ਬਰੈਂਪਟਨ, 16 ਸਤੰਬਰ (ਪੋਸਟ ਬਿਊਰੋ) : ਐਨਡੀਪੀ ਵੱਲੋਂ ਕੈਨੇਡੀਅਨਾਂ ਨੂੰ ਟੈਲੀਕੌਮ ਕੰਪਨੀਆਂ ਦੇ ਵੱਡੇ ਬਿੱਲਾਂ ਤੋਂ ਬਚਾਉਣ ਲਈ ਯੋਜਨਾ ਦਾ ਐਲਾਨ ਕੀਤਾ ਗਿਆ ਹੈ। ਲੋਕਲ ਐਨਡੀਪੀ ਉਮੀਦਵਾਰ ਸਰਨਜੀਤ ਸਿੰਘ (ਬਰੈਂਪਟਨ ਈਸਟ) ਤੇ ਮੈਲੀਸਾ ਐਡਵਰਡਜ਼ (ਬਰੈਂਪਟਨ ਨੌਰਥ) ਦਾ ਕਹਿਣਾ ਹੈ ਕਿ ਇਹ ਉਨ੍ਹਾਂ ਬਰੈਂਪਟਨ ਵਾਸੀਆਂ ਲਈ ਵੱਡੀ ਜਿੱਤ ਹੋਵੇਗੀ ਜਿਨ੍ਹਾਂ ਨੂੰ ਵੱਡੇ ਵੱਡੇ ਬਿੱਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।
ਸਰਨਜੀਤ ਸਿੰਘ ਨੇ ਆਖਿਆ ਕਿ ਬਰੈਂਪਟਨ ਦੇ ਕਈ ਲੋਕ ਸੈੱਲ ਤੇ ਇੰਟਰਨੈੱਟ ਸੇਵਾਵਾਂ ਦੀਆਂ ਦਿਨੋਂ ਦਿਨ ਉੱਚੀਆਂ ਹੋ ਰਹੀਆਂ ਕੀਮਤਾਂ ਨਾਲ ਜੂਝ ਰਹੇ ਹਨ। ਅਸੀਂ ਆਪਣੇ ਕੰਮ ਲਈ, ਸਿੱਖਿਆ ਲਈ, ਦੋਸਤਾਂ ਤੇ ਪਰਿਵਾਰਕ ਮੈਂਬਰਾਂ ਨਾਲ ਜੁੜੇ ਰਹਿਣ ਲਈ ਇਨ੍ਹਾਂ ਸੇਵਾਵਾਂ ਉੱਤੇ ਨਿਰਭਰ ਕਰਦੇ ਹਾਂ। ਸਾਡੀ ਇਸ ਲੋੜ ਦਾ ਵੱਡੀਆਂ ਇੰਟਰਨੈੱਟ ਤੇ ਸੈੱਲ ਫੋਨ ਕੰਪਨੀਆਂ ਲਾਹਾ ਲੈ ਰਹੀਆਂ ਹਨ। ਇੱਥੇ ਹੀ ਬੱਸ ਨਹੀਂ ਇਹ ਕੰਪਨੀਆਂ ਮਿਹਨਤੀ ਕੈਨੇਡੀਅਨਾਂ ਦੇ ਸਿਰ ਉੱਤੇ ਐਸ਼ ਕਰ ਰਹੀਆਂ ਹਨ।
ਉਨ੍ਹਾਂ ਆਖਿਆ ਕਿ ਭਾਵੇਂ ਲਿਬਰਲ ਇਸ ਪਾਸੇ ਕੋਈ ਕਾਰਵਾਈ ਨਹੀਂ ਕਰ ਸਕੇ ਪਰ ਜਗਮੀਤ ਸਿੰਘ ਇਨ੍ਹਾਂ ਕੰਪਨੀਆਂ ਨੂੰ ਸਬਕ ਸਿਖਾਉਣ ਲਈ ਤਿਆਰ ਹਨ। ਉਨ੍ਹਾਂ ਵੱਲੋਂ ਅਜਿਹੀ ਯੋਜਨਾ ਦੀ ਪੇਸ਼ਕਸ਼ ਕੀਤੀ ਗਈ ਹੈ ਜਿਸ ਨਾਲ ਸੈੱਲ ਫੋਨ ਤੇ ਇੰਟਰਨੈੱਟ ਕੀਮਤਾਂ ਉੱਤੇ ਇੱਕ ਹੱਦ ਤੱਕ ਰੋਕ ਲੱਗੇਗੀ ਤੇ ਇਸ ਨਾਲ ਪਰਿਵਾਰਾਂ ਨੂੰ ਸਾਲ ਦੇ 250 ਡਾਲਰ ਦੀ ਬਚਤ ਹੋਵੇਗੀ। ਉਨ੍ਹਾਂ ਆਖਿਆ ਕਿ ਕਈ ਦਹਾਕਿਆਂ ਤੋਂ ਲਿਬਰਲ ਤੇ ਕੰਜ਼ਰਵੇਟਿਵ ਸਰਕਾਰਾਂ ਹੱਥ ਉੱਤੇ ਹੱਥ ਧਰਕੇ ਇਨ੍ਹਾਂ ਕੰਪਨੀਆਂ ਹੱਥੋਂ ਕੈਨੇਡੀਅਨਾਂ ਦੀ ਹੋ ਰਹੀ ਲੁੱਟ ਦਾ ਲੁਤਫ ਲੈਂਦੀਆਂ ਰਹੀਆਂ ਪਰ ਉਨ੍ਹਾਂ ਕੀਤਾ ਕੁੱਝ ਨਹੀਂ। ਇੱਥੇ ਹੀ ਬੱਸ ਨਹੀਂ ਬੈੱਲ, ਰੌਜਰਜ਼ ਤੇ ਟੈਲੱਸ ਨੂੰ ਬਦਲੇ ਵਿੱਚ ਸਬਸਿਡੀਆਂ ਦਿੱਤੀਆਂ ਗਈਆਂ ਹਨ ਤੇ 700 ਮਿਲੀਅਨ ਡਾਲਰ ਦੇ ਸਰਕਾਰੀ ਕਾਂਟਰੈਕਟ ਦਿੱਤੇ ਗਏ ਹਨ।
ਇਸ ਦੌਰਾਨ ਮੈਲੀਸਾ ਐਡਵਰਡਜ਼ ਨੇ ਆਖਿਆ ਕਿ ਦੂਜੀਆਂ ਪਾਰਟੀਆਂ ਤੋਂ ਉਲਟ ਐਨਡੀਪੀ ਲੋਕਾਂ ਦੇ ਪੱਖ ਵਿੱਚ ਹੈ। ਇਸੇ ਲਈ ਜਗਮੀਤ ਸਿੰਘ ਤੇ ਐਨਡੀਪੀ ਇਨ੍ਹਾਂ ਕੰਪਨੀਆਂ ਦੇ ਖਿਲਾਫ ਲੋਕਾਂ ਦੇ ਹੱਕ ਵਿੱਚ ਅਜਿਹੀ ਪੇਸ਼ਕਸ਼ ਲੈ ਕੇ ਆਏ ਹਨ। ਅਜਿਹਾ ਕਰਨ ਨਾਲ ਲੋਕਾਂ ਦੀਆਂ ਜੇਬ੍ਹਾਂ ਵਿੱਚ ਹੋਰ ਪੈਸਾ ਰਹਿ ਸਕੇਗਾ।