ਸੰਗਰੂਰ, 13 ਮਈ (ਪੋਸਟ ਬਿਊਰੋ)- ਕੱਲ੍ਹ ਰਾਤ ਰੰਜਿਸ਼ ਕਾਰਨ ਇੱਕ ਵਿਅਕਤੀ ਦਾ ਗੁਆਂਢੀ ਨੇ ਗੋਲੀ ਮਾਰ ਕੇ ਕਤਲ ਕਰ ਦਿੱਤਾ। ਪੁਲਸ ਨੇ ਇਸ ਬਾਰੇ ਚਾਰ ਵਿਅਕਤੀਆਂ ਖਿਲਾਫ ਮੁਕੱਦਮਾ ਦਰਜ ਕਰ ਕੇ ਇੱਕ ਵਿਅਕਤੀ ਨੂੰ ਹਿਰਾਸਤ ਵਿੱਚ ਲੈ ਲਿਆ ਹੈ। ਪੁਲਸ ਵੱਲੋਂ ਛਾਪੇਮਾਰੀ ਕੀਤੀ ਜਾ ਰਹੀ ਹੈ।
ਮਨਦੀਪ ਕੁਮਾਰ ਵਾਸੀ ਸੰਗਰੂਰ ਨੇ ਦੱਸਿਆ ਕਿ ਉਸ ਦਾ ਛੋਟਾ ਭਰਾ ਕਮਲਦੀਪ ਕੁਮਾਰ ਉਰਫ ਕਮਲ ਕੱਲ੍ਹ ਰਾਤ ਕਰੀਬ 11.30 ਵਜੇ ਮਕਾਨ ਦੀ ਛੱਤ ਉੱਤੇ ਚਲਾ ਗਿਆ। ਉਨ੍ਹਾਂ ਦੇ ਮਕਾਨ ਦੇ ਪਿਛਲੇ ਪਾਸੇ ਹੁਸਨਪਾਲ ਸਿੰਘ ਉਰਫ ਗੋਲਡੀ ਦੀ ਛੱਤ ਉਨ੍ਹਾਂ ਦੇ ਮਕਾਨ ਨਾਲ ਲੱਗਦੀ ਹੈ। ਜਦੋਂ ਕਾਫੀ ਸਮੇਂ ਬਾਅਦ ਉਸ ਦਾ ਭਰਾ ਹੇਠਾਂ ਨਾ ਆਇਆ ਤਾਂ ਉਸ ਨੇ ਜਾ ਕੇ ਦੇਖਿਆ ਤਾਂ ਮਨਿੰਦਰ ਕੁਮਾਰ ਉਰਫ ਮੋਨੂੰ, ਗੋਲਡੀ ਤੇ ਦੋ ਹੋਰ ਅਣਪਛਾਤੇ ਵਿਅਕਤੀਆਂ ਨੇ ਉਸ ਦੇ ਭਰਾ ਨੂੰ ਬਾਹਾਂ ਤੋਂ ਫੜਿਆ ਹੋਇਆ ਸੀ ਤੇ ਕੱਪੜਾ ਤੁੰਨ ਕੇ ਮੂੰਹ ਬੰਦ ਕਰ ਦਿੱਤਾ ਸੀ। ਉਹ ਵਿਅਕਤੀ ਉਸ ਦੇ ਭਰਾ ਨੂੰ ਕਹਿੰਦੇ ਸੀ ਕਿ ਤੂੰ ਉਨ੍ਹਾਂ ਦੇ ਕਿਲ੍ਹਾ ਮਾਰਕੀਟ ਵਿੱਚ ਹੋਏ ਝਗੜੇ ਦਾ ਰਾਜ਼ੀਨਾਮਾ ਨਹੀਂ ਹੋਣ ਦਿੰਦਾ, ਅਸੀਂ ਅੱਜ ਤੈਨੂੰ ਨਹੀਂ ਛੱਡਣਾ। ਇੰਨਾ ਕਹਿ ਕੇ ਗੋਲਡੀ ਨੇ ਪਿਸਤੌਲ ਨਾਲ ਉਸ ਦੇ ਭਰਾ ਨੂੰ ਗੋਲੀ ਮਾਰ ਦਿੱਤੀ। ਉਸ ਵੱਲੋਂ ਰੌਲਾ ਪਾਉਣ ਕਾਰਨ ਉਕਤ ਵਿਅਕਤੀ ਮੌਕੇ ਤੋਂ ਭੱਜ ਗਏ। ਭਰਾ ਨੂੰ ਹਸਪਤਾਲ ਪੁਚਾਇਆ ਜਿੱਥੇ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤਕ ਐਲਾਨ ਕਰ ਦਿੱਤਾ। ਇੱਥੇ ਦੱਸਿਆ ਜਾਂਦਾ ਹੈ ਕਿ ਮ੍ਰਿਤਕ ਪਰਵਾਰ ਨੇ ਦੋਸ਼ ਲਾਇਆ ਕਿ ਪੁਲਸ ਦੋਸ਼ੀਆਂ ਨੂੰ ਬਚਾਅ ਰਹੀ ਹੈ। ਮ੍ਰਿਤਕ ਵਿਅਕਤੀ ਦਾ ਪਰਵਾਰ ਹੋਰ ਨਾਂਅ ਵੀ ਮੁਕੱਦਮੇ ਵਿੱਚ ਦਰਜ ਕਰਵਾਉਣਾ ਚਾਹੰੁਦਾ ਹੈ।