ਹੈਲੀਫੈਕਸ, 10 ਸਤੰਬਰ (ਪੋਸਟ ਬਿਊਰੋ) : ਵੀਕੈਂਡ ਉੱਤੇ ਡੋਰੀਅਨ ਤੂਫਾਨ ਵੱਲੋਂ ਮਚਾਈ ਗਈ ਤਬਾਹੀ ਤੋਂ ਬਾਅਦ ਇੱਥੇ ਰਿਕਵਰੀ ਲਈ ਚੱਲ ਰਹੀਆਂ ਕੋਸਿ਼ਸ਼ਾਂ ਦਾ ਮੁਆਇਨਾ ਕਰਨ ਲਈ ਦੋ ਫੈਡਰਲ ਕੈਬਨਿਟ ਮੰਤਰੀ ਅੱਜ ਹੈਲੀਫੈਕਸ ਦਾ ਦੌਰਾ ਕਰਨਗੇ।
ਪਬਲਿਕ ਸੇਫਟੀ ਮੰਤਰੀ ਰਾਲਫ ਗੁਡੇਲ, ਰੱਖਿਆ ਮੰਤਰੀ ਹਰਜੀਤ ਸੱਜਣ ਨਾਲ ਅੱਜ ਹੈਲੀਫੈਕਸ ਪਹੁੰਚਣਗੇ। ਨਿਊ ਬਰੰਜ਼ਵਿੱਕ ਦੇ ਸੀਐਫਬੀ ਗੇਜ਼ਟਾਊਨ ਦੀਆਂ ਸੈਂਕੜੇ ਫੌਜੀ ਟੁਕੜੀਆਂ ਹੈਲੀਫੈਕਸ ਵਿੱਚ ਹਨ। ਇਨ੍ਹਾਂ ਵਿੱਚੋਂ ਕਈ ਰੁੱਖਾਂ ਅਤੇ ਬਿਜਲੀ ਦੀਆਂ ਤਾਰਾਂ ਦੀ ਉਲਝੀ ਤਾਣੀ ਨੂੰ ਸੁਲਝਾਉਣ ਲਈ ਉਨ੍ਹਾਂ ਨੂੰ ਕੱਟ ਕੱਟ ਕੇ ਅੱਡ ਕਰ ਰਹੇ ਹਨ।
ਅਜੇ ਤੱਕ ਇੱਥੇ 125,000 ਘਰਾਂ ਤੇ ਕਾਰੋਬਾਰਾਂ ਵਿੱਚ ਬਿਜਲੀ ਸਪਲਾਈ ਠੱਪ ਪਈ ਹੈ ਤੇ ਬਿਜਲੀ ਸਪਲਾਈ ਚਾਲੂ ਕਰਨ ਲਈ ਕਿਊਬਿਕ, ਓਨਟਾਰੀਓ, ਫਲੋਰਿਡਾ, ਮੇਨ ਤੋਂ ਪਾਵਰ ਕ੍ਰਿਊ ਤੇ ਨੋਵਾ ਸਕੋਸ਼ੀਆ, ਨਿਊ ਬਰੰਜ਼ਵਿੱਕ ਤੇ ਪੀਈਆਈ ਦੀਆਂ ਯੂਟੀਲਿਟੀ ਕੰਪਨੀਜ਼ ਰਲ ਕੇ ਕੰਮ ਕਰ ਰਹੀਆਂ ਹਨ। ਸੋਮਵਾਰ ਨੂੰ ਵੀ ਨੋਵਾ ਸਕੋਸ਼ੀਆ ਤੇ ਪ੍ਰਿੰਸ ਐਡਵਰਡ ਆਈਲੈਂਡ ਦੇ ਕਈ ਸਕੂਲ ਬੰਦ ਰਹਿਣਗੇ।
ਐਮਰਜੰਸੀ ਅਧਿਕਾਰੀਆਂ ਵੱਲੋਂ ਲੋਕਾਂ ਨੂੰ ਆਪਣੀ ਸੇਫਟੀ ਲਈ ਘਰਾਂ ਵਿੱਚ ਹੀ ਰਹਿਣ ਦੀ ਅਪੀਲ ਕੀਤੀ ਜਾ ਰਹੀ ਹੈ। ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਇਸ ਨਾਲ ਉਨ੍ਹਾਂ ਨੂੰ ਤੂਫਾਨ ਡੋਰੀਅਨ ਕਾਰਨ ਮਚੀ ਤਬਾਹੀ ਨੂੰ ਸਾਫ ਕਰਨ ਵਿੱਚ ਆਸਾਨੀ ਰਹੇਗੀ। ਨੋਵਾ ਸਕੋਸ਼ੀਆ ਵਿੱਚ ਪਬਲਿਕ ਸਕੂਲ ਅੱਜ ਬੰਦ ਰਹਿਣਗੇ।