ਭੁਵਨੇਸ਼ਵਰ, 22 ਸਤੰਬਰ (ਪੋਸਟ ਬਿਊਰੋ)- ਭਾਰਤੀ ਪੁਲਾੜ ਖੋਜ ਸੰਗਠਨ (ਇਸਰੋ) ਦੇ ਮੁਖੀ ਕੇ ਸਿਵਨ ਨੇ ਕੱਲ੍ਹ ਕਿਹਾ ਕਿ ਚੰਦਰਯਾਨ-2 ਮਿਸ਼ਨ ਆਪਣੇ ਟੀਚੇ ਵਿੱਚ 98 ਫੀਸਦੀ ਸਫਲ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਇਸਰੋ 2020 ਤੱਕ ਦੂਜੇ ਚੰਦਰਯਾਨ ਮਿਸ਼ਨ 'ਤੇ ਧਿਆਨ ਕੇਂਦਰਿਤ ਕਰ ਰਿਹਾ ਹੈ। ਸਿਵਨ ਨੇ ਇਹ ਵੀ ਕਿਹਾ ਕਿ ਚੰਦਰਯਾਨ-2 ਦਾ ਆਰਬੀਟਰ ਬਹੁਤ ਸਹੀ ਤਰੀਕੇ ਨਾਲ ਕੰਮ ਕਰ ਰਿਹਾ ਹੈ ਤੇ ਉਮੀਦ ਹੈ ਕਿ ਇਹ ਇੱਕ ਸਾਲ ਦੀ ਥਾਂ ਸਾਢੇ ਸੱਤ ਸਾਲ ਤੱਕ ਤੈਅ ਵਿਗਿਆਨਕ ਪ੍ਰਯੋਗ ਠੀਕ ਤਰ੍ਹਾਂ ਨਾਲ ਕਰਦਾ ਰਹੇਗਾ।
ਭੁਵਨੇਸ਼ਵਰ ਵਿੱਚ ਸਿਵਨ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਕਿਹਾ, ‘‘ਅਸੀਂ ਅਜੇ ਤੱਕ ਲੈਂਡਰ ਨਾਲ ਸੰਪਰਕ ਸਥਾਪਤ ਕਰਨ ਵਿੱਚ ਸਫਲ ਨਹੀਂ ਹੋ ਸਕੇ। ਜਦੋਂ ਕੋਈ ਡਾਟਾ ਸਾਨੂੰ ਮਿਲੇਗਾ, ਜ਼ਰੂਰੀ ਕਦਮ ਚੁੱਕੇ ਜਾਣਗੇ।”
ਵਰਨਣ ਯੋਗ ਹੈ ਕਿ ਚੰਦਰਮਾ 'ਤੇ ਰਾਤ ਹੋ ਗਈ ਹੈ। ਲੈਂਡਰ ਵਿਕਰਮ ਦੀ ਬੈਟਰੀ ਨੂੰ ਚਾਰਜ ਕਰਨ ਦੇ ਲਈ ਸੂਰਜ ਦੀ ਰੋਸ਼ਨੀ ਨਹੀਂ ਮਿਲੇਗੀ। ਲੈਂਡਰ ਨੇ ਇੱਕ ਚੰਦਰ ਦਿਵਸ (ਪ੍ਰਿਥਵੀ ਦੇ 14 ਦਿਨਾਂ ਬਰਾਬਰ) ਕੰਮ ਕਰਨਾ ਸੀ। ਕੱਲ੍ਹ ਤੜਕੇ ਇਹ ਸਮਾਂ ਖਤਮ ਹੋ ਗਿਆ। ਇਸਰੋ ਨੇ ਕਿਹਾ ਕਿ ਵਿਕਰਮ ਨਾਲ ਸੰਪਰਕ ਟੁੱਟਣ ਦੇ ਸਹੀ ਕਾਰਨਾਂ ਦਾ ਪਤਾ ਲਾਉਣ ਲਈ ਡਾਟਾ ਦਾ ਅਧਿਐਨ ਕੀਤਾ ਜਾ ਰਿਹਾ ਹੈ। ਸਿਵਨ ਨੇ ਕਿਹਾ ਕਿ ਅਸੀਂ ਦੋ ਕਾਰਨਾਂ ਤੋਂ ਕਹਿ ਰਹੇ ਹਾਂ ਕਿ ਚੰਦਰਯਾਨ-2 ਮਿਸ਼ਨ ਨੇ 98 ਫੀਸਦੀ ਟੀਚਾ ਹਾਸਲ ਕਰ ਲਿਆ ਹੈ। ਪਹਿਲਾ ਕਾਰਨ ਵਿਗਿਆਨ ਅਤੇ ਦੂਸਰਾ ਟੈਕਨਾਲੋਜੀ ਡੈਮਾਂਸਟਰੇਸ਼ਨ ਹੈ। ਜਿੱਥੋਂ ਤੱਕ ਉਦਯੋਗਿਕੀ ਪ੍ਰਮਾਣ ਦੇ ਮੋਰਚੇ ਦੀ ਗੱਲ ਹੈ ਤਾਂ ਇਸ ਵਿੱਚ ਲਗਭਗ ਪੂਰੀ ਤਰ੍ਹਾਂ ਸਫਲਤਾ ਹਾਸਲ ਕੀਤੀ ਗਈ ਹੈ। ਸਿਵਨ ਨੇ ਕਿਹਾ ਕਿ ਆਰਬੀਟਰ ਲਈ ਸ਼ੁਰੂ ਵਿੱਚ ਇੱਕ ਸਾਲ ਦੀ ਯੋਜਨਾ ਬਣਾਈ ਗਈ ਸੀ, ਪਰ ਹੁਣ ਸੰਭਾਵਨਾ ਹੈ ਕਿ ਇਹ ਸਾਢੇ ਸੱਤ ਸਾਲ ਕੰਮ ਕਰੇਗਾ।