ਜਲੰਧਰ, 18 ਸਤੰਬਰ (ਪੋਸਟ ਬਿਊਰੋ)- ਜਲੰਧਰ-ਅੰਮ੍ਰਿਤਸਰ ਰੇਲ ਮਾਰਗ 'ਤੇ ਗੁਰੂ ਰਵਿਦਾਸ ਨਗਰ ਮਕਸੂਦਾਂ ਨੇੜੇ ਜਿੰਦਾ ਫਾਟਕ ਤੋਂ ਕੁਝ ਕੁ ਦੂਰੀ 'ਤੇ ਬਜ਼ੁਰਗ ਔਰਤ ਨੇ ਤੜਕਸਾਰ ਰੇਲ ਗੱਡੀ ਅੱਗੇ ਛਾਲ ਮਾਰ ਕੇ ਖੁਦਕੁਸ਼ੀ ਕਰ ਲਈ। ਇਸ ਦਾ ਓਦੋਂ ਪਤਾ ਲੱਗਾ, ਜਦੋਂ ਤੜਕੇ ਜਿੰਦਾ ਫਾਟਕ 'ਤੇ ਡਿਊਟੀ ਕਰ ਰਹੇ ਗੇਟਮੈਨ ਕੋਲੋਂ ਰੇਲਵੇ ਮੁਲਾਜ਼ਮ ਚਾਬੀ ਲੈਣ ਆਇਆ ਤਾਂ ਉਸ ਨੂੰ ਰਸਤੇ 'ਚ ਲਾਸ਼ ਦਿਸੀ, ਜਿਸ ਦੇ ਸਿਰ 'ਤੇ ਗੰਭੀਰ ਸੱਟਾਂ ਸਨ।
ਗੇਟਮੈਨ ਵੱਲੋਂ ਸੂਰਾਨੁਸੀ ਵਿਖੇ ਸਟੇਸ਼ਨ ਮਾਸਟਰ ਨੂੰ ਸੂਚਿਤ ਕਰਨ ਉਪਰੰਤ ਸੂਰਾਨੁਸੀ ਸਟੇਸ਼ਨ ਮਾਸਟਰ ਵੱਲੋਂ ਜਲੰਧਰ ਰੇਲਵੇ ਸਟੇਸ਼ਨ 'ਤੇ ਜੀ ਆਰ ਪੀ ਪੁਲਸ ਨੂੰ ਸੂਚਿਤ ਕੀਤਾ। ਮੌਕੇ ਉਤੇ ਪੁੱਜੇ ਜੀ ਆਰ ਪੀ ਪੁਲਸ ਵੱਲੋਂ ਤਲਾਸ਼ੀ ਲਏ ਜਾਣ 'ਤੇ ਉਸ ਕੋਲੋਂ ਮਿਲੀ ਗੁਥਲੀ 'ਚੋਂ ਇਕ ਪਰਚੀ ਮਿਲੀ ਹੈ, ਜਿਸ ਦੇ ਇਕ ਪਾਸੇ ਸੁਰਜੀਤ ਕੌਰ ਵਾਸੀ ਮਕਾਨ ਨੰਬਰ 132/11, ਪਿਸ਼ੌਰੀ ਮੁਹੱਲਾ ਭਾਰਗੋ ਕੈਂਪ, ਜਲੰਧਰ ਤੇ ਦੂਜੇ ਪਾਸੇ ‘ਖੋਲ੍ਹ ਕੇ ਦੇਖੋ ਮੇਰੇ ਪੁੱਤਰ ਬੜੇ ਚੰਗੇ ਹਨ' ਲਿਖਿਆ ਹੋਇਆ ਸੀ। ਵਰਨਣ ਯੋਗ ਹੈ ਕਿ ਮੌਕੇ 'ਤੇ ਪੁੱਜੀ ਰੇਲਵੇ ਪੁਲਸ ਨੇ ਪਰਚੀ 'ਤੇ ਲਿਖੇ ਪਤੇ ਨੂੰ ਲੱਭਣ ਦੀ ਕੋਸ਼ਿਸ਼ ਨਹੀਂ ਕੀਤੀ। ਪੁਲਸ ਨੂੰ ਜਦੋਂ ਪਰਚੀ ਬਾਰੇ ਪੁੱਛਿਆ ਗਿਆ ਤਾਂ ਉਨ੍ਹਾਂ ਇਹ ਕਹਿ ਕੇ ਟਾਲ ਦਿੱਤਾ ਕਿ ਸਿਰਫ 30 ਰੁਪਏ ਮਿਲੇ ਹਨ। ਮੀਡੀਆ ਵੱਲੋਂ ਵਾਰ-ਵਾਰ ਜਦੋਂ ਪੁੱਛਿਆ ਗਿਆ ਤਾਂ ਪੁਲਸ ਨੇ ਪਰਚੀ ਦਿਖਾਈ।