ਵਾਸ਼ਿੰਗਟਨ, 14 ਫਰਵਰੀ, (ਪੋਸਟ ਬਿਊਰੋ)- ਅਮਰੀਕੀ ਪਾਰਲੀਮੈਂਟ ਨੇ ਸਾਊਦੀ ਅਰਬ ਨਾਲ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਸਬੰਧਾਂ ਨੂੰ ਝਟਕਾ ਦਿੰਦੇ ਹੋਏ ਉਸ ਦੇਸ਼ ਨੂੰ ਯਮਨ ਵਿਚ ਜੰਗ ਲਈ ਦਿੱਤੀ ਜਾਂਦੀ ਮਦਦ ਖ਼ਤਮ ਕਰਨ ਦੇ ਪੱਖ ਵਿਚ ਵੋਟਾਂ ਪਾਈਆਂ ਹਨ। ਇਹ ਸਾਊਦੀ ਅਰਬ ਦੀ ਸਰਕਾਰ ਨੂੰ ਵੀ ਝਟਕਾ ਹੈ।
ਵਾਸ਼ਿੰਗਟਨ ਪੋਸਟ ਦੇ ਪੱਤਰਕਾਰ ਜਮਾਲ ਖਸ਼ੋਗੀ ਦੀ ਮੌਤ ਮਗਰੋਂ ਵੀ ਸਾਊਦੀ ਅਰਬ ਦੇ ਲਈ ਟਰੰਪ ਦੀ ਨਰਮੀ ਜਾਰੀ ਰਹਿਣ ਕਾਰਨ ਪਾਰਲੀਮੈਂਟ ਮੈਂਬਰਾਂ ਵਿਚ ਕਾਫੀ ਰੋਸ ਸੀ। ਯਮਨ ਵਿੱਚ ਅਮਰੀਕੀ ਫੌਜ ਭੇਜਣ ਵਿਰੁੱਧ ਇਸ ਮਤੇ ਉੱਤੇ ਵੋਟਿੰਗ ਦੌਰਾਨ 177 ਦੇ ਮੁਕਾਬਲੇ 248 ਵੋਟਾਂ ਨਾਲ ਮਤੇ ਨੂੰ ਮਨਜ਼ੂਰੀ ਮਿਲ ਗਈ। ਮਤੇ ਵਿਚ ਯਮਨ ਵਿਚ ਚਾਰ ਸਾਲਾਂ ਤੋਂ ਚੱਲ ਰਹੇ ਸੰਘਰਸ਼ ਦੀ ਨਿੰਦਾ ਕੀਤੀ ਗਈ, ਜਿਸ ਵਿੱਚ ਅੱਜ ਤਕ ਹਜ਼ਾਰਾਂ ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ। ਹੈਰਾਨੀ ਦੀ ਗੱਲ ਹੈ ਕਿ ਟਰੰਪ ਦੀ ਰਿਪਬਲਿਕਨ ਪਾਰਟੀ ਦੇ 18 ਐੱਮ ਪੀਜ਼ ਨੇ ਵੀ ਡੈਮੋਕ੍ਰੇਟਸ ਦੇ ਨਾਲ ਇਸ ਮਤੇ ਦੇ ਪੱਖ ਵਿਚ ਵੋਟਾਂ ਪਾਈਆਂ। ਇਸ ਮੌਕੇ ਸਾਊਦੀ ਅਰਬ ਨਾਲ ਖ਼ੁਫ਼ੀਆ ਸੂਚਨਾਵਾਂ ਦੇ ਤਬਾਦਲੇ ਬਾਰੇ ਡੈਮੋਕ੍ਰੇਟਸ ਨੇ ਨਰਮੀ ਦਿਖਾਈ। ਡੈਮੋਕ੍ਰੇਟ ਸੰਸਦ ਮੈਂਬਰ ਰੋ ਖੰਨਾ ਨੇ ਕਿਹਾ, ‘ਸਾਊਦੀ ਅਰਬ ਨੂੰ ਇਹ ਸੰਦੇਸ਼ ਦੇਣ ਦਾ ਸਮਾਂ ਆ ਗਿਆ ਹੈ ਕਿ ਖਸ਼ੋਗੀ ਦੇ ਕੇਸ ਵਿਚ ਉਸ ਦਾ ਵਿਹਾਰ ਅਤੇ ਉਥੇ ਹੋ ਰਹੀ ਮਨੁੱਖੀ ਅਧਿਕਾਰਾਂ ਦੀ ਲਗਾਤਾਰ ਉਲੰਘਣਾ ਅਮਰੀਕਾ ਦੀਆਂ ਨੀਤੀਆਂ ਦੇ ਮੁਤਾਬਕ ਨਹੀਂ ਹੈ।` ਇਸ ਮਤੇ ਦੇ ਪਾਸ ਹੋਣ ਪਿੱਛੋਂ ਟਰੰਪ ਨੂੰ ਯਮਨ ਤੋਂ ਅਮਰੀਕੀ ਫੌਜ ਨੂੰ ਯਮਨ ਤੋਂ ਹਟਾਉਣਾ ਹੋਵੇਗਾ। ਟਰੰਪ ਇਸ ਬਾਰੇ ਆਪਣੀ ਵੀਟੋ ਪਾਵਰ ਦਾ ਵਰਤੋਂ ਕਰ ਸਕਦੇ ਹਨ। ਉਨ੍ਹਾਂ ਸਾਹਮਣੇ ਇਸ ਲਈ ਵੀਟੋ ਪਾਵਰ ਵਰਤਣ ਦੀ ਸਥਿਤੀ ਬਣ ਰਹੀ ਹੈ ਕਿ ਸੀਰੀਆ ਅਤੇ ਅਫ਼ਗਾਨਿਸਤਾਨ ਤੋਂ ਫ਼ੌਜ ਹਟਾਉਣ ਅਤੇ ਨਾਟੋ ਦੇ ਹੱਥ ਖਿੱਚਣ ਵਰਗੇ ਟਰੰਪ ਦੇ ਕਈ ਫ਼ੈਸਲਿਆਂ ਉੱਤੇ ਸਾਰੇ ਰਿਪਬਲਿਕਨ ਵੀ ਉਨ੍ਹਾਂ ਨਾਲ ਨਹੀਂ ਦਿੱਸ ਰਹੇ।