ਟੋਰਾਂਟੋ, 17 ਸਤੰਬਰ (ਪੋਸਟ ਬਿਊਰੋ) : ਪਾਰਲੀਆਮੈਂਟਰੀ ਬਜਟ ਆਫਿਸ ਦਾ ਕਹਿਣਾ ਹੈ ਕਿ ਟਰੂਡੋ ਦੀ ਯੋਜਨਾ ਤਹਿਤ ਕੁੱਲ ਘਰੇਲੂ ਉਤਪਾਦ ਦੀ ਪ੍ਰਤੀਸ਼ਤ ਦੇ ਹਿਸਾਬ ਨਾਲ ਕਿਫਾਇਤੀ ਘਰਾਂ ਉੱਤੇ ਲਿਬਰਲ ਪਾਰਟੀ ਵੱਲੋਂ ਕੀਤਾ ਜਾ ਰਿਹਾ ਖਰਚਾ ਹਾਰਪਰ ਦੀ ਯੋਜਨਾ ਨਾਲੋਂ 19 ਫੀ ਸਦੀ ਘੱਟ ਹੈ। 

ਇਸ ਦੌਰਾਨ ਵੱਡੀਆਂ ਕਾਰਪੋਰੇਸ਼ਨਜ਼ ਨੂੰ ਟਰੂਡੋ 14 ਬਿਲੀਅਨ ਡਾਲਰ ਵਾਧੂ ਦੇ ਰਹੇ ਹਨ। ਪਿੱਛੇ ਜਿਹੇ ਯੂਨੀਵਰਸਿਟੀ ਆਫ ਟੋਰਾਂਟੋ ਦੇ ਪ੍ਰੋਫੈਸਰ ਡੇਵਿਡ ਹਲਚਾਂਸਕੀ ਨੇ ਆਖਿਆ ਕਿ ਲਿਬਰਲ ਪਾਰਟੀ ਤੇ ਸੀਐਮਐਚਸੀ ਨੇ ਇਸ ਸਾਰੀ ਰਕਮ ਨੂੰ ਮਿਲਾ ਕੇ ਇੰਜ ਪੇਸ਼ ਕੀਤਾ ਹੈ ਜਿਵੇਂ ਕੋਈ ਵੱਡੀ ਡੀਲ ਹੋ ਰਹੀ ਹੋਵੇ। ਪਰ ਫੈਡਰਲ ਬਜਟ ਦੇ ਹਿਸਾਬ ਨਾਲ ਹਾਊਸਿੰਗ ਸਬੰਧੀ ਲੋੜਾਂ ਨੂੰ ਪੂਰਾ ਕਰਨ ਤੇ ਹਾਊਸਿੰਗ ਉੱਤੇ ਇਸ ਸਮੇਂ ਕੀਤਾ ਜਾ ਰਿਹਾ ਖਰਚਾ ਬਹੁਤ ਹੀ ਘੱਟ ਹੈ।
ਪਿਛਲੇ ਹਫਤੇ ਆਈ ਇੱਕ ਰਿਪੋਰਟ ਵਿੱਚ ਮਾਹਿਰ ਇਸ ਗੱਲ ਉੱਤੇ ਸਹਿਮਤ ਹੋਏ ਕਿ ਬੇਘਰੇ ਲੋਕਾਂ ਨੂੰ ਦਰਪੇਸ਼ ਚੁਣੌਤੀਆਂ ਨਾਲ ਨਜਿੱਠਣ ਲਈ ਟਰੂਡੋ ਵੱਲੋਂ ਸ਼ਾਇਦ ਹੀ ਕੋਈ ਮਦਦ ਕੀਤੀ ਗਈ ਹੋਵੇ। ਇਹ ਵੀ ਆਖਿਆ ਗਿਆ ਕਿ ਜਸਟਿਨ ਟਰੂਡੋ ਦੀਆਂ ਮਿੱਠੀਆਂ ਗੱਲਾਂ ਨਾਲ ਘਰ ਨਹੀਂ ਬਣਨ ਵਾਲੇ। ਦੂਜੇ ਪਾਸੇ ਲੋਕਾਂ ਲਈ 500,000 ਮਿਆਰੀ ਤੇ ਕਿਫਾਇਤੀ ਹਾਊਸਿੰਗ ਯੂਨਿਟਸ ਲਈ ਐਨਡੀਪੀ ਆਗੂ ਜਗਮੀਤ ਸਿੰਘ ਕੋਲ ਨਵੀਂ ਡੀਲ ਹੈ। ਜਗਮੀਤ ਸਿੰਘ ਨੇ ਆਖਿਆ ਕਿ ਦੇਸ਼ ਭਰ ਵਿੱਚ ਆਪਣੇ ਸਿਰ ਉੱਤੇ ਛੱਤ ਤਲਾਸ਼ਣ ਲਈ ਲੋਕਾਂ ਨੂੰ ਕਾਫੀ ਸੰਘਰਸ਼ ਕਰਨਾ ਪੈਂਦਾ ਹੈ। ਇਹ ਯਕੀਨੀ ਬਣਾਉਣ ਲਈ ਕਿ ਹਰ ਕਿਸੇ ਕੋਲ ਸੇਫ ਤੇ ਕਿਫਾਇਤੀ ਘਰ ਹੋਵੇ ਸਾਨੂੰ ਕਾਫੀ ਕੁੱਝ ਕਰਨ ਦੀ ਲੋੜ ਹੈ। ਇਸੇ ਲਈ ਐਨਡੀਪੀ ਕਿਫਾਇਤੀ ਘਰਾਂ ਨੂੰ ਆਪਣੀ ਮੁੱਖ ਤਰਜੀਹ ਬਣਾਵੇਗੀ ਤੇ ਕਮਿਊਨਿਟੀਜ਼ ਨਾਲ ਰਲ ਕੇ ਮੌਜੂਦਾ ਹਾਊਸਿੰਗ ਦਾ ਪਸਾਰ ਕਰੇਗੀ ਤੇ ਇਸ ਵਿੱਚ ਸੁਧਾਰ ਕਰੇਗੀ, ਊਰਜਾ ਦੀ ਮੰਗ ਘਟਾਵੇਗੀ, ਰੋਜ਼ਗਾਰ ਦੇ ਮੌਕੇ ਪੈਦਾ ਕਰੇਗੀ ਤਾਂ ਕਿ ਹਰ ਮਹੀਨੇ ਲੋਕ ਪੈਸੇ ਦੀ ਬਚਤ ਕਰ ਸਕਣ।