ਫਿਲਮਕਾਰ ਪ੍ਰਿਯਦਰਸ਼ਨ ਦੇ ਨਿਰਦੇਸ਼ਨ ਵਿੱਚ ਬਣੀ ਹੋਈ ਫਿਲਮ ‘ਹੰਗਾਮਾ 2’ ਨੂੰ ਡਿਜੀਟਲ ਪਲੇਟਫਾਰਮ ਉਤੇ ਰਿਲੀਜ਼ ਕੀਤੇ ਜਾਣ ਦੀਆਂ ਖਬਰਾਂ ਪਹਿਲਾਂ ਆ ਚੁੱਕੀਆਂ ਹਨ। ਬੀਤੇ ਦਿਨੀਂ ਇਸ ਫਿਲਮ ਦੀ ਰਿਲੀਜ਼ ਬਾਰੇ ਅਧਿਕਾਰਕ ਐਲਾਨ ਕੀਤਾ ਗਿਆ। ਸਾਲ 2003 ਵਿੱਚ ਰਿਲੀਜ਼ ਹੋਈ ਫਿਲਮ ‘ਹੰਗਾਮਾ’ ਦੀ ਸੀਕਵਲ ਫਿਲਮ ‘ਹੰਗਾਮਾ 2’ ਡਿਜੀਟਲ ਪਲੇਟਫਾਰਮ ਡਿਜ਼ਨੀ ਪਲੱਸ ਹੌਟਸਟਾਰ ਉੁੱਤੇ 23 ਜੁਲਾਈ ਨੂੰ ਰਿਲੀਜ਼ ਹੋਵੇਗੀ। ਅਭਿਨੇਤਰੀ ਸ਼ਿਲਪਾ ਸ਼ੈਟੀ ਨੇ ਫਿਲਮ ਦੇ ਪੋਸਟਰ ਦੇ ਨਾਲ ਰਿਲੀਜ਼ ਡੇਟ ਇੰਸਟਾਗ੍ਰਾਮ ਉੱਤੇ ਸਾਂਝੀ ਕਰਦੇ ਹੋਏ ਲਿਖਿਆ, ‘‘ਸ਼ਾਂਤ ਨਹੀਂ ਰਹਿ ਸਕਦੀ, ਕਿਉਂਕਿ ਹੋਵੇਗਾ ਹੰਗਾਮਾ।। ‘ਹੰਗਾਮਾ 2’ ਦਾ ਟ੍ਰੇਲਰ ਛੇਤੀ ਰਿਲੀਜ਼ ਹੋਵੇਗਾ। ਤੁਸੀਂ ਇਸ ਨੂੰ ਛੱਡਣਾ ਨਹੀਂ ਚਾਹੋਗੇ।’
ਸਾਲ 2007 ਵਿੱਚ ਰਿਲੀਜ਼ ਹੋਈ ਫਿਲਮ ‘ਅਪਨੇ’ ਦੇ ਕਰੀਬ 14 ਸਾਲ ਬਾਅਦ ਬਤੌਰ ਅਭਿਨੇਤਰੀ ਸ਼ਿਲਪਾ ਦੀ ਇਹ ਪਹਿਲੀ ਫਿਲਮ ਰਿਲੀਜ਼ ਹੋਵੇਗੀ। ਇਸ ਵਿੱਚ ਉਸ ਦੇ ਨਾਲ ਮੀਜਾਨ ਜ਼ਾਫਰੀ, ਪਰੇਸ਼ ਰਾਵਲ, ਪ੍ਰਨਿਤਾ ਸੁਭਾਸ਼ ਅਤੇ ਰਾਜਪਾਲ ਯਾਦਵ ਖਾਸ ਭੂਮਿਕਾਵਾਂ ਵਿੱਚ ਹਨ। ਬੀਤੇ ਮੰਗਲਵਾਰ ਫਿਲਮਕਾਰ ਅਨੁਭਵ ਸਿਨਹਾ ਨੇ ਅਣਟਾਈਟਲਡ ਐਕਸ਼ਨ ਫਿਲਮ ਦੀ ਸ਼ੂਟਿੰਗ ਸ਼ੁਰੂ ਕੀਤੀ ਹੈ। ਇਸ ਨੂੰ ਅਨੁਭਵ ਨਿਰਮਾਤਾ ਭੂਸ਼ਣ ਕੁਮਾਰ ਨਾਲ ਮਿਲ ਕੇ ਬਣਾ ਰਹੇ ਹਨ, ਜਦ ਕਿ ਨਿਰਦੇਸ਼ਨ ਦੀ ਵਾਗ ‘ਛਲਾਂਗ’ ਅਤੇ ‘ਅਲੀਗੜ੍ਹ’ ਵਰਗੀਆਂ ਫਿਲਮਾਂ ਦੇ ਡਾਇਰੈਕਟਰ ਹੰਸਲ ਮਹਿਤਾ ਦੇ ਹੱਥ ਹੈ। ਇਸ ਫਿਲਮ ਨਾਲ ਜੁੜੇ ਸੂਤਰਾਂ ਮੁਤਾਬਕ ਇਹ ਫਿਲਮ ਇੱਕ ਸੱਚੀ ਅੰਤਰਰਾਸ਼ਟਰੀ ਘਟਨਾ ਉੱਤੇ ਆਧਾਰਤ ਹੈ।