ਮਾਸਕੋ, 12 ਜਨਵਰੀ (ਪੋਸਟ ਬਿਊਰੋ)- ਰੂਸ ਅਤੇ ਯੂਕਰੇਨ ਵਿਚਾਲੇ ਦੂਰੀਆਂ ਕਿਸੇ ਤੋਂ ਲੁਕੀਆਂ ਨਹੀਂ। ਇਨ੍ਹਾਂ ਦੂਰੀਆਂ ਦੀ ਵੱਡੀ ਵਜ੍ਹਾ ਯੂਕਰੇਨ ਨੂੰ ਮਿਲਿਆ ਅਮਰੀਕਾ ਦਾ ਸਾਥ ਹੈ।
ਪਿਛਲੇ ਸਾਲ ਕਈ ਵਾਰ ਅਜਿਹਾ ਮੌਕਾ ਆਇਆ ਸੀ, ਜਦੋਂ ਯੂਕਰੇਨ ਬਾਰੇ ਦੋਵੇਂ ਦੇਸ਼ ਤਿੱਖੀ ਬਿਆਨਬਾਜ਼ੀ ਉੱਤੇ ਉਤਰ ਆਏ ਸਨ। ਕਦੇ-ਕਦੇ ਅਜਿਹਾ ਲੱਗਣ ਲੱਗਾ ਸੀ ਕਿ ਰੂਸ ਯੂਕਰੇਨ ਨੂੰ ਲੈ ਕੇ ਕਾਫ਼ੀ ਹਮਲਾਵਰ ਹੋ ਰਿਹਾ ਹੈ, ਪਰ ਫਿਰ ਰੂਸ ਨੇ ਇਸ ਸਬੰਧ ਵਿੱਚ ਆਪਣਾ ਸਪੱਸ਼ਟੀਕਰਨ ਤੇ ਆਪਣੀ ਨੀਤ ਦਾ ਖੁਲਾਸਾ ਕਰ ਦਿੱਤਾ ਹੈ। ਜੇਨੇਵਾ ਵਿੱਚ ਰੂਸ ਅਤੇ ਅਮਰੀਕਾ ਵਿਚਾਲੇ ਹੋਈ ਇੱਕ ਬੈਠਕ ਵਿੱਚ ਰੂਸ ਨੇ ਯੂਕਰੇਨ ਨਾਲ ਸਬੰਧਾਂ ਵਿੱਚ ਆਪਣੇ ਪੱਤੇ ਖੋਲ੍ਹ ਦਿੱਤੇ ਹਨ। ਰੂਸ ਦੇ ਉਪ ਵਿਦੇਸ਼ ਮੰਤਰੀ ਸਰਗੀ ਰੇਬਕੋਵ ਨੇ ਸਾਫ਼ ਕਿਹਾ ਕਿ ਉਨ੍ਹਾਂ ਦਾ ਕੋਈ ਇਰਾਦਾ ਯੂਕਰੇਨ ਉੱਤੇ ਹਮਲੇ ਦਾ ਨਹੀਂ। ਸਰਗੀ ਨੇ ਦੱਸਿਆ ਕਿ ਰੂਸੀ ਫ਼ੌਜ ਦੀ ਜੋ ਵੀ ਕੰਬੇਟ ਟ੍ਰੇਨਿੰਗ ਹੋਵੇਗੀ, ਉਹ ਉਨ੍ਹਾਂ ਦੇ ਆਪਣੇ ਖੇਤਰ ਵਿੱਚ ਹੋਵੇਗੀ। ਇਸ ਨਾਲ ਯੂਕਰੇਨ ਉੱਤੇ ਕੋਈ ਅਸਰ ਨਹੀਂ ਪਵੇਗਾ ਅਤੇ ਨਾ ਇਹ ਯੂਕਰੇਨ ਦੇ ਕਾਰਨ ਕੀਤੀ ਜਾਵੇਗੀ।