ਕਪੂਰਥਲਾ, 12 ਮਈ (ਪੋਸਟ ਬਿਊਰੋ)- ਥਾਣਾ ਸਿਟੀ ਕਪੂਰਥਲਾ ਦੀ ਪੁਲਸ ਨੇ 10 ਮਈ ਦੀ ਰਾਤ ਨੂੰ ਰੇਲਵੇ ਸਟੇਸ਼ਨ ਕਪੂਰਥਲਾ ਦੇ ਸਰਕਾਰੀ ਕੁਆਰਟਰਾਂ ਵਿੱਚ ਹੋਏ ਕਤਲ ਕੇਸ ਨੂੰ ਕੁਝ ਘੰਟਿਆਂ ਵਿੱਚ ਟਰੇਸ ਕਰਦਿਆਂ ਮੁਲਜ਼ਮ ਨੂੰ ਕਾਬੂ ਕਰ ਲਿਆ ਅਤੇ ਇਸ ਤੋਂ ਅਗਲੀ ਕਾਰਵਾਈ ਕੀਤੀ ਜਾ ਰਹੀ ਹੈ।
ਰਵੀ ਵਾਸੀ ਨਵੀਂ ਦਿੱਲੀ ਅਤੇ ਮੌਜੂਦਾ ਵਾਸੀ ਕਪੂਰਥਲਾ ਨੇ ਦਸਿਆ ਕਿ 10 ਮਈ ਨੂੰ ਸ਼ਾਮ ਪੰਜ ਵਜੇ ਉਹ ਸਮੇਤ ਅਨਿਲ ਵਾਸੀ ਦਿੱਲੀ ਅਤੇ ਪਾਲ ਸਿੰਘ, ਉਸ ਦੇ ਜੀਜੇ ਸੁਖਵੀਰ ਸਿੰਘ, ਜੋ ਰੇਲਵੇ ਵਿੱਚ ਠੇਕੇਦਾਰ ਹੈ, ਦੇ ਘਰ ਗਏ ਅਤੇ ਖਾਣਾ ਖਾ ਕੇ ਰਾਤ 11.00 ਵਜੇ ਵਾਪਸ ਆ ਗਏ, ਉਸ ਦਾ ਜੀਜਾ ਵੀ ਉਨ੍ਹਾਂ ਨਾਲ ਆ ਗਿਆ। ਜਦੋਂ ਉਹ ਆਪਣੇ ਜੀਜੇ ਨੂੰ ਰੇਲਵੇ ਸਟੇਸ਼ਨ ਕਪੂਰਥਲਾ ਦੇ ਸਰਕਾਰੀ ਕੁਆਰਟਰਾਂ ਵਿੱਚ ਛੱਡਣ ਗਏ ਤਾਂ ਅਨਿਲ ਨੇ ਉਨ੍ਹਾਂ ਕੋਲੋਂ ਪੈਸੇ ਮੰਗਣੇ ਸ਼ੁਰੂ ਕਰ ਦਿੱਤੇ, ਜਿਸ ਉੱਤੇ ਰਵੀ ਨੇ ਉਸ ਨੂੰ ਪੰਜ ਸੌ ਰੁਪਏ ਦਿੱਤੇ, ਪਰ ਅਨਿਲ ਨੇ ਹੋਰ ਮੰਗੇ ਤਾਂ ਰਵੀ ਦੇ ਜੀਜੇ ਸੁਖਵੀਰ ਨੇ ਕਿਹਾ ਕਿ ਕੱਲ੍ਹ ਹੋਰ ਪੈਸੇ ਲੈ ਲਈਂ, ਪਰ ਅਨਿਲ ਨਾ ਮੰਨਿਆ ਤੇ ਉਨ੍ਹਾਂ ਨਾਲ ਹੱਥੋਪਾਈ ਹੋ ਗਿਆ। ਇਸ ਤੋਂ ਬਾਅਦ ਉਹ ਸਾਰੇ ਉਥੋਂ ਚਲੇ ਗਏ ਤੇ ਰਵੀ ਦਾ ਜੀਜਾ ਰੇਲਵੇ ਸਟੇਸ਼ਨ ਦੇ ਕੁਆਰਟਰਾਂ ਵਿੱਚ ਜਾ ਕੇ ਸੌਂ ਗਿਆ। ਰਵੀ ਆਪਣੇ ਕਾਮਿਆਂ ਨੂੰ ਨਾਲ ਲੈ ਕੇ ਰੇਲਵੇ ਸਟੇਸ਼ਨ ਕਪੂਰਥਲਾ ਉੱਤੇ ਕੰਮ ਕਰਨ ਚਲਾ ਗਿਆ।ਇਸ ਤੋਂ ਬਾਅਦ ਰਵੀ ਨੂੰ ਫੋਨ ਆਇਆ ਕਿ ਉਸ ਦੇ ਜੀਜੇ ਨੂੰ ਕਿਸੇ ਨੇ ਕਤਲ ਕਰ ਦਿੱਤਾ ਹੈ ਤੇ ਲਾਸ਼ ਰੇਲਵੇ ਸਟੇਸ਼ਨ ਕਪੂਰਥਲਾ ਦੇ ਸਰਕਾਰੀ ਕੁਆਰਟਰਾਂ ਅੱਗੇ ਸੁੱਟੀ ਹੈ। ਰਵੀ ਮੌਕੇ ਉੱਤੇ ਗਿਆ ਤਾਂ ਉਸ ਦੇ ਜੀਜੇ ਸੁਖਵੀਰ ਦੀ ਲਾਸ਼ ਖੂਨ ਨਾਲ ਲੱਥਪੱਥ ਰੇਲਵੇ ਸਟੇਸ਼ਨ ਕਪੂਰਥਲਾ ਦੇ ਸਰਕਾਰੀ ਕੁਆਰਟਰਾਂ ਦੇ ਬਾਹਰ ਪਈ ਸੀ ਜਿਸ ਦਾ ਅਨਿਲ ਨੇ ਕਤਲ ਕਰ ਦਿੱਤਾ ਸੀ।