ਲੰਡਨ, 19 ਸਤੰਬਰ (ਪੋਸਟ ਬਿਊਰੋ) : ਸਾਊਦੀ ਸਰਕਾਰ ਵੱਲੋਂ ਇਹ ਐਲਾਨ ਕੀਤੇ ਜਾਣ ਕਿ ਵੀਕੈਂਡ ਉੱਤੇ ਉਨ੍ਹਾਂ ਦੇ ਅਹਿਮ ਤੇਲ ਟਿਕਾਣਿਆਂ ਉੱਤੇ ਹੋਏ ਹਮਲੇ ਤੋਂ ਬਾਅਦ ਬੰਦ ਹੋਈ ਤੇਲ ਦੀ ਅੱਧੀ ਤੋਂ ਵੱਧ ਸਪਲਾਈ ਨੂੰ ਬਹਾਲ ਕਰ ਦਿੱਤਾ ਗਿਆ ਹੈ ਤੇਲ ਦੀਆਂ ਕੀਮਤਾਂ ਵਿੱਚ ਅਚਾਨਕ ਆਇਆ ਉਛਾਲ ਮੱਠਾ ਪੈ ਗਿਆ ਹੈ।
ਬੁੱਧਵਾਰ ਨੂੰ ਬੈਂਚਮਾਰਕ ਯੂਐਸ ਕਰੂਡ 42 ਸੈਂਟ ਹੇਠਾਂ ਆ ਗਿਆ ਤੇ 58.92 ਪ੍ਰਤੀ ਬੈਰਲ ਉੱਤੇ ਆ ਕੇ ਰੁਕਿਆ। ਮੰਗਲਵਾਰ ਨੂੰ ਇਸ ਵਿੱਚ 3.56 ਡਾਲਰ ਦੀ ਗਿਰਾਵਟ ਦਰਜ ਕੀਤੀ ਗਈ ਸੀ। ਲੰਡਨ ਵਿੱਚ ਕੌਮਾਂਤਰੀ ਬੈਂਚਮਾਰਕ ਬ੍ਰੈਂਟ ਕਰੂਡ 27 ਸੈਂਟ ਡਿੱਗ ਕੇ 64.28 ਡਾਲਰ ਪ੍ਰਤੀ ਬੈਰਲ ਤੱਕ ਆ ਗਿਆ। ਇਸ ਤੋਂ ਪਹਿਲਾਂ ਇਸ ਵਿੱਚ 4.47 ਡਾਲਰ ਦੀ ਗਿਰਾਵਟ ਦਰਜ ਕੀਤੀ ਗਈ।
ਵੀਕੈਂਡ ਉੱਤੇ ਹੋਏ ਇਸ ਹਮਲੇ ਕਾਰਨ ਵਿਸ਼ਵਵਿਆਪੀ ਪੱਧਰ ਉੱਤੇ ਤੇਲ ਦੀ ਸਪਲਾਈ ਵਿੱਚ 5 ਫੀ ਸਦੀ ਦੀ ਗਿਰਾਵਟ ਦਰਜ ਕੀਤੀ ਗਈ ਪਰ ਸਾਊਦੀ ਅਰਬ ਦਾ ਕਹਿਣਾ ਹੈ ਕਿ ਇਸ ਮਹੀਨੇ ਦੇ ਅੰਤ ਤੱਕ ਸੱਭ ਠੀਕ ਤੇ ਪਹਿਲਾਂ ਵਰਗਾ ਹੋ ਜਾਵੇਗਾ। ਭਾਵੇਂ ਯਮਨ ਦੇ ਬਾਗੀਆਂ ਵੱਲੋਂ ਇਸ ਹਮਲੇ ਦੀ ਜਿ਼ੰਮੇਵਾਰੀ ਲਈ ਗਈ ਹੈ ਪਰ ਅਮਰੀਕੀ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਇਸ ਹਮਲੇ ਪਿੱਛੇ ਸਾਊਦੀ ਅਰਬ ਦੇ ਖੇਤਰੀ ਵਿਰੋਧੀ ਇਰਾਨ ਦਾ ਹੀ ਹੱਥ ਹੈ। ਮਾਹਿਰਾਂ ਦਾ ਕਹਿਣਾ ਹੈ ਕਿ ਤਣਾਅ ਵਿੱਚ ਵਾਧਾ ਹੋਣ ਨਾਲ ਤੇਲ ਦੀਆਂ ਕੀਮਤਾਂ ਇੱਕ ਵਾਰੀ ਫਿਰ ਉੱਪਰ ਜਾ ਸਕਦੀਆ ਹਨ।
ਬੁੱਧਵਾਰ ਨੂੰ ਸਾਊਦੀ ਅਰਬ ਨੇ ਆਖਿਆ ਕਿ ਮੱਧਪੂਰਬੀ ਵਾਟਰਵੇਅਜ਼ ਦੀ ਹਿਫਾਜ਼ਤ ਲਈ ਉਹ ਅਮਰੀਕਾ ਦੀ ਅਗਵਾਈ ਵਾਲੇ ਗੱਠਜੋੜ ਦਾ ਹਿੱਸਾ ਬਣੇਗਾ। ਇੱਥੇ ਦੱਸਣਾ ਬਣਦਾ ਹੈ ਕਿ ਇਸ ਹਮਲੇ ਤੋਂ ਬਾਅਦ ਅਮਰੀਕਾ ਵੱਲੋਂ ਇੱਕ ਗੱਠਜੋੜ ਬਣਾਇਆ ਗਿਆ ਹੈ ਜਿਸ ਵਿੱਚ ਆਸਟਰੇਲੀਆ, ਬਹਿਰੇਨ ਤੇ ਯੂਨਾਇਟਿਡ ਕਿੰਗਡਮ ਸ਼ਾਮਲ ਹਨ।