ਮੈਲਬਰਨ, 14 ਫਰਵਰੀ (ਪੋਸਟ ਬਿਊਰੋ)- ਵਿਗਿਆਨਕਾਂ ਨੇ ਸਾਲ 2070 ਤੱਕ ਧਰਤੀ ਤੋਂ ਬੰਗਾਲ ਟਾਈਗਰ ਦੇ ਪੂਰੀ ਤਰ੍ਹਾਂ ਖਤਮ ਹੋ ਜਾਣ ਦੀ ਸ਼ੰਕਾ ਪ੍ਰਗਟਾਈ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਇਸ ਅਦਭੁੱਤ ਜੀਵ ਦਾ ਮੁੱਖ ਕੁਦਰਤੀ ਟਿਕਾਣਾ ਸੁੰਦਰਬਨ ਇਸ ਵਕਤ ਖਤਰੇ ਵਿੱਚ ਹੈ। ਜਲਵਾਯੂ ਤਬਦੀਲੀ ਕਾਰਨ ਸਮੁੰਦਰ ਦੇ ਪਾਣੀ ਦਾ ਪੱਧਰ ਵਧਣ ਨਾਲ ਦੁਨੀਆ ਦਾ ਸਭ ਤੋਂ ਵੱਡਾ ਨਦੀ ਡੈਲਟਾ ਸੁੰਦਰਬਨ ਨਸ਼ਟ ਹੋ ਜਾਵੇਗਾ।
ਗੰਗਾ, ਬ੍ਰਹਮਪੱਤਰ ਅਤੇ ਬੰਗਲਾਦੇਸ਼ ਦੀ ਮੇਘਨਾ ਨਦੀ ਤੋਂ ਬਣਦਾ ਇਹ ਡੈਲਟਾ 10 ਹਜ਼ਾਰ ਵਰਗ ਕਿਲੋਮੀਟਰ ਦੇ ਕਰੀਬ ਫੈਲਿਆ ਹੈ। ਯੂਨੈਸਕੋ ਨੇ ਇਸ ਖੇਤਰ ਨੂੰ ਵਿਸ਼ਵ ਵਿਰਾਸਤ ਦੀ ਸੂਚੀ ਵਿੱਚ ਸ਼ਾਮਲ ਕੀਤਾ ਹੈ। ਦੁਨੀਆ ਦੇ ਸਭ ਤੋਂ ਵੱਡੇ ਮੈਂਗਰੋਵ ਜੰਗਲ ਨਾਲ ਘਿਰਿਆ ਇਹ ਖੇਤਰ ਖਤਮ ਹੋਣ ਕੰਢੇ ਖੜੇ ਸ਼ੇਰਾਂ ਦੀ ਖਾਸ ਨਸਲ ਬੰਗਾਲ ਟਾਈਗਰ ਦਾ ਘਰ ਹੈ। ਆਸਟਰੇਲੀਆ ਦੀ ਜੇਮਸ ਕੁੱਕ ਯੂਨੀਵਰਸਿਟੀ ਦੇ ਵਿਗਿਆਨਕ ਬਿਲ ਲਾਰੈਂਸ ਦੇ ਮੁਤਾਬਕ ਫਿਲਹਾਲ 4000 ਬੰਗਾਲ ਟਾਈਗਰ ਹੀ ਬਚੇ ਹਨ। ਕਈ ਸਾਲ ਪਹਿਲਾਂ ਭਾਰੀ ਗਿਣਤੀ ਵਿੱਚ ਪਾਇਆ ਜਾਣ ਵਾਲਾ ਇਹ ਜੀਵ ਇਸ ਵਕਤ ਭਾਰਤ ਅਤੇ ਬੰਗਲਾਦੇਸ਼ ਦੇ ਡੈਲਟਾ ਖੇਤਰ ਵਿੱਚ ਸਿਮਟ ਗਿਆ ਹੈ। ਸਮੁੰਦਰ ਤਲ ਅਤੇ ਜਲਵਾਯੂ ਤਬਦੀਲੀ ਦੇ ਨਾਲ ਹੋਰ ਕਾਰਨਾਂ ਦਾ ਵਿਸ਼ਲੇਸ਼ਣ ਕਰਕੇ ਖੋਜਕਰਾਤਵਾਂ ਨੇ ਵੇਖਿਆ ਕਿ 50 ਸਾਲਾਂ ਵਿੱਚ ਇਹ ਜੀਵ ਧਰਤੀ ਤੋਂ ਖਤਮ ਹੋ ਜਾਵੇਗਾ। ਕੁਦਰਤੀ ਕਾਰਨਾਂ ਦੇ ਇਲਾਵਾ ਸੁੰਦਰਬਨ ਦੇ ਆਸਪਾਸ ਹੋ ਰਿਹਾ ਉਦਯੋਗਿਕ ਵਿਕਾਸ ਅਤੇ ਨਾਜਾਇਜ਼ ਸ਼ਿਕਾਰ ਸ਼ੇਰਾਂ ਦੀ ਘੱਟ ਰਹੀ ਗਿਣਤੀ ਦਾ ਮੁੱਖ ਕਾਰਨ ਹੈ। ਲਾਰੈਂਸ ਦਾ ਕਹਿਣਾ ਹੈ ਕਿ ਸ਼ਿਕਾਰ ਅਤੇ ਅੰਨ੍ਹੇਵਾਹ ਵਿਕਾਸ ਦੀ ਗਤੀ ਨੂੰ ਰੋਕ ਕੇ ਡੈਲਟਾ 'ਤੇ ਜਲਵਾਯੂ ਤਬਦੀਲੀ ਦੇ ਉਲਟ ਪ੍ਰਭਾਵ ਨੂੰ ਘੱਟ ਕੀਤਾ ਜਾ ਸਕਦਾ ਹੈ। ਉਨ੍ਹਾਂ ਇਹ ਵੀ ਕਿਹਾ ਕਿ ਸੁੰਦਰਬਨ ਵਰਗੀ ਕੋਈ ਥਾਂ ਧਰਤੀ 'ਤੇ ਹੋਰ ਕਿਤੇ ਨਹੀਂ ਹੈ। ਇਸ ਲਈ ਇਸ ਨੂੰ ਸੁਰੱਖਿਅਤ ਰੱਖਣਾ ਬਹੁਤ ਜ਼ਰੂਰੀ ਹੈ।