ਚੰਡੀਗੜ੍ਹ, 22 ਸਤੰਬਰ (ਪੋਸਟ ਬਿਊਰੋ)- ਜ਼ਿਲ੍ਹਾ ਅਦਾਲਤ ਵਿੱਚ ਰਿਸ਼ਵਤ ਕੇਸ ਵਿਚ ਦੋਸ਼ੀ ਜਸਟਿਸ ਨਿਰਮਲ ਯਾਦਵ ਦੇ ਮਾਮਲੇ ਵਿੱਚ ਕੱਲ੍ਹ ਹੋਈ ਸੁਣਵਾਈ ਦੌਰਾਨ ਸੀ ਬੀ ਆਈ ਵੱਲੋਂ ਪੇਸ਼ ਕੀਤੇ ਦੋ ਗਵਾਹ ਆਪਣੇ ਬਿਆਨ ਤੋਂ ਮੁੱਕਰ ਗਏ ਹਨ। ਇਹ ਦੋਵੇਂ ਹਾਈ ਕੋਰਟ 'ਚ ਪ੍ਰੈਕਟਿਸ ਕਰਨ ਵਾਲੇ ਇੱਕ ਵਕੀਲ ਪੰਕਜ ਭਾਰਦਵਾਜ ਤੇ ਰੋਹਤਕ ਦੇ ਆਈ ਸਰਜਨ ਡਾਕਟਰ ਮਾਰਕੰਡੇ ਆਹੂਜਾ ਦੱਸੇ ਗਏ ਸਨ।
ਸੀ ਬੀ ਆਈ ਨੂੰ ਪਹਿਲਾਂ ਦਿੱਤੇ ਬਿਆਨਾਂ ਵਿੱਚ ਪੰਕਜ ਭਾਰਦਵਾਹ ਨੇ ਕਿਹਾ ਸੀ ਕਿ ਉਹ ਸੰਜੀਵ ਬੰਸਲ ਨੂੰ ਜਾਣਦੇ ਹਨ ਅਤੇ 13 ਅਗਸਤ 2008 ਨੂੰ ਬਾਂਸਲ ਨੇ ਉਨ੍ਹਾਂ ਨੂੰ ਫੋਨ ਕਰ ਕੇ ਇਸ ਕੇਸ ਵਿੱਚ ਕੁਝ ਫੇਵਰ ਕਰਨ ਦੀ ਮੰਗ ਕੀਤੀ ਸੀ। ਕੱਲ੍ਹ ਪੰਕਜ ਨੇ ਕਿਹਾ ਕਿ ਉਨ੍ਹਾਂ ਨੇ ਸੀ ਬੀ ਆਈ ਨੂੰ ਅਜਿਹਾ ਕੁਝ ਨਹੀਂ ਕਿਹਾ ਅਤੇ ਸੀ ਬੀ ਆਈ ਨੇ ਉਨ੍ਹਾਂ ਦੇ ਬਿਆਨ ਦਰਜ ਹੀ ਨਹੀਂ ਕਰਵਾਏ ਸਨ, ਆਪਣੇ ਆਪ ਹੀ ਸਟੇਟਮੈਂਟ ਸਟੇਟਮੈਂਟ ਲਿਖੀ ਅਤੇ ਫਿਰ ਉਨ੍ਹਾਂ ਦੇ ਦਸਖਤ ਕਰ ਲਏ ਸਨ। ਦੂਸਰੇ ਪਾਸੇ ਮਾਰਕੰਡੇ ਆਹੂਜਾ ਨੇ ਸੀ ਬੀ ਆਈ ਨੂੰ ਪਹਿਲਾਂ ਕਿਹਾ ਕਿ ਉਹ ਹੋਟਲੀਅਰ ਰਵਿੰਦਰ ਸਿੰਘ ਅਤੇ ਸੰਜੀਵ ਬੰਸਲ ਨੂੰ ਜਾਣਦੇ ਹਨ। ਸੰਜੀਵ ਬੰਸਲ ਨੇ 14 ਅਤੇ 15 ਅਗਸਤ 2008 ਨੂੰ ਫੋਨ ਕਰ ਕੇ ਦੱਸਿਆ ਸੀ ਕਿ ਰਵਿੰਦਰ ਸਿੰਘ ਨੇ ਬੰਸਲ ਨੂੰ 15 ਲੱਖ ਰੁਪਏ ਦਿੱਤੇ ਸਨ, ਜੋ ਜਸਟਿਸ ਨਿਰਮਲ ਯਾਦਵ ਨੂੰ ਭੇਜੇਣੇ ਸਨ ਤੇ ਗਲਤੀ ਨਾਲ ਜਸਟਿਸ ਨਿਰਮਲਜੀਤ ਕੌਰ ਦੇ ਘਰ ਚਲੇ ਗਏ ਹਨ। ਇਸ ਤੋਂ ਬਾਅਦ ਕੱਲ੍ਹ ਅਦਾਲਤ ਵਿੱਚ ਮਾਰਕੰਡੇ ਆਹੂਜਾ ਨੇ ਕਿਹਾ ਕਿ ਉਨ੍ਹਾਂ ਨੇੇ ਸੀ ਬੀ ਆਈ ਨੂੰ ਅਜਿਹਾ ਕੋਈ ਬਿਆਨ ਨਹੀਂ ਦਿੱਤਾ ਸੀ। ਦੋਸ਼ ਇਹ ਹੈ ਕਿ 13 ਅਗਸਤ 2008 ਦੀ ਰਾਤ ਨੂੰ ਹਰਿਆਣਾ ਦੇ ਓਦੋਂ ਦੇ ਵਧੀਕ ਐਡਵੋਕੇਟ ਜਨਰਲ ਸੰਜੀਵ ਬੰਸਲ ਨੇ ਆਪਣੇ ਮੁਨਸ਼ੀ ਨੂੰ ਜਸਟਿਸ ਨਿਰਮਲ ਯਾਦਵ ਦੇ ਘਰ 15 ਲੱਖ ਰੁਪਏ ਦੇਣ ਭੇਜਿਆ ਸੀ, ਪਰ ਮੁਨਸ਼ੀ ਨੇ ਗਲਤੀ ਨਾਲ ਇਹ ਰਕਮ ਜਸਟਿਸ ਨਿਰਮਲਜੀਤ ਕੌਰ ਦੇ ਘਰ ਪੁਚਾ ਦਿੱਤੀ। ਇਸ ਉੱਤੇ ਜਸਟਿਸ ਨਿਰਮਲਜੀਤ ਕੌਰ ਦੇ ਨੌਕਰ ਨੇ ਪੁਲਸ ਨੂੰ ਸ਼ਿਕਾਇਤ ਕਰ ਦਿੱਤੀ ਸੀ। ਇਸ ਮਾਮਲੇ ਵਿੱਚ ਸੀ ਬੀ ਆਈ ਨੇ ਛੇ ਜਣਿਆਂ ਖਿਲਾਫ ਕੇਸ ਦਰਜ ਕੀਤਾ ਸੀ।