ਹੈ।ਉਨ੍ਹਾਂ ਦੱਸਿਆ ਕਿ ਇਹ ਲੜਕਾ ਇੱਕ ਵਿਦਿਆਰਥੀ ਹੈ ਤੇ ਇਹ ਪਰਿਵਾਰ ਦੀ ਜਾਣ-ਪਛਾਣ ਵਿੱਚੋਂ ਹੀ ਸੀ ਤੇ ਘਟਨਾ ਸਮੇਂ ਘਰ ਵਿੱਚ ਹੀ ਰਹਿ ਰਿਹਾ ਸੀ। ਅਧਿਕਾਰੀਆਂ ਨੇ ਦੱਸਿਆ ਕਿ ਇਸ ਕਤਲੇਆਮ ਲਈ ਧਾਰਦਾਰ ਹਥਿਆਰ ਦੀ ਵਰਤੋਂ ਕੀਤੀ ਗਈ।ਨਿਊਜ਼ ਕਾਨਫਰੰਸ ਵਿੱਚ ਪੁਲਿਸ ਚੀਫ ਐਰਿਕ ਸਟੱਬਜ਼ ਨੇ ਆਖਿਆ ਕਿ ਇਸ ਹਿੰਸਕ ਘਟਨਾ ਨੇ ਓਟਵਾ ਵਾਸੀਆਂ ਨੂੰ ਹਿਲਾ ਕੇ ਰੱਖ ਦਿੱਤਾ ਹੈ।
ਓਟਵਾ ਦੇ ਮੇਅਰ ਮਾਰਚ ਸੁਟਕਲਿੱਫ ਨੇ ਆਖਿਆ ਕਿ ਇਹ ਘਟਨਾ ਤਬਹਾਕੁੰਨ ਸੀ। ਇਸ ਘਟਨਾ ਤੋਂ ਬਾਅਦ ਸਾਡੇ ਵਿੱਚੋਂ ਬਹੁਤਿਆਂ ਦਾ ਰੂਟੀਨ ਵੱਲ ਪਰਤਣਾ ਮੁਸ਼ਕਲ ਹੋਵੇਗਾ, ਹਾਲਾਂਕਿ ਆਮ ਜਨਤਾ ਨੂੰ ਕੋਈ ਖਤਰਾ ਨਹੀਂ ਹੈ ਪਰ ਲੋਕ ਸਹਿਮ ਚੁੱਕੇ ਹਨ।ਓਨਟਾਰੀਓ ਦੇ ਪ੍ਰੀਮੀਅਰ ਡੱਗ ਫੋਰਡ ਵੱਲੋਂ ਵੀ ਇਸ ਘਟਨਾ ਉੱਤੇ ਦੁੱਖ ਪ੍ਰਗਟਾਇਆ ਗਿਆ। ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਵੱਲੋਂ ਵੀ ਇਸ ਘਟਨਾ ਉੱਤੇ ਦੁੱਖ ਪ੍ਰਗਟਾਇਆ ਗਿਆ।