ਵਾਸ਼ਿੰਗਟਨ, 19 ਸਤੰਬਰ (ਪੋਸਟ ਬਿਊਰੋ)- ਅਮਰੀਕੀ ਪਾਰਲੀਮੈਂਟ ਦੇ ਹੇਠਲੇ ਸਦਨ ਪ੍ਰਤੀਨਿਧ ਸਭਾ ਦੀ ਇਕ ਕਮੇਟੀ ਨੇ 737 ਮੈਕਸ ਜਹਾਜ਼ਾਂ ਦੇ ਹਾਦਸਿਆਂ ਬਾਰੇ ਸਫਾਈ ਦੇਣ ਲਈ ਪ੍ਰਮੁੱਖ ਹਵਾਬਾਜ਼ੀ ਕੰਪਨੀ ਬੋਇੰਗ ਦੇ ਸੀ ਈ ਓ ਡੈਨਿਸ ਮੁਲੇਨਬਰਗ ਨੂੰ ਤਲਬ ਕਰ ਲਿਆ ਹੈ। ਟਰਾਂਸਪੋਰਟੇਸ਼ਨ ਐਂਡ ਇੰਫ੍ਰਾਸਟ੍ਰਕਚਰ ਕਮੇਟੀ ਦੇ ਚੇਅਰਮੈਨ ਪੀਟਰ ਡੀਫੈਜੀਓ ਨੇ ਬੋਇੰਗ ਦੀ ਕਮਰਸ਼ੀਅਲ ਏਅਰਪਲੇਨ ਡਵੀਜ਼ਨ ਦੀ ਮੁੱਖ ਇੰਜੀਨੀਅਰ ਜੌਨ ਹੈਮਿਲਟਨ ਨੂੰ ਵੀ ਗਵਾਹੀ ਲਈ ਕਮੇਟੀ ਦੇ ਸਾਹਮਣੇ ਪੇਸ਼ ਹੋਣ ਲਈ ਕਿਹਾ ਹੈ।
ਪਿਛਲੇ ਹਫਤੇ ਡੀਫੈਜੀਓ ਨੇ 737 ਮੈਕਸ ਜਹਾਜ਼ਾਂ ਦੀ ਡਿਜ਼ਾਈਨ ਅਤੇ ਸਰਟੀਫਿਕੇਸ਼ਨ 'ਤੇ ਸਵਾਲ ਜਵਾਬ ਲਈ ਮੁਲੇਨਬਰਗ ਨੂੰ ਕੰਪਨੀ ਦੇ ਹੋਰ ਮੁਲਾਜ਼ਮਾਂ ਦੀ ਮੌਜੂਦਗੀ ਯਕੀਨੀ ਬਣਾਉਣ ਨੂੰ ਕਿਹਾ ਸੀ। ਕੰਪਨੀ ਦੇ ਨੁਮਾਇੰਦੇ ਨੇ ਕਿਹਾ ਕਿ ‘ਬੋਇੰਗ ਨੂੰ ਪਾਰਲੀਮੈਂਟਰੀ ਕਮੇਟੀ ਦਾ ਸੱਦਾ ਮਿਲ ਗਿਆ ਹੈ। ਇਸ ਉਤੇ ਵਿਚਾਰ ਚੱਲ ਰਿਹਾ ਹੈ। ਅਸੀਂ ਪਾਰਲੀਮੈਂਟ ਤੇ ਰੈਗੂਲੇਟਰੀ ਅਥਾਰਟੀਆਂ ਦੇ ਸਹਿਯੋਗ ਲਈ ਹਮੇਸ਼ਾ ਹੀ ਤੱਤਪਰ ਹਾਂ ਤਾਂ ਜੋ ਮੈਕਸ ਜਹਾਜ਼ਾਂ ਦੀ ਸੇਵਾ ਬਹਾਲ ਹੋ ਸਕੇ। ਬੀਤੇ ਸਾਲ ਅਕਤੂਬਰ 'ਚ ਇੰਡੋਨੇਸ਼ੀਆ ਏਅਰਲਾਈਨਸ ਅਤੇ ਇਸ ਸਾਲ ਮਾਰਚ 'ਚ ਇਥੋਪੀਆ ਏਅਰਲਾਈਨਸ ਦਾ ਬੋਇੰਗ 737 ਮੈਕਸ ਜਹਾਜ਼ ਉਡਾਣ ਭਰਨ ਦੇ ਕੁਝ ਮਿੰਟ ਬਾਅਦ ਹੀ ਹਾਦਸੇ ਦਾ ਸ਼ਿਕਾਰ ਹੋ ਗਿਆ ਸੀ। ਇਨ੍ਹਾਂ ਦੋਵਾਂ ਹਾਦਸਿਆਂ 'ਚ ਕਰੀਬ 350 ਲੋਕਾਂ ਦੀ ਜਾਨ ਗਈ ਸੀ। ਇਸ ਤੋਂ ਬਾਅਦ 737 ਮੈਕਸ ਜਹਾਜ਼ਾਂ ਦੀ ਡਿਜ਼ਾਈਨਿੰਗ 'ਚ ਇਸਤੇਮਾਲ ਕੀਤੀ ਜਾ ਰਹੀ ਤਕਨੀਕ ਨੂੰ ਲੈ ਕੇ ਸਵਾਲ ਉਠਾਏ ਗਏ ਸਨ। ਬਾਅਦ 'ਚ ਕੰਪਨੀ ਨੂੰ ਇਨ੍ਹਾਂ ਜਹਾਜ਼ਾਂ ਨੂੰ ਸੇਵਾ ਤੋਂ ਹਟਾਉਣਾ ਪਿਆ ਸੀ, ਜਿਸ ਨਾਲ ਉਸ ਨੂੰ ਅਰਬਾਂ ਦਾ ਨੁਕਸਾਨ ਹੋਇਆ।