ਦੋ ਫਿਲਮਾਂ ਦਾ ਬਾਕਸ ਆਫਿਸ 'ਤੇ ਟਕਰਾਉਣਾ ਕੋਈ ਨਵੀਂ ਗੱਲ ਨਹੀਂ ਹੈ। ਏਨੀਆਂ ਫਿਲਮਾਂ ਬਣ ਰਹੀਆਂ ਹਨ ਕਿ ਲਗਭਗ ਹਰ ਸ਼ੁੱਕਰਵਾਰ ਦੋ ਤੋਂ ਤਿੰਨ ਫਿਲਮਾਂ ਰਿਲੀਜ਼ ਹੁੰਦੀਆਂ ਹਨ। ਫਿਲਮਾਂ ਦੀ ਟੱਕਰ ਬੇਸ਼ੱਕ ਮਾਇਨੇ ਨਾ ਰੱਖਦੀ ਹੋੇ, ਪਰ ਸਿਤਾਰਿਆਂ ਦੀ ਟੱਕਰ ਮਾਇਨੇ ਰੱਖਦੀ ਹੈ। ਇਸ ਵਾਰ ਇੱਕੋ ਦਿਨ ਅਮਿਤਾਭ ਬੱਚਨ ਤੇ ਰਾਣੀ ਮੁਖਰਜੀ ਆਹਮੋ ਸਾਹਮਣੇ ਹੋਣਗੇ। ‘ਬਲੈਕ’, ‘ਕਭੀ ਖੁਸ਼ੀ ਕਭੀ ਗ਼ਮ’, ‘ਬਾਬੁਲ’ ਜਿਹੀਆਂ ਕਈ ਫਿਲਮਾਂ 'ਚ ਇਕੱਠੇ ਕੰਮ ਕਰ ਚੁੱਕੇ ਦੋਵਾਂ ਸਿਤਾਰਿਆਂ ਦੀਆਂ ਆਉਣ ਵਾਲੀਆਂ ਫਿਲਮਾਂ ਇੱਕੋ ਦਿਨ ਰਿਲੀਜ਼ ਹੋ ਸਕਦੀਆਂ ਹਨ।
ਅਮਿਤਾਭ ਬੱਚਨ ਦੀ ਅਗਲੀ ਫਿਲਮ ‘ਝੁੰਡ’ ਦੀ ਨਵੀਂ ਰਿਲੀਜ਼ ਤਰੀਕ ਸਾਹਮਣੇ ਆ ਗਈ ਹੈ। ਇਸ ਫਿਲਮ ਨੂੰ ਪਹਿਲਾਂ 20 ਸਤੰਬਰ ਨੂੰ ਰਿਲੀਜ਼ ਕੀਤਾ ਜਾਣਾ ਸੀ, ਪਰ 13 ਦਸੰਬਰ ਨੂੰ ਰਿਲੀਜ਼ ਹੋਵੇਗੀ। ਇਸ ਦਿਨ ਰਾਣੀ ਮੁਖਰਜੀ ਦੀ ਫਿਲਮ ‘ਮਰਦਾਨੀ 2’ ਵੀ ਰਿਲੀਜ਼ ਹੋਣੀ ਹੈ। ਹਾਲੇ ਤੱਕ ‘ਝੁੰਡ’ ਦੀ ਨਵੀਂ ਤਰੀਕ ਦਾ ਐਲਾਨ ਨਹੀਂ ਕੀਤਾ ਗਿਆ, ਪਰ ਫਿਲਮ ਦਾ ਨਾ ਕੋਈ ਪ੍ਰਚਾਰ ਸ਼ੁਰੂ ਹੋਇਆ ਹੈ ਤੇ ਨਾ ਫਿਲਮ ਦਾ ਟ੍ਰੇਲਰ ਵਿਖਾਇਆ ਗਿਆ ਹੈ। 20 ਸਤੰਬਰ ਨੂੰ ਇਸ ਫਿਲਮ ਦਾ ਰਿਲੀਜ਼ ਹੋਣਾ ਨਾਮੁਮਕਿਨ ਹੈ। ਜੇ ‘ਝੁੰਡ’ ਤੇ ‘ਮਰਦਾਨੀ 2’ ਇੱਕੋ ਦਿਨ ਰਿਲੀਜ਼ ਹੁੰਦੀਆਂ ਹਨ ਤਾਂ ਦਰਸ਼ਕਾਂ ਨੂੰ ਦੋ ਵੱਖਰੀ ਤਰ੍ਹਾਂ ਦੀਆਂ ਫਿਲਮਾਂ ਵੇਖਣ ਦਾ ਮੌਕਾ ਮਿਲੇਗਾ। ‘ਝੁੰਡ’ 'ਚ ਅਮਿਤਾਭ ਝੁੱਗੀਆਂ ਵਿੱਚ ਰਹਿਣ ਵਾਲੇ ਬੱਚਿਆਂ ਨੂੰ ਫੁੱਟਬਾਲ ਖੇਡਣਾ ਸਿਖਾਉਣਗੇ।