ਓਨਟਾਰੀਓ, 10 ਸਤੰਬਰ (ਪੋਸਟ ਬਿਊਰੋ) : ਓਨਟਾਰੀਓ ਦੇ ਐਮਪੀਪੀ ਆਪਣੀ ਪੰਜ ਮਹੀਨੇ ਦੀ ਗਰਮੀਆਂ ਦੀ ਬ੍ਰੇਕ ਸੋਮਵਾਰ ਤੋਂ ਜਾਰੀ ਰੱਖਣਗੇ। ਇਸ ਨਾਲ ਪ੍ਰੋਵਿੰਸ਼ੀਅਲ ਲੈਜਿਸਲੇਸ਼ਨ ਦੀ ਕਾਰਵਾਈ ਅੱਧਵਿਚਾਲੇ ਹੀ ਰਹਿ ਜਾਵੇਗੀ।
ਸਿਆਸਤਦਾਨਾਂ ਨੇ ਅੱਜ ਕੁਈਨਜ਼ ਪਾਰਕ ਪਰਤਣਾ ਸੀ ਪਰ ਇਸ ਦੀ ਥਾਂ ਉੱਤੇ ਵਿਧਾਨ ਸਭਾ ਖਾਲੀ ਹੀ ਰਹੀ। ਪ੍ਰੋਗਰੈਸਿਵ ਕੰਜ਼ਰਵੇਟਿਵ ਸਰਕਾਰ ਅਗਲੇ ਮਹੀਨੇ ਹੋਣ ਵਾਲੀਆਂ ਫੈਡਰਲ ਚੋਣਾਂ ਦੇ ਨਤੀਜੇ ਤੋਂ ਬਾਅਦ ਹੀ ਪਰਤੇਗੀ। ਐਨਡੀਪੀ ਐਮਪੀਪੀ ਮੌਨਿਕ ਟੇਲਰ ਦਾ ਕਹਿਣਾ ਹੈ ਕਿ ਫੋਰਡ ਸਰਕਾਰ ਨੂੰ ਲੱਗਦਾ ਹੈ ਕਿ ਓਨਟਾਰੀਓ ਵਾਸੀਆਂ ਦੇ ਮਸਲੇ ਹੱਲ ਕਰਨ ਦੀ ਥਾਂ ਫੈਡਰਲ ਚੋਣਾਂ ਲਈ ਘਰ ਰਹਿ ਕੇ ਐਂਡਰੀਊ ਸ਼ੀਅਰ ਦੀ ਮਦਦ ਕਰਨ ਜਿ਼ਆਦਾ ਜ਼ਰੂਰੀ ਹੈ। ਉਨ੍ਹਾਂ ਆਖਿਆ ਕਿ ਕਈ ਮੁੱਦੇ ਹਨ ਜਿਨ੍ਹਾਂ ਸਬੰਧੀ ਪ੍ਰੋਵਿੰਸ਼ੀਅਲ ਸਰਕਾਰ ਤੋਂ ਜਵਾਬ ਮੰਗਣੇ ਅਤਿ ਜ਼ਰੂਰੀ ਹਨ। ਅਸੀਂ ਸਿੱਖਿਆ ਤੇ ਸੇਵਾਵਾਂ ਵਿੱਚ ਕਟੌਤੀਆਂ ਲਈ ਸਰਕਾਰ ਨੂੰ ਕਈ ਸਵਾਲ ਕਰਨੇ ਸਨ, ਜੋ ਹੁਣ ਸੰਭਵ ਨਹੀਂ।
ਜਿ਼ਕਰਯੋਗ ਹੈ ਕਿ ਪਿਛਲੇ ਕੁੱਝ ਮਹੀਨਿਆਂ ਵਿੱਚ ਪ੍ਰੀਮੀਅਰ ਡੱਗ ਫੋਰਡ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦੀ ਅਗਵਾਈ ਵਾਲੇ ਲਿਬਰਲਾਂ ਦੇ ਨਿਸ਼ਾਨੇ ਉੱਤੇ ਆਉਂਦੇ ਰਹੇ ਹਨ। ਲਿਬਰਲ ਪਾਰਟੀ ਉਨ੍ਹਾਂ ਨੂੰ ਫੈਡਰਲ ਕੰਜ਼ਰਵੇਟਿਵ ਆਗੂ ਐਂਡਰਿਊ ਸ਼ੀਅਰ ਨਾਲ ਜੋੜਨ ਦੀ ਕੋਸਿ਼ਸ਼ ਕਰਦੀ ਰਹੀ ਹੈ। ਪਰ ਸਰਕਾਰ ਦਾ ਕਹਿਣਾ ਹੈ ਕਿ ਇਨ੍ਹਾਂ ਛੁੱਟੀਆਂ ਦਾ ਇਹ ਮਤਲਬ ਨਹੀਂ ਹੈ ਕਿ 21 ਅਕਤੂਬਰ ਤੱਕ ਸਰਕਾਰ ਕੋਈ ਕੰਮ ਨਹੀਂ ਕਰੇਗੀ। ਪ੍ਰੀਮੀਅਰ ਅਜੇ ਵੀ ਮੀਟਿੰਗਾਂ ਕਰ ਰਹੇ ਹਨ, ਕਮਿਊਨਿਟੀਜ਼ ਦਾ ਦੌਰਾ ਕਰ ਰਹੇ ਹਨ ਤੇ ਪ੍ਰੈੱਸ ਕਾਨਫਰੰਸ ਕਰ ਰਹੇ ਹਨ। ਇਸ ਤੋਂ ਇਲਾਵਾ ਮੰਤਰੀ ਸਰਕਾਰ ਦੇ ਏਜੰਡੇ ਨੂੰ ਲਾਗੂ ਕਰ ਰਹੇ ਹਨ।
ਇੱਥੇ ਦੱਸਣਾ ਬਣਦਾ ਹੈ ਕਿ ਪ੍ਰੋਵਿੰਸ਼ੀਅਲ ਵਿਧਾਨਸਭਾ ਜੂਨ ਦੇ ਸ਼ੁਰੂ ਤੋਂ ਬੰਦ ਹੈ ਤੇ ਐਮਪੀਪੀਜ਼ ਦੇ 28 ਅਕਤੂਬਰ ਨੂੰ ਛੁੱਟੀਆਂ ਕੱਟ ਕੇ ਪਰਤਣ ਦੀ ਸੰਭਾਵਨਾ ਹੈ।